(BHSCO) 2 Samuel 16 : 1 ודוד עבר מעט מהראש והנה ציבא נער מפי־בשת לקראתו וצמד חמרים חבשים ועליהם מאתים לחם ומאה צמוקים ומאה קיץ ונבל יין׃
(BHSCO) 2 Samuel 16 : 2 ויאמר המלך אל־ציבא מה־אלה לך ויאמר ציבא החמורים לבית־המלך לרכב [כ ולהלחם] [ק והלחם] והקיץ לאכול הנערים והיין לשתות היעף במדבר׃
(BHSCO) 2 Samuel 16 : 3 ויאמר המלך ואיה בן־אדניך ויאמר ציבא אל־המלך הנה יושב בירושלם כי אמר היום ישיבו לי בית ישראל את ממלכות אבי׃
(BHSCO) 2 Samuel 16 : 4 ויאמר המלך לצבא הנה לך כל אשר למפי־בשת ויאמר ציבא השתחויתי אמצא־חן בעיניך אדני המלך׃
(BHSCO) 2 Samuel 16 : 5 ובא המלך דוד עד־בחורים והנה משם איש יוצא ממשפחת בית־שאול ושמו שמעי בן־גרא יצא יצוא ומקלל׃
(BHSCO) 2 Samuel 16 : 6 ויסקל באבנים את־דוד ואת־כל־עבדי המלך דוד וכל־העם וכל־הגברים מימינו ומשמאלו׃
(BHSCO) 2 Samuel 16 : 7 וכה־אמר שמעי בקללו צא צא איש הדמים ואיש הבליעל׃
(BHSCO) 2 Samuel 16 : 8 השיב עליך יהוה כל דמי בית־שאול אשר מלכת [כ תחתו] [ק תחתיו] ויתן יהוה את־המלוכה ביד אבשלום בנך והנך ברעתך כי איש דמים אתה׃
(BHSCO) 2 Samuel 16 : 9 ויאמר אבישי בן־צרויה אל־המלך למה יקלל הכלב המת הזה את־אדני המלך אעברה־נא ואסירה את־ראשו׃ ס
(BHSCO) 2 Samuel 16 : 10 ויאמר המלך מה־לי ולכם בני צריה [כ כי] [ק כה] יקלל [כ וכי] [ק כי] יהוה אמר לו קלל את־דוד ומי יאמר מדוע עשיתה כן׃ ס
(BHSCO) 2 Samuel 16 : 11 ויאמר דוד אל־אבישי ואל־כל־עבדיו הנה בני אשר־יצא ממעי מבקש את־נפשי ואף כי־עתה בן־הימיני הנחו לו ויקלל כי אמר־לו יהוה׃
(BHSCO) 2 Samuel 16 : 12 אולי יראה יהוה [כ בעוני] [ק בעיני] והשיב יהוה לי טובה תחת קללתו היום הזה׃
(BHSCO) 2 Samuel 16 : 13 וילך דוד ואנשיו בדרך ס ושמעי הלך בצלע ההר לעמתו הלוך ויקלל ויסקל באבנים לעמתו ועפר בעפר׃ ף
(BHSCO) 2 Samuel 16 : 14 ויבא המלך וכל־העם אשר־אתו עיפים וינפש שם׃
(BHSCO) 2 Samuel 16 : 15 ואבשלום וכל־העם איש ישראל באו ירושלם ואחיתפל אתו׃
(BHSCO) 2 Samuel 16 : 16 ויהי כאשר־בא חושי הארכי רעה דוד אל־אבשלום ויאמר חושי אל־אבשלם יחי המלך יחי המלך׃
(BHSCO) 2 Samuel 16 : 17 ויאמר אבשלום אל־חושי זה חסדך את־רעך למה לא־הלכת את־רעך׃
(BHSCO) 2 Samuel 16 : 18 ויאמר חושי אל־אבשלם לא כי אשר בחר יהוה והעם הזה וכל־איש ישראל [כ לא] [ק לו] אהיה ואתו אשב׃
(BHSCO) 2 Samuel 16 : 19 והשנית למי אני אעבד הלוא לפני בנו כאשר עבדתי לפני אביך כן אהיה לפניך׃ ף
(BHSCO) 2 Samuel 16 : 20 ויאמר אבשלום אל־אחיתפל הבו לכם עצה מה־נעשה׃
(BHSCO) 2 Samuel 16 : 21 ויאמר אחיתפל אל־אבשלם בוא אל־פלגשי אביך אשר הניח לשמור הבית ושמע כל־ישראל כי־נבאשת את־אביך וחזקו ידי כל־אשר אתך׃
(BHSCO) 2 Samuel 16 : 22 ויטו לאבשלום האהל על־הגג ויבא אבשלום אל־פלגשי אביו לעיני כל־ישראל׃
(BHSCO) 2 Samuel 16 : 23 ועצת אחיתפל אשר יעץ בימים ההם כאשר ישאל־[כ זז] [ק איש] בדבר האלהים כן כל־עצת אחיתפל גם־לדוד גם לאבשלם׃ ס