(BHSCO) Amos 5 : 1 שמעו את־הדבר הזה אשר אנכי נשא עליכם קינה בית ישראל׃
(BHSCO) Amos 5 : 2 נפלה לא־תוסיף קום בתולת ישראל נטשה על־אדמתה אין מקימה׃
(BHSCO) Amos 5 : 3 כי כה אמר אדני יהוה העיר היצאת אלף תשאיר מאה והיוצאת מאה תשאיר עשרה לבית ישראל׃ ס
(BHSCO) Amos 5 : 4 כי כה אמר יהוה לבית ישראל דרשוני וחיו׃
(BHSCO) Amos 5 : 5 ואל־תדרשו בית־אל והגלגל לא תבאו ובאר שבע לא תעברו כי הגלגל גלה יגלה ובית־אל יהיה לאון׃
(BHSCO) Amos 5 : 6 דרשו את־יהוה וחיו פן־יצלח כאש בית יוסף ואכלה ואין־מכבה לבית־אל׃
(BHSCO) Amos 5 : 7 ההפכים ללענה משפט וצדקה לארץ הניחו׃
(BHSCO) Amos 5 : 8 עשה כימה וכסיל והפך לבקר צלמות ויום לילה החשיך הקורא למי־הים וישפכם על־פני הארץ יהוה שמו׃ ס
(BHSCO) Amos 5 : 9 המבליג שד על־עז ושד על־מבצר יבוא׃
(BHSCO) Amos 5 : 10 שנאו בשער מוכיח ודבר תמים יתעבו׃
(BHSCO) Amos 5 : 11 לכן יען בושסכם על־דל ומשאת־בר תקחו ממנו בתי גזית בניתם ולא־תשבו בם כרמי־חמד נטעתם ולא תשתו את־יינם׃
(BHSCO) Amos 5 : 12 כי ידעתי רבים פשעיכם ועצמים חטאתיכם צררי צדיק לקחי כפר ואביונים בשער הטו׃
(BHSCO) Amos 5 : 13 לכן המשכיל בעת ההיא ידם כי עת רעה היא׃
(BHSCO) Amos 5 : 14 דרשו־טוב ואל־רע למען תחיו ויהי־כן יהוה אלהי־צבאות אתכם כאשר אמרתם׃
(BHSCO) Amos 5 : 15 שנאו־רע ואהבו טוב והציגו בשער משפט אולי יחןן יהוה אלהי־צבאות שארית יוסף׃ ס
(BHSCO) Amos 5 : 16 לכן כה־אמר יהוה אלהי צבאות אדני בכל־רחבות מספד ובכל־חוצות יאמרו הו־הו וקראו אכר אל־אבל ומספד אל־יודעי נהי׃
(BHSCO) Amos 5 : 17 ובכל־כרמים מספד כי־אעבר בקרבך אמר יהוה׃ ס
(BHSCO) Amos 5 : 18 הוי המתאוים את־יום יהוה למה־זה לכם יום יהוה הוא־חשך ולא־אור׃
(BHSCO) Amos 5 : 19 כאשר ינוס איש מפני הארי ופגעו הדב ובא הבית וסמך ידו על־הקיר ונשכו הנחש׃
(BHSCO) Amos 5 : 20 הלא־חשך יום יהוה ולא־אור ואפל ולא־נגה לו׃
(BHSCO) Amos 5 : 21 שנאתי מאסתי חגיכם ולא אריח בעצרתיכם׃
(BHSCO) Amos 5 : 22 כי אם־תעלו־לי עלות ומנחתיכם לא ארצה ושלם מריאיכם לא אביט׃
(BHSCO) Amos 5 : 23 הסר מעלי המון שריך וזמרת נבליך לא אשמע׃
(BHSCO) Amos 5 : 24 ויגל כמים משפט וצדקה כנחל איתן׃
(BHSCO) Amos 5 : 25 הזבחים ומנחה הגשתם־לי במדבר ארבעים שנה בית ישראל׃
(BHSCO) Amos 5 : 26 ונשאתם את סכות מלככם ואת כיון צלמיכם כוכב אלהיכם אשר עשיתם לכם׃
(BHSCO) Amos 5 : 27 והגליתי אתכם מהלאה לדמשק אמר יהוה אלהי־צבאות שמו׃ ף