(BHSCO) 2 Samuel 5 : 1 ויבאו כל־שבטי ישראל אל־דוד חברונה ויאמרו לאמר הננו עצמך ובשרך אנחנו׃
(BHSCO) 2 Samuel 5 : 2 גם־אתמול גם־שלשום בהיות שאול מלך עלינו אתה [כ הייתה] [ק היית] [כ מוציא] [ק המוציא] [כ והמבי] [ק והמביא] את־ישראל ויאמר יהוה לך אתה תרעה את־עמי את־ישראל ואתה תהיה לנגיד על־ישראל׃
(BHSCO) 2 Samuel 5 : 3 ויבאו כל־זקני ישראל אל־המלך חברונה ויכרת להם המלך דוד ברית בחברון לפני יהוה וימשחו את־דוד למלך על־ישראל׃ ף
(BHSCO) 2 Samuel 5 : 4 בן־שלשים שנה דוד במלכו ארבעים שנה מלך׃
(BHSCO) 2 Samuel 5 : 5 בחברון מלך על־יהודה שבע שנים וששה חדשים ובירושלם מלך שלשים ושלש שנה על כל־ישראל ויהודה׃
(BHSCO) 2 Samuel 5 : 6 וילך המלך ואנשיו ירושלם אל־היבסי יושב הארץ ויאמר לדוד לאמר לא־תבוא הנה כי אם־הסירך העורים והפסחים לאמר לא־יבוא דוד הנה׃
(BHSCO) 2 Samuel 5 : 7 וילכד דוד את מצדת ציון היא עיר דוד׃
(BHSCO) 2 Samuel 5 : 8 ויאמר דוד ביום ההוא כל־מכה יבסי ויגע בצנור ואת־הפסחים ואת־העורים [כ שנאו] [ק שנאי] נפש דוד על־כן יאמרו עור ופסח לא יבוא אל־הבית׃
(BHSCO) 2 Samuel 5 : 9 וישב דוד במצדה ויקרא־לה עיר דוד ויבן דוד סביב מן־המלוא וביתה׃
(BHSCO) 2 Samuel 5 : 10 וילך דוד הלוך וגדול ויהוה אלהי צבאות עמו׃ ף
(BHSCO) 2 Samuel 5 : 11 וישלח חירם מלך־צר מלאכים אל־דוד ועצי ארזים וחרשי עץ וחרשי אבן קיר ויבנו־בית לדוד׃
(BHSCO) 2 Samuel 5 : 12 וידע דוד כי־הכינו יהוה למלך על־ישראל וכי נשא ממלכתו בעבור עמו ישראל׃ ס
(BHSCO) 2 Samuel 5 : 13 ויקח דוד עוד פלגשים ונשים מירושלם אחרי באו מחברון ויולדו עוד לדוד בנים ובנות׃
(BHSCO) 2 Samuel 5 : 14 ואלה שמות הילדים לו בירושלם שמוע ושובב ונתן ושלמה׃
(BHSCO) 2 Samuel 5 : 15 ויבחר ואלישוע ונפג ויפיע׃
(BHSCO) 2 Samuel 5 : 16 ואלישמע ואלידע ואליפלט׃ ף
(BHSCO) 2 Samuel 5 : 17 וישמעו פלשתים כי־משחו את־דוד למלך על־ישראל ויעלו כל־פלשתים לבקש את־דוד וישמע דוד וירד אל־המצודה׃
(BHSCO) 2 Samuel 5 : 18 ופלשתים באו וינטשו בעמק רפאים׃
(BHSCO) 2 Samuel 5 : 19 וישאל דוד ביהוה לאמר האעלה אל־פלשתים התתנם בידי ויאמר יהוה אל־דוד עלה כי־נתן אתן את־הפלשתים בידך׃
(BHSCO) 2 Samuel 5 : 20 ויבא דוד בבעל־פרצים ויכם שם דוד ויאמר פרץ יהוה את־איבי לפני כפרץ מים על־כן קרא שם־המקום ההוא בעל פרצים׃
(BHSCO) 2 Samuel 5 : 21 ויעזבו־שם את־עצביהם וישאם דוד ואנשיו׃ ף
(BHSCO) 2 Samuel 5 : 22 ויספו עוד פלשתים לעלות וינטשו בעמק רפאים׃
(BHSCO) 2 Samuel 5 : 23 וישאל דוד ביהוה ויאמר לא תעלה הסב אל־אחריהם ובאת להם ממול בכאים׃
(BHSCO) 2 Samuel 5 : 24 ויהי [כ בשמעך] [ק כשמעך] את־קול צעדה בראשי הבכאים אז תחרץ כי אז יצא יהוה לפניך להכות במחנה פלשתים׃
(BHSCO) 2 Samuel 5 : 25 ויעש דוד כן כאשר צוהו יהוה ויך את־פלשתים מגבע עד־באך גזר׃ ף