(BHSCO) 2 Samuel 22 : 1 וידבר דוד ליהוה את־דברי השירה הזאת ביום הציל יהוה אתו מכף כל־איביו ומכף שאול׃
(BHSCO) 2 Samuel 22 : 2 ויאמר יהוה סלעי ומצדתי ומפלטי־לי׃
(BHSCO) 2 Samuel 22 : 3 אלהי צורי אחסה־בו מגני וקרן ישעי משגבי ומנוסי משעי מחמס תשעני׃
(BHSCO) 2 Samuel 22 : 4 מהלל אקרא יהוה ומאיבי אושע׃
(BHSCO) 2 Samuel 22 : 5 כי אפפני משברי־מות נחלי בליעל יבעתני׃
(BHSCO) 2 Samuel 22 : 6 חבלי שאול סבני קדמני מקשי־מות׃
(BHSCO) 2 Samuel 22 : 7 בצר־לי אקרא יהוה ואל־אלהי אקרא וישמע מהיכלו קולי ושועתי באזניו׃
(BHSCO) 2 Samuel 22 : 8 [כ ותגעש] [ק ויתגעש] ותרעש הארץ מוסדות השמים ירגזו ויתגעשו כי־חרה לו׃
(BHSCO) 2 Samuel 22 : 9 עלה עשן באפו ואש מפיו תאכל גחלים בערו ממנו׃
(BHSCO) 2 Samuel 22 : 10 ויט שמים וירד וערפל תחת רגליו׃
(BHSCO) 2 Samuel 22 : 11 וירכב על־כרוב ויעף וירא על־כנפי־רוח׃
(BHSCO) 2 Samuel 22 : 12 וישת חשך סביבתיו סכות חשרת־מים עבי שחקים׃
(BHSCO) 2 Samuel 22 : 13 מנגה נגדו בערו גחלי־אש׃
(BHSCO) 2 Samuel 22 : 14 ירעם מן־שמים יהוה ועליון יתן קולו׃
(BHSCO) 2 Samuel 22 : 15 וישלח חצים ויפיצם ברק [כ ויהםם] [ק ויהם]׃
(BHSCO) 2 Samuel 22 : 16 ויראו אפקי ים יגלו מסדות תבל בגערת יהוה מנשמת רוח אפו׃
(BHSCO) 2 Samuel 22 : 17 ישלח ממרום יקחני ימשני ממים רבים׃
(BHSCO) 2 Samuel 22 : 18 יצילני מאיבי עז משנאי כי אמצו ממני׃
(BHSCO) 2 Samuel 22 : 19 יקדמני ביום אידי ויהי יהוה משען לי׃
(BHSCO) 2 Samuel 22 : 20 ויצא למרחב אתי יחלצני כי־חפץ בי׃
(BHSCO) 2 Samuel 22 : 21 יגמלני יהוה כצדקתי כבר ידי ישיב לי׃
(BHSCO) 2 Samuel 22 : 22 כי שמרתי דרכי יהוה ולא רשעתי מאלהי׃
(BHSCO) 2 Samuel 22 : 23 כי כל־[כ משפטו] [ק משפטיו] לנגדי וחקתיו לא־אסור ממנה׃
(BHSCO) 2 Samuel 22 : 24 ואהיה תמים לו ואשתמרה מעוני׃
(BHSCO) 2 Samuel 22 : 25 וישב יהוה לי כצדקתי כברי לנגד עיניו׃
(BHSCO) 2 Samuel 22 : 26 עם־חסיד תתחסד עם־גבור תמים תתםם׃
(BHSCO) 2 Samuel 22 : 27 עם־נבר תתבר ועם־עקש תתפל׃
(BHSCO) 2 Samuel 22 : 28 ואת־עם עני תושיע ועיניך על־רמים תשפיל׃
(BHSCO) 2 Samuel 22 : 29 כי־אתה נירי יהוה ויהוה יגיה חשכי׃
(BHSCO) 2 Samuel 22 : 30 כי בכה ארוץ גדוד באלהי אדלג־שור׃
(BHSCO) 2 Samuel 22 : 31 האל תמים דרכו אמרת יהוה צרופה מגן הוא לכל החסים בו׃
(BHSCO) 2 Samuel 22 : 32 כי מי־אל מבלעדי יהוה ומי צור מבלעדי אלהינו׃
(BHSCO) 2 Samuel 22 : 33 האל מעוזי חיל ויתר תמים [כ דרכו] [ק דרכי]׃
(BHSCO) 2 Samuel 22 : 34 משוה [כ רגליו] [ק רגלי] כאילות ועל במותי יעמדני׃
(BHSCO) 2 Samuel 22 : 35 מלמד ידי למלחמה ונחת קשת־נחושה זרעתי׃
(BHSCO) 2 Samuel 22 : 36 ותתן־לי מגן ישעך וענתך תרבני׃
(BHSCO) 2 Samuel 22 : 37 תרחיב צעדי תחתני ולא מעדו קרסלי׃
(BHSCO) 2 Samuel 22 : 38 ארדפה איבי ואשמידם ולא אשוב עד־כלותם׃
(BHSCO) 2 Samuel 22 : 39 ואכלם ואמחצם ולא יקומון ויפלו תחת רגלי׃
(BHSCO) 2 Samuel 22 : 40 ותזרני חיל למלחמה תכריע קמי תחתני׃
(BHSCO) 2 Samuel 22 : 41 ואיבי תתה לי ערף משנאי ואצמיתם׃
(BHSCO) 2 Samuel 22 : 42 ישעו ואין משיע אל־יהוה ולא ענם׃
(BHSCO) 2 Samuel 22 : 43 ואשחקם כעפר־ארץ כטיט־חוצות אדקם ארקעם׃
(BHSCO) 2 Samuel 22 : 44 ותפלטני מריבי עמי תשמרני לראש גוים עם לא־ידעתי יעבדני׃
(BHSCO) 2 Samuel 22 : 45 בני נכר יתכחשו־לי לשמוע אזן ישמעו לי׃
(BHSCO) 2 Samuel 22 : 46 בני נכר יבלו ויחגרו ממסגרותם׃
(BHSCO) 2 Samuel 22 : 47 חי־יהוה וברוך צורי וירם אלהי צור ישעי׃
(BHSCO) 2 Samuel 22 : 48 האל הנתן נקמת לי ומוריד עמים תחתני׃
(BHSCO) 2 Samuel 22 : 49 ומוציאי מאיבי ומקמי תרוממני מאיש חמסים תצילני׃
(BHSCO) 2 Samuel 22 : 50 על־כן אודך יהוה בגוים ולשמך אזמר׃
(BHSCO) 2 Samuel 22 : 51 [כ מגדיל] [ק מגדול] ישועות מלכו ועשה־חסד למשיחו לדוד ולזרעו עד־עולם׃ פ*