(BHSCO) Deuteronomy 18 : 1 לא־יהיה לכהנים הלוים כל־שבט לוי חלק ונחלה עם־ישראל אשי יהוה ונחלתו יאכלון׃
(BHSCO) Deuteronomy 18 : 2 ונחלה לא־יהיה־לו בקרב אחיו יהוה הוא נחלתו כאשר דבר־לו׃ ס
(BHSCO) Deuteronomy 18 : 3 וזה יהיה משפט הכהנים מאת העם מאת זבחי הזבח אם־שור אם־שה ונתן לכהן הזרע והלחיים והקבה׃
(BHSCO) Deuteronomy 18 : 4 ראשית דגנך תירשך ויצהרך וראשית גז צאנך תתן־לו׃
(BHSCO) Deuteronomy 18 : 5 כי בו בחר יהוה אלהיך מכל־שבטיך לעמד לשרת בשם־יהוה הוא ובניו כל־הימים׃ ס
(BHSCO) Deuteronomy 18 : 6 וכי־יבא הלוי מאחד שעריך מכל־ישראל אשר־הוא גר שם ובא בכל־אות נפשו אל־המקום אשר־יבחר יהוה׃
(BHSCO) Deuteronomy 18 : 7 ושרת בשם יהוה אלהיו ככל־אחיו הלוים העמדים שם לפני יהוה׃
(BHSCO) Deuteronomy 18 : 8 חלק כחלק יאכלו לבד ממכריו על־האבות׃ ס
(BHSCO) Deuteronomy 18 : 9 כי אתה בא אל־הארץ אשר־יהוה אלהיך נתן לך לא־תלמד לעשות כתועבת הגוים ההם׃
(BHSCO) Deuteronomy 18 : 10 לא־ימצא בך מעביר בנו־ובתו באש קסם קסמים מעוןן ומנחש ומכשף׃
(BHSCO) Deuteronomy 18 : 11 וחבר חבר ושאל אוב וידעני ודרש אל־המתים׃
(BHSCO) Deuteronomy 18 : 12 כי־תועבת יהוה כל־עשה אלה ובגלל התועבת האלה יהוה אלהיך מוריש אותם מפניך׃
(BHSCO) Deuteronomy 18 : 13 תמים תהיה עם יהוה אלהיך׃ ס
(BHSCO) Deuteronomy 18 : 14 כי הגוים האלה אשר אתה יורש אותם אל־מעננים ואל־קסמים ישמעו ואתה לא כן נתן לך יהוה אלהיך׃
(BHSCO) Deuteronomy 18 : 15 נביא מקרבך מאחיך כמני יקים לך יהוה אלהיך אליו תשמעון׃
(BHSCO) Deuteronomy 18 : 16 ככל אשר־שאלת מעם יהוה אלהיך בחרב ביום הקהל לאמר לא אסף לשמע את־קול יהוה אלהי ואת־האש הגדלה הזאת לא־אראה עוד ולא אמות׃
(BHSCO) Deuteronomy 18 : 17 ויאמר יהוה אלי היטיבו אשר דברו׃
(BHSCO) Deuteronomy 18 : 18 נביא אקים להם מקרב אחיהם כמוך ונתתי דברי בפיו ודבר אליהם את כל־אשר אצונו׃
(BHSCO) Deuteronomy 18 : 19 והיה האיש אשר לא־ישמע אל־דברי אשר ידבר בשמי אנכי אדרש מעמו׃
(BHSCO) Deuteronomy 18 : 20 אך הנביא אשר יזיד לדבר דבר בשמי את אשר לא־צויתיו לדבר ואשר ידבר בשם אלהים אחרים ומת הנביא ההוא׃
(BHSCO) Deuteronomy 18 : 21 וכי תאמר בלבבך איכה נדע את־הדבר אשר לא־דברו יהוה׃
(BHSCO) Deuteronomy 18 : 22 אשר ידבר הנביא בשם יהוה ולא־יהיה הדבר ולא יבוא הוא הדבר אשר לא־דברו יהוה בזדון דברו הנביא לא תגור ממנו׃ ס