(BHSCO) 2 Kings 21 : 1 בן־שתים עשרה שנה מנשה במלכו וחמשים וחמש שנה מלך בירושלם ושם אמו חפצי־בה׃
(BHSCO) 2 Kings 21 : 2 ויעש הרע בעיני יהוה כתועבת הגוים אשר הוריש יהוה מפני בני ישראל׃
(BHSCO) 2 Kings 21 : 3 וישב ויבן את־הבמות אשר אבד חזקיהו אביו ויקם מזבחת לבעל ויעש אשרה כאשר עשה אחאב מלך ישראל וישתחו לכל־צבא השמים ויעבד אתם׃
(BHSCO) 2 Kings 21 : 4 ובנה מזבחת בבית יהוה אשר אמר יהוה בירושלם אשים את־שמי׃
(BHSCO) 2 Kings 21 : 5 ויבן מזבחות לכל־צבא השמים בשתי חצרות בית־יהוה׃
(BHSCO) 2 Kings 21 : 6 והעביר את־בנו באש ועוןן ונחש ועשה אוב וידענים הרבה לעשות הרע בעיני יהוה להכעיס׃
(BHSCO) 2 Kings 21 : 7 וישם את־פסל האשרה אשר עשה בבית אשר אמר יהוה אל־דוד ואל־שלמה בנו בבית הזה ובירושלם אשר בחרתי מכל שבטי ישראל אשים את־שמי לעולם׃
(BHSCO) 2 Kings 21 : 8 ולא אסיף להניד רגל ישראל מן־האדמה אשר נתתי לאבותם רק אם־ישמרו לעשות ככל אשר צויתים ולכל־התורה אשר־צוה אתם עבדי משה׃
(BHSCO) 2 Kings 21 : 9 ולא שמעו ויתעם מנשה לעשות את־הרע מן־הגוים אשר השמיד יהוה מפני בני ישראל׃
(BHSCO) 2 Kings 21 : 10 וידבר יהוה ביד־עבדיו הנביאים לאמר׃
(BHSCO) 2 Kings 21 : 11 יען אשר עשה מנשה מלך־יהודה התעבות האלה הרע מכל אשר־עשו האמרי אשר לפניו ויחטא גם־את־יהודה בגלוליו׃ ף
(BHSCO) 2 Kings 21 : 12 לכן כה־אמר יהוה אלהי ישראל הנני מביא רעה על־ירושלם ויהודה אשר כל־[כ שמעיו] [ק שמעה] תצלנה שתי אזניו׃
(BHSCO) 2 Kings 21 : 13 ונטיתי על־ירושלם את קו שמרון ואת־משקלת בית אחאב ומחיתי את־ירושלם כאשר־ימחה את־הצלחת מחה והפך על־פניה׃
(BHSCO) 2 Kings 21 : 14 ונטשתי את שארית נחלתי ונתתים ביד איביהם והיו לבז ולמשסה לכל־איביהם׃
(BHSCO) 2 Kings 21 : 15 יען אשר עשו את־הרע בעיני ויהיו מכעסים אתי מן־היום אשר יצאו אבותם ממצרים ועד היום הזה׃
(BHSCO) 2 Kings 21 : 16 וגם דם נקי שפך מנשה הרבה מאד עד אשר־מלא את־ירושלם פה לפה לבד מחטאתו אשר החטיא את־יהודה לעשות הרע בעיני יהוה׃
(BHSCO) 2 Kings 21 : 17 ויתר דברי מנשה וכל־אשר עשה וחטאתו אשר חטא הלא־הם כתובים על־ספר דברי הימים למלכי יהודה׃
(BHSCO) 2 Kings 21 : 18 וישכב מנשה עם־אבתיו ויקבר בגן־ביתו בגן־עזא וימלך אמון בנו תחתיו׃ ף
(BHSCO) 2 Kings 21 : 19 בן־עשרים ושתים שנה אמון במלכו ושתים שנים מלך בירושלם ושם אמו משלמת בת־חרוץ מן־יטבה׃
(BHSCO) 2 Kings 21 : 20 ויעש הרע בעיני יהוה כאשר עשה מנשה אביו׃
(BHSCO) 2 Kings 21 : 21 וילך בכל־הדרך אשר־הלך אביו ויעבד את־הגללים אשר עבד אביו וישתחו להם׃
(BHSCO) 2 Kings 21 : 22 ויעזב את־יהוה אלהי אבתיו ולא הלך בדרך יהוה׃
(BHSCO) 2 Kings 21 : 23 ויקשרו עבדי־אמון עליו וימיתו את־המלך בביתו׃
(BHSCO) 2 Kings 21 : 24 ויך עם־הארץ את כל־הקשרים על־המלך אמון וימליכו עם־הארץ את־יאשיהו בנו תחתיו׃
(BHSCO) 2 Kings 21 : 25 ויתר דברי אמון אשר עשה הלא־הם כתובים על־ספר דברי הימים למלכי יהודה׃
(BHSCO) 2 Kings 21 : 26 ויקבר אתו בקברתו בגן־עזא וימלך יאשיהו בנו תחתיו׃ ף