(BHSCO) 1 Samuel 21 : 1 ויקם וילך ויהונתן בא העיר׃
(BHSCO) 1 Samuel 21 : 2 ויבא דוד נבה אל־אחימלך הכהן ויחרד אחימלך לקראת דוד ויאמר לו מדוע אתה לבדך ואיש אין אתך׃
(BHSCO) 1 Samuel 21 : 3 ויאמר דוד לאחימלך הכהן המלך צוני דבר ויאמר אלי איש אל־ידע מאומה את־הדבר אשר־אנכי שלחך ואשר צויתך ואת־הנערים יודעתי אל־מקום פלני אלמוני׃
(BHSCO) 1 Samuel 21 : 4 ועתה מה־יש תחת־ידך חמשה־לחם תנה בידי או הנמצא׃
(BHSCO) 1 Samuel 21 : 5 ויען הכהן את־דוד ויאמר אין־לחם חל אל־תחת ידי כי־אם־לחם קדש יש אם־נשמרו הנערים אך מאשה׃ ף
(BHSCO) 1 Samuel 21 : 6 ויען דוד את־הכהן ויאמר לו כי אם־אשה עצרה־לנו כתמול שלשם בצאתי ויהיו כלי־הנערים קדש והוא דרך חל ואף כי היום יקדש בכלי׃
(BHSCO) 1 Samuel 21 : 7 ויתן־לו הכהן קדש כי לא־היה שם לחם כי־אם־לחם הפנים המוסרים מלפני יהוה לשום לחם חם ביום הלקחו׃
(BHSCO) 1 Samuel 21 : 8 ושם איש מעבדי שאול ביום ההוא נעצר לפני יהוה ושמו דאג האדמי אביר הרעים אשר לשאול׃
(BHSCO) 1 Samuel 21 : 9 ויאמר דוד לאחימלך ואין יש־פה תחת־ידך חנית או־חרב כי גם־חרבי וגם־כלי לא־לקחתי בידי כי־היה דבר־המלך נחוץ׃ ס
(BHSCO) 1 Samuel 21 : 10 ויאמר הכהן חרב גלית הפלשתי אשר־הכית בעמק האלה הנה־היא לוטה בשמלה אחרי האפוד אם־אתה תקח־לך קח כי אין אחרת זולתה בזה ויאמר דוד אין כמוה תננה לי׃
(BHSCO) 1 Samuel 21 : 11 ויקם דוד ויברח ביום־ההוא מפני שאול ויבא אל־אכיש מלך גת׃
(BHSCO) 1 Samuel 21 : 12 ויאמרו עבדי אכיש אליו הלוא־זה דוד מלך הארץ הלוא לזה יענו במחלות לאמר הכה שאול [כ באלפו] [ק באלפיו] ודוד [כ ברבבתו] [ק ברבבתיו]׃
(BHSCO) 1 Samuel 21 : 13 וישם דוד את־הדברים האלה בלבבו וירא מאד מפני אכיש מלך־גת׃
(BHSCO) 1 Samuel 21 : 14 וישנו את־טעמו בעיניהם ויתהלל בידם [כ ויתו] [ק ויתיו] על־דלתות השער ויורד רירו אל־זקנו׃
(BHSCO) 1 Samuel 21 : 15 ויאמר אכיש אל־עבדיו הנה תראו איש משתגע למה תביאו אתו אלי׃ (16) חסר משגעים אני כי־הבאתם את־זה להשתגע עלי הזה יבוא אל־ביתי׃ ס