(BHSCO) 2 Chronicles 2 : 1 ויאמר שלמה לבנות בית לשם יהוה ובית למלכותו׃
(BHSCO) 2 Chronicles 2 : 2 ויספר שלמה שבעים אלף איש סבל ושמונים אלף איש חצב בהר ומנצחים עליהם שלשת אלפים ושש מאות׃ ף
(BHSCO) 2 Chronicles 2 : 3 וישלח שלמה אל־חורם מלך־צר לאמר כאשר עשית עם־דויד אבי ותשלח־לו ארזים לבנות־לו בית לשבת בו׃
(BHSCO) 2 Chronicles 2 : 4 הנה אני בונה־בית לשם יהוה אלהי להקדיש לו להקטיר לפניו קטרת־סמים ומערכת תמיד ועלות לבקר ולערב לשבתות ולחדשים ולמועדי יהוה אלהינו לעולם זאת על־ישראל׃
(BHSCO) 2 Chronicles 2 : 5 והבית אשר־אני בונה גדול כי־גדול אלהינו מכל־האלהים׃
(BHSCO) 2 Chronicles 2 : 6 ומי יעצר־כח לבנות־לו בית כי השמים ושמי השמים לא יכלכלהו ומי אני אשר אבנה־לו בית כי אם־להקטיר לפניו׃
(BHSCO) 2 Chronicles 2 : 7 ועתה שלח־לי איש־חכם לעשות בזהב ובכסף ובנחשת ובברזל ובארגון וכרמיל ותכלת וידע לפתח פתוחים עם־החכמים אשר עמי ביהודה ובירושלם אשר הכין דויד אבי׃
(BHSCO) 2 Chronicles 2 : 8 ושלח־לי עצי ארזים ברושים ואלגומים מהלבנון כי אני ידעתי אשר עבדיך יודעים לכרות עצי לבנון והנה עבדי עם־עבדיך׃
(BHSCO) 2 Chronicles 2 : 9 ולהכין לי עצים לרב כי הבית אשר־אני בונה גדול והפלא׃
(BHSCO) 2 Chronicles 2 : 10 והנה לחטבים לכרתי העצים נתתי חטים מכות לעבדיך כרים עשרים אלף ושערים כרים עשרים אלף ויין בתים עשרים אלף ושמן בתים עשרים אלף׃ ף
(BHSCO) 2 Chronicles 2 : 11 ויאמר חורם מלך־צר בכתב וישלח אל־שלמה באהבת יהוה את־עמו נתנך עליהם מלך׃
(BHSCO) 2 Chronicles 2 : 12 ויאמר חורם ברוך יהוה אלהי ישראל אשר עשה את־השמים ואת־הארץ אשר נתן לדויד המלך בן חכם יודע שכל ובינה אשר יבנה־בית ליהוה ובית למלכותו׃
(BHSCO) 2 Chronicles 2 : 13 ועתה שלחתי איש־חכם יודע בינה לחורם אבי׃
(BHSCO) 2 Chronicles 2 : 14 בן־אשה מן־בנות דן ואביו איש־צרי יודע לעשות בזהב־ובכסף בנחשת בברזל באבנים ובעצים בארגמן בתכלת ובבוץ ובכרמיל ולפתח כל־פתוח ולחשב כל־מחשבת אשר ינתן־לו עם־חכמיך וחכמי אדני דויד אביך׃
(BHSCO) 2 Chronicles 2 : 15 ועתה החטים והשערים השמן והיין אשר אמר אדני ישלח לעבדיו׃
(BHSCO) 2 Chronicles 2 : 16 ואנחנו נכרת עצים מן־הלבנון ככל־צרךך ונביאם לך רפסדות על־ים יפו ואתה תעלה אתם ירושלם׃ ף
(BHSCO) 2 Chronicles 2 : 17 ויספר שלמה כל־האנשים הגירים אשר בארץ ישראל אחרי הספר אשר ספרם דויד אביו וימצאו מאה וחמשים אלף ושלשת אלפים ושש מאות׃
(BHSCO) 2 Chronicles 2 : 18 ויעש מהם שבעים אלף סבל ושמנים אלף חצב בהר ושלשת אלפים ושש מאות מנצחים להעביד את־העם׃