(BHSCO) 2 Samuel 7 : 1 ויהי כי־ישב המלך בביתו ויהוה הניח־לו מסביב מכל־איביו׃
(BHSCO) 2 Samuel 7 : 2 ויאמר המלך אל־נתן הנביא ראה נא אנכי יושב בבית ארזים וארון האלהים ישב בתוך היריעה׃
(BHSCO) 2 Samuel 7 : 3 ויאמר נתן אל־המלך כל אשר בלבבך לך עשה כי יהוה עמך׃ ס
(BHSCO) 2 Samuel 7 : 4 ויהי בלילה ההוא ויהי דבר־יהוה אל־נתן לאמר׃
(BHSCO) 2 Samuel 7 : 5 לך ואמרת אל־עבדי אל־דוד כה אמר יהוה האתה תבנה־לי בית לשבתי׃
(BHSCO) 2 Samuel 7 : 6 כי לא ישבתי בבית למיום העלתי את־בני ישראל ממצרים ועד היום הזה ואהיה מתהלך באהל ובמשכן׃
(BHSCO) 2 Samuel 7 : 7 בכל אשר־התהלכתי בכל־בני ישראל הדבר דברתי את־אחד שבטי ישראל אשר צויתי לרעות את־עמי את־ישראל לאמר למה לא־בניתם לי בית ארזים׃
(BHSCO) 2 Samuel 7 : 8 ועתה כה־תאמר לעבדי לדוד כה אמר יהוה צבאות אני לקחתיך מן־הנוה מאחר הצאן להיות נגיד על־עמי על־ישראל׃
(BHSCO) 2 Samuel 7 : 9 ואהיה עמך בכל אשר הלכת ואכרתה את־כל־איביך מפניך ועשתי לך שם גדול כשם הגדלים אשר בארץ׃
(BHSCO) 2 Samuel 7 : 10 ושמתי מקום לעמי לישראל ונטעתיו ושכן תחתיו ולא ירגז עוד ולא־יסיפו בני־עולה לענותו כאשר בראשונה׃
(BHSCO) 2 Samuel 7 : 11 ולמן־היום אשר צויתי שפטים על־עמי ישראל והניחתי לך מכל־איביך והגיד לך יהוה כי־בית יעשה־לך יהוה׃
(BHSCO) 2 Samuel 7 : 12 כי ימלאו ימיך ושכבת את־אבתיך והקימתי את־זרעך אחריך אשר יצא ממעיך והכינתי את־ממלכתו׃
(BHSCO) 2 Samuel 7 : 13 הוא יבנה־בית לשמי וכננתי את־כסא ממלכתו עד־עולם׃
(BHSCO) 2 Samuel 7 : 14 אני אהיה־לו לאב והוא יהיה־לי לבן אשר בהעותו והכחתיו בשבט אנשים ובנגעי בני אדם׃
(BHSCO) 2 Samuel 7 : 15 וחסדי לא־יסור ממנו כאשר הסרתי מעם שאול אשר הסרתי מלפניך׃
(BHSCO) 2 Samuel 7 : 16 ונאמן ביתך וממלכתך עד־עולם לפניך כסאך יהיה נכון עד־עולם׃
(BHSCO) 2 Samuel 7 : 17 ככל הדברים האלה וככל החזיון הזה כן דבר נתן אל־דוד׃ ס
(BHSCO) 2 Samuel 7 : 18 ויבא המלך דוד וישב לפני יהוה ויאמר מי אנכי אדני יהוה ומי ביתי כי הביאתני עד־הלם׃
(BHSCO) 2 Samuel 7 : 19 ותקטן עוד זאת בעיניך אדני יהוה ותדבר גם אל־בית־עבדך למרחוק וזאת תורת האדם אדני יהוה׃
(BHSCO) 2 Samuel 7 : 20 ומה־יוסיף דוד עוד לדבר אליך ואתה ידעת את־עבדך אדני יהוה׃
(BHSCO) 2 Samuel 7 : 21 בעבור דברך וכלבך עשית את כל־הגדולה הזאת להודיע את־עבדך׃
(BHSCO) 2 Samuel 7 : 22 על־כן גדלת אדני יהוה כי־אין כמוך ואין אלהים זולתך בכל אשר־שמענו באזנינו׃
(BHSCO) 2 Samuel 7 : 23 ומי כעמך כישראל גוי אחד בארץ אשר הלכו־אלהים לפדות־לו לעם ולשום לו שם ולעשות לכם הגדולה ונראות לארצך מפני עמך אשר פדית לך ממצרים גוים ואלהיו׃
(BHSCO) 2 Samuel 7 : 24 ותכוןן לך את־עמך ישראל לך לעם עד־עולם ואתה יהוה היית להם לאלהים׃ ס
(BHSCO) 2 Samuel 7 : 25 ועתה יהוה אלהים הדבר אשר דברת על־עבדך ועל־ביתו הקם עד־עולם ועשה כאשר דברת׃
(BHSCO) 2 Samuel 7 : 26 ויגדל שמך עד־עולם לאמר יהוה צבאות אלהים על־ישראל ובית עבדך דוד יהיה נכון לפניך׃
(BHSCO) 2 Samuel 7 : 27 כי־אתה יהוה צבאות אלהי ישראל גליתה את־אזן עבדך לאמר בית אבנה־לך על־כן מצא עבדך את־לבו להתפלל אליך את־התפלה הזאת׃
(BHSCO) 2 Samuel 7 : 28 ועתה אדני יהוה אתה־הוא האלהים ודבריך יהיו אמת ותדבר אל־עבדך את־הטובה הזאת׃
(BHSCO) 2 Samuel 7 : 29 ועתה הואל וברך את־בית עבדך להיות לעולם לפניך כי־אתה אדני יהוה דברת ומברכתך יברך בית־עבדך לעולם׃ ף