(BHSCO) 1 Chronicles 7 : 1 ולבני יששכר תולע ופואה [כ ישיב] [ק ישוב] ושמרון ארבעה׃ ס
(BHSCO) 1 Chronicles 7 : 2 ובני תולע עזי ורפיה ויריאל ויחמי ויבשם ושמואל ראשים לבית־אבותם לתולע גבורי חיל לתלדותם מספרם בימי דויד עשרים־ושנים אלף ושש מאות׃ ס
(BHSCO) 1 Chronicles 7 : 3 ובני עזי יזרחיה ובני יזרחיה מיכאל ועבדיה ויואל ישיה חמשה ראשים כלם׃
(BHSCO) 1 Chronicles 7 : 4 ועליהם לתלדותם לבית אבותם גדודי צבא מלחמה שלשים וששה אלף כי־הרבו נשים ובנים׃
(BHSCO) 1 Chronicles 7 : 5 ואחיהם לכל משפחות יששכר גבורי חילים שמונים ושבעה אלף התיחשם לכל׃ ף
(BHSCO) 1 Chronicles 7 : 6 בנימן בלע ובכר וידיעאל שלשה׃
(BHSCO) 1 Chronicles 7 : 7 ובני בלע אצבון ועזי ועזיאל וירימות ועירי חמשה ראשי בית אבות גבורי חילים והתיחשם עשרים ושנים אלף ושלשים וארבעה׃ ס
(BHSCO) 1 Chronicles 7 : 8 ובני בכר זמירה ויועש ואליעזר ואליועיני ועמרי וירמות ואביה וענתות ועלמת כל־אלה בני־בכר׃
(BHSCO) 1 Chronicles 7 : 9 והתיחשם לתלדותם ראשי בית אבותם גבורי חיל עשרים אלף ומאתים׃ ס
(BHSCO) 1 Chronicles 7 : 10 ובני ידיעאל בלהן ובני בלהן [כ יעיש] [ק יעוש] ובנימן ואהוד וכנענה וזיתן ותרשיש ואחישחר׃
(BHSCO) 1 Chronicles 7 : 11 כל־אלה בני ידיעאל לראשי האבות גבורי חילים שבעה־עשר אלף ומאתים יצאי צבא למלחמה׃
(BHSCO) 1 Chronicles 7 : 12 ושפם וחפם בני עיר חשם בני אחר׃
(BHSCO) 1 Chronicles 7 : 13 בני נפתלי יחציאל וגוני ויצר ושלום בני בלהה׃ ף
(BHSCO) 1 Chronicles 7 : 14 בני מנשה אשריאל אשר ילדה פילגשו הארמיה ילדה את־מכיר אבי גלעד׃
(BHSCO) 1 Chronicles 7 : 15 ומכיר לקח אשה לחפים ולשפים ושם אחתו מעכה ושם השני צלפחד ותהינה לצלפחד בנות׃
(BHSCO) 1 Chronicles 7 : 16 ותלד מעכה אשת־מכיר בן ותקרא שמו פרש ושם אחיו שרש ובניו אולם ורקם׃
(BHSCO) 1 Chronicles 7 : 17 ובני אולם בדן אלה בני גלעד בן־מכיר בן־מנשה׃
(BHSCO) 1 Chronicles 7 : 18 ואחתו המלכת ילדה את־אישהוד ואת־אביעזר ואת־מחלה׃
(BHSCO) 1 Chronicles 7 : 19 ויהיו בני שמידע אחין ושכם ולקחי ואניעם׃ ף
(BHSCO) 1 Chronicles 7 : 20 ובני אפרים שותלח וברד בנו ותחת בנו ואלעדה בנו ותחת בנו׃
(BHSCO) 1 Chronicles 7 : 21 וזבד בנו ושותלח בנו ועזר ואלעד והרגום אנשי־גת הנולדים בארץ כי ירדו לקחת את־מקניהם׃
(BHSCO) 1 Chronicles 7 : 22 ויתאבל אפרים אביהם ימים רבים ויבאו אחיו לנחמו׃
(BHSCO) 1 Chronicles 7 : 23 ויבא אל־אשתו ותהר ותלד בן ויקרא את־שמו בריעה כי ברעה היתה בביתו׃
(BHSCO) 1 Chronicles 7 : 24 ובתו שארה ותבן את־בית־חורון התחתון ואת־העליון ואת אזן שארה׃
(BHSCO) 1 Chronicles 7 : 25 ורפח בנו ורשף ותלח בנו ותחן בנו׃
(BHSCO) 1 Chronicles 7 : 26 לעדן בנו עמיהוד בנו אלישמע בנו׃
(BHSCO) 1 Chronicles 7 : 27 נון בנו יהושע בנו׃
(BHSCO) 1 Chronicles 7 : 28 ואחזתם ומשבותם בית־אל ובנתיה ולמזרח נערן ולמערב גזר ובנתיה ושכם ובנתיה עד־עיה ובנתיה׃
(BHSCO) 1 Chronicles 7 : 29 ועל־ידי בני־מנשה בית־שאן ובנתיה תענך ובנתיה מגדו ובנותיה דור ובנותיה באלה ישבו בני יוסף בן־ישראל׃ ף
(BHSCO) 1 Chronicles 7 : 30 בני אשר ימנה וישוה וישוי ובריעה ושרח אחותם׃
(BHSCO) 1 Chronicles 7 : 31 ובני בריעה חבר ומלכיאל הוא אבי [כ ברזות] [ק ברזית]׃
(BHSCO) 1 Chronicles 7 : 32 וחבר הוליד את־יפלט ואת־שומר ואת־חותם ואת שועא אחותם׃
(BHSCO) 1 Chronicles 7 : 33 ובני יפלט פסך ובמהל ועשות אלה בני יפלט׃
(BHSCO) 1 Chronicles 7 : 34 ובני שמר אחי [כ ורוהגה] [ק ורהגה] [כ יחבה] [ק וחבה] וארם׃
(BHSCO) 1 Chronicles 7 : 35 ובן־הלם אחיו צופח וימנע ושלש ועמל׃
(BHSCO) 1 Chronicles 7 : 36 בני צופח סוח וחרנפר ושועל וברי וימרה׃
(BHSCO) 1 Chronicles 7 : 37 בצר והוד ושמא ושלשה ויתרן ובארא׃
(BHSCO) 1 Chronicles 7 : 38 ובני יתר יפנה ופספה וארא׃
(BHSCO) 1 Chronicles 7 : 39 ובני עלא ארח וחניאל ורציא׃
(BHSCO) 1 Chronicles 7 : 40 כל־אלה בני־אשר ראשי בית־האבות ברורים גבורי חילים ראשי הנשיאים והתיחשם בצבא במלחמה מספרם אנשים עשרים וששה אלף׃ ס