(BHSCO) 1 Samuel 20 : 1 ויברח דוד [כ מנוות] [ק מניות] ברמה ויבא ויאמר לפני יהונתן מה עשיתי מה־עוני ומה־חטאתי לפני אביך כי מבקש את־נפשי׃
(BHSCO) 1 Samuel 20 : 2 ויאמר לו חלילה לא תמות הנה [כ לו] [ק לא]־[כ עשה] [ק יעשה] אבי דבר גדול או דבר קטן ולא יגלה את־אזני ומדוע יסתיר אבי ממני את־הדבר הזה אין זאת׃
(BHSCO) 1 Samuel 20 : 3 וישבע עוד דוד ויאמר ידע ידע אביך כי־מצאתי חן בעיניך ויאמר אל־ידע־זאת יהונתן פן־יעצב ואולם חי־יהוה וחי נפשך כי כפשע ביני ובין המות׃
(BHSCO) 1 Samuel 20 : 4 ויאמר יהונתן אל־דוד מה־תאמר נפשך ואעשה־לך׃ ף
(BHSCO) 1 Samuel 20 : 5 ויאמר דוד אל־יהונתן הנה־חדש מחר ואנכי ישב־אשב עם־המלך לאכול ושלחתני ונסתרתי בשדה עד הערב השלשית׃
(BHSCO) 1 Samuel 20 : 6 אם־פקד יפקדני אביך ואמרת נשאל נשאל ממני דוד לרוץ בית־לחם עירו כי זבח הימים שם לכל־המשפחה׃
(BHSCO) 1 Samuel 20 : 7 אם־כה יאמר טוב שלום לעבדך ואם־חרה יחרה לו דע כי־כלתה הרעה מעמו׃
(BHSCO) 1 Samuel 20 : 8 ועשית חסד על־עבדך כי בברית יהוה הבאת את־עבדך עמך ואם־יש־בי עון המיתני אתה ועד־אביך למה־זה תביאני׃ ף
(BHSCO) 1 Samuel 20 : 9 ויאמר יהונתן חלילה לך כי אם־ידע אדע כי־כלתה הרעה מעם אבי לבוא עליך ולא אתה אגיד לך׃ ס
(BHSCO) 1 Samuel 20 : 10 ויאמר דוד אל־יהונתן מי יגיד לי או מה־יענך אביך קשה׃ ס
(BHSCO) 1 Samuel 20 : 11 ויאמר יהונתן אל־דוד לכה ונצא השדה ויצאו שניהם השדה׃ ס
(BHSCO) 1 Samuel 20 : 12 ויאמר יהונתן אל־דוד יהוה אלהי ישראל כי־אחקר את־אבי כעת מחר השלשית והנה־טוב אל־דוד ולא־אז אשלח אליך וגליתי את־אזנך׃
(BHSCO) 1 Samuel 20 : 13 כה־יעשה יהוה ליהונתן וכה יסיף כי־ייטב אל־אבי את־הרעה עליך וגליתי את־אזנך ושלחתיך והלכת לשלום ויהי יהוה עמך כאשר היה עם־אבי׃
(BHSCO) 1 Samuel 20 : 14 ולא אם־עודני חי ולא־תעשה עמדי חסד יהוה ולא אמות׃
(BHSCO) 1 Samuel 20 : 15 ולא־תכרת את־חסדך מעם ביתי עד־עולם ולא בהכרת יהוה את־איבי דוד איש מעל פני האדמה׃
(BHSCO) 1 Samuel 20 : 16 ויכרת יהונתן עם־בית דוד ובקש יהוה מיד איבי דוד׃
(BHSCO) 1 Samuel 20 : 17 ויוסף יהונתן להשביע את־דוד באהבתו אתו כי־אהבת נפשו אהבו׃ ס
(BHSCO) 1 Samuel 20 : 18 ויאמר־לו יהונתן מחר חדש ונפקדת כי יפקד מושבך׃
(BHSCO) 1 Samuel 20 : 19 ושלשת תרד מאד ובאת אל־המקום אשר־נסתרת שם ביום המעשה וישבת אצל האבן האזל׃
(BHSCO) 1 Samuel 20 : 20 ואני שלשת החצים צדה אורה לשלח־לי למטרה׃
(BHSCO) 1 Samuel 20 : 21 והנה אשלח את־הנער לך מצא את־החצים אם־אמר אמר לנער הנה החצים ממך והנה קחנו ובאה כי־שלום לך ואין דבר חי־יהוה׃
(BHSCO) 1 Samuel 20 : 22 ואם־כה אמר לעלם הנה החצים ממך והלאה לך כי שלחך יהוה׃
(BHSCO) 1 Samuel 20 : 23 והדבר אשר דברנו אני ואתה הנה יהוה ביני ובינך עד־עולם׃ ס
(BHSCO) 1 Samuel 20 : 24 ויסתר דוד בשדה ויהי החדש וישב המלך [כ על] [ק אל]־הלחם לאכול׃
(BHSCO) 1 Samuel 20 : 25 וישב המלך על־מושבו כפעם בפעם אל־מושב הקיר ויקם יהונתן וישב אבנר מצד שאול ויפקד מקום דוד׃
(BHSCO) 1 Samuel 20 : 26 ולא־דבר שאול מאומה ביום ההוא כי אמר מקרה הוא בלתי טהור הוא כי־לא טהור׃ ס
(BHSCO) 1 Samuel 20 : 27 ויהי ממחרת החדש השני ויפקד מקום דוד ס ויאמר שאול אל־יהונתן בנו מדוע לא־בא בן־ישי גם־תמול גם־היום אל־הלחם׃
(BHSCO) 1 Samuel 20 : 28 ויען יהונתן את־שאול נשאל נשאל דוד מעמדי עד־בית לחם׃
(BHSCO) 1 Samuel 20 : 29 ויאמר שלחני נא כי זבח משפחה לנו בעיר והוא צוה־לי אחי ועתה אם־מצאתי חן בעיניך אמלטה נא ואראה את־אחי על־כן לא־בא אל־שלחן המלך׃ ס
(BHSCO) 1 Samuel 20 : 30 ויחר־אף שאול ביהונתן ויאמר לו בן־נעות המרדות הלוא ידעתי כי־בחר אתה לבן־ישי לבשתך ולבשת ערות אמך׃
(BHSCO) 1 Samuel 20 : 31 כי כל־הימים אשר בן־ישי חי על־האדמה לא תכון אתה ומלכותך ועתה שלח וקח אתו אלי כי בן־מות הוא׃ ס
(BHSCO) 1 Samuel 20 : 32 ויען יהונתן את־שאול אביו ויאמר אליו למה יומת מה עשה׃
(BHSCO) 1 Samuel 20 : 33 ויטל שאול את־החנית עליו להכתו וידע יהונתן כי־כלה היא מעם אביו להמית את־דוד׃ ס
(BHSCO) 1 Samuel 20 : 34 ויקם יהונתן מעם השלחן בחרי־אף ולא־אכל ביום־החדש השני לחם כי נעצב אל־דוד כי הכלמו אביו׃ ס
(BHSCO) 1 Samuel 20 : 35 ויהי בבקר ויצא יהונתן השדה למועד דוד ונער קטן עמו׃
(BHSCO) 1 Samuel 20 : 36 ויאמר לנערו רץ מצא נא את־החצים אשר אנכי מורה הנער רץ והוא־ירה החצי להעברו׃
(BHSCO) 1 Samuel 20 : 37 ויבא הנער עד־מקום החצי אשר ירה יהונתן ויקרא יהונתן אחרי הנער ויאמר הלוא החצי ממך והלאה׃
(BHSCO) 1 Samuel 20 : 38 ויקרא יהונתן אחרי הנער מהרה חושה אל־תעמד וילקט נער יהונתן את־[כ החצי] [ק החצים] ויבא אל־אדניו׃
(BHSCO) 1 Samuel 20 : 39 והנער לא־ידע מאומה אך יהונתן ודוד ידעו את־הדבר׃
(BHSCO) 1 Samuel 20 : 40 ויתן יהונתן את־כליו אל־הנער אשר־לו ויאמר לו לך הביא העיר׃
(BHSCO) 1 Samuel 20 : 41 הנער בא ודוד קם מאצל הנגב ויפל לאפיו ארצה וישתחו שלש פעמים וישקו איש את־רעהו ויבכו איש את־רעהו עד־דוד הגדיל׃
(BHSCO) 1 Samuel 20 : 42 ויאמר יהונתן לדוד לך לשלום אשר נשבענו שנינו אנחנו בשם יהוה לאמר יהוה יהיה ביני ובינך ובין זרעי ובין זרעך עד־עולם׃ ף