(BHSCO) 2 Samuel 10 : 1 ויהי אחרי־כן וימת מלך בני עמון וימלך חנון בנו תחתיו׃
(BHSCO) 2 Samuel 10 : 2 ויאמר דוד אעשה־חסד עם־חנון בן־נחש כאשר עשה אביו עמדי חסד וישלח דוד לנחמו ביד־עבדיו אל־אביו ויבאו עבדי דוד ארץ בני עמון׃
(BHSCO) 2 Samuel 10 : 3 ויאמרו שרי בני־עמון אל־חנון אדניהם המכבד דוד את־אביך בעיניך כי־שלח לך מנחמים הלוא בעבור חקור את־העיר ולרגלה ולהפכה שלח דוד את־עבדיו אליך׃
(BHSCO) 2 Samuel 10 : 4 ויקח חנון את־עבדי דוד ויגלח את־חצי זקנם ויכרת את־מדויהם בחצי עד שתותיהם וישלחם׃
(BHSCO) 2 Samuel 10 : 5 ויגדו לדוד וישלח לקראתם כי־היו האנשים נכלמים מאד ויאמר המלך שבו בירחו עד־יצמח זקנכם ושבתם׃
(BHSCO) 2 Samuel 10 : 6 ויראו בני עמון כי נבאשו בדוד וישלחו בני־עמון וישכרו את־ארם בית־רחוב ואת־ארם צובא עשרים אלף רגלי ואת־מלך מעכה אלף איש ואיש טוב שנים־עשר אלף איש׃
(BHSCO) 2 Samuel 10 : 7 וישמע דוד וישלח את־יואב ואת כל־הצבא הגברים׃
(BHSCO) 2 Samuel 10 : 8 ויצאו בני עמון ויערכו מלחמה פתח השער וארם צובא ורחוב ואיש־טוב ומעכה לבדם בשדה׃
(BHSCO) 2 Samuel 10 : 9 וירא יואב כי־היתה אליו פני המלחמה מפנים ומאחור ויבחר מכל בחורי [כ בישראל] [ק ישראל] ויערך לקראת ארם׃
(BHSCO) 2 Samuel 10 : 10 ואת יתר העם נתן ביד אבשי אחיו ויערך לקראת בני עמון׃
(BHSCO) 2 Samuel 10 : 11 ויאמר אם־תחזק ארם ממני והיתה לי לישועה ואם־בני עמון יחזקו ממך והלכתי להושיע לך׃
(BHSCO) 2 Samuel 10 : 12 חזק ונתחזק בעד־עמנו ובעד ערי אלהינו ויהוה יעשה הטוב בעיניו׃
(BHSCO) 2 Samuel 10 : 13 ויגש יואב והעם אשר עמו למלחמה בארם וינסו מפניו׃
(BHSCO) 2 Samuel 10 : 14 ובני עמון ראו כי־נס ארם וינסו מפני אבישי ויבאו העיר וישב יואב מעל בני עמון ויבא ירושלם׃
(BHSCO) 2 Samuel 10 : 15 וירא ארם כי נגף לפני ישראל ויאספו יחד׃
(BHSCO) 2 Samuel 10 : 16 וישלח הדדעזר ויצא את־ארם אשר מעבר הנהר ויבאו חילם ושובך שר־צבא הדדעזר לפניהם׃
(BHSCO) 2 Samuel 10 : 17 ויגד לדוד ס ויאסף את־כל־ישראל ויעבר את־הירדן ויבא חלאמה ויערכו ארם לקראת דוד וילחמו עמו׃
(BHSCO) 2 Samuel 10 : 18 וינס ארם מפני ישראל ויהרג דוד מארם שבע מאות רכב וארבעים אלף פרשים ואת שובך שר־צבאו הכה וימת שם׃
(BHSCO) 2 Samuel 10 : 19 ויראו כל־המלכים עבדי הדדעזר כי נגפו לפני ישראל וישלמו את־ישראל ויעבדום ויראו ארם להושיע עוד את־בני עמון׃ ף