(BHSCO) 1 Chronicles 20 : 1 ויהי לעת תשובת השנה לעת צאת המלכים וינהג יואב את־חיל הצבא וישחת את־ארץ בני־עמון ויבא ויצר את־רבה ודויד ישב בירושלם ויך יואב את־רבה ויהרסה׃
(BHSCO) 1 Chronicles 20 : 2 ויקח דויד את־עטרת־מלכם מעל ראשו וימצאה משקל ככר־זהב ובה אבן יקרה ותהי על־ראש דויד ושלל העיר הוציא הרבה מאד׃
(BHSCO) 1 Chronicles 20 : 3 ואת־העם אשר־בה הוציא וישר במגרה ובחריצי הברזל ובמגרות וכן יעשה דויד לכל ערי בני־עמון וישב דויד וכל־העם ירושלם׃ ף
(BHSCO) 1 Chronicles 20 : 4 ויהי אחריכן ותעמד מלחמה בגזר עם־פלשתים אז הכה סבכי החשתי את־ספי מילדי הרפאים ויכנעו׃
(BHSCO) 1 Chronicles 20 : 5 ותהי־עוד מלחמה את־פלשתים ויך אלחןן בן־[כ יעור] [ק יעיר] את־לחמי אחי גלית הגתי ועץ חניתו כמנור ארגים׃
(BHSCO) 1 Chronicles 20 : 6 ותהי־עוד מלחמה בגת ויהי איש מדה ואצבעתיו שש־ושש עשרים וארבע וגם־הוא נולד להרפא׃
(BHSCO) 1 Chronicles 20 : 7 ויחרף את־ישראל ויכהו יהונתן בן־שמעא אחי דויד׃
(BHSCO) 1 Chronicles 20 : 8 אל נולדו להרפא בגת ויפלו ביד־דויד וביד־עבדיו׃ ף