(BHSCO) Deuteronomy 24 : 1 כי־יקח איש אשה ובעלה והיה אם־לא תמצא־חן בעיניו כי־מצא בה ערות דבר וכתב לה ספר כריתת ונתן בידה ושלחה מביתו׃
(BHSCO) Deuteronomy 24 : 2 ויצאה מביתו והלכה והיתה לאיש־אחר׃
(BHSCO) Deuteronomy 24 : 3 ושנאה האיש האחרון וכתב לה ספר כריתת ונתן בידה ושלחה מביתו או כי ימות האיש האחרון אשר־לקחה לו לאשה׃
(BHSCO) Deuteronomy 24 : 4 לא־יוכל בעלה הראשון אשר־שלחה לשוב לקחתה להיות לו לאשה אחרי אשר הטמאה כי־תועבה הוא לפני יהוה ולא תחטיא את־הארץ אשר יהוה אלהיך נתן לך נחלה׃ ס
(BHSCO) Deuteronomy 24 : 5 כי־יקח איש אשה חדשה לא יצא בצבא ולא־יעבר עליו לכל־דבר נקי יהיה לביתו שנה אחת ושמח את־אשתו אשר־לקח׃ ס
(BHSCO) Deuteronomy 24 : 6 לא־יחבל רחים ורכב כי־נפש הוא חבל׃ ס
(BHSCO) Deuteronomy 24 : 7 כי־ימצא איש גנב נפש מאחיו מבני ישראל והתעמר־בו ומכרו ומת הגנב ההוא ובערת הרע מקרבך׃
(BHSCO) Deuteronomy 24 : 8 השמר בנגע־הצרעת לשמר מאד ולעשות ככל אשר־יורו אתכם הכהנים הלוים כאשר צויתם תשמרו לעשות׃ ס
(BHSCO) Deuteronomy 24 : 9 זכור את אשר־עשה יהוה אלהיך למרים בדרך בצאתכם ממצרים׃ ס
(BHSCO) Deuteronomy 24 : 10 כי־תשה ברעך משאת מאומה לא־תבא אל־ביתו לעבט עבטו׃
(BHSCO) Deuteronomy 24 : 11 בחוץ תעמד והאיש אשר אתה נשה בו יוציא אליך את־העבוט החוצה׃
(BHSCO) Deuteronomy 24 : 12 ואם־איש עני הוא לא תשכב בעבטו׃
(BHSCO) Deuteronomy 24 : 13 השב תשיב לו את־העבוט כבא השמש ושכב בשלמתו וברךך ולך תהיה צדקה לפני יהוה אלהיך׃ ס
(BHSCO) Deuteronomy 24 : 14 לא־תעשק שכיר עני ואביון מאחיך או מגרך אשר בארצך בשעריך׃
(BHSCO) Deuteronomy 24 : 15 ביומו תתן שכרו ולא־תבוא עליו השמש כי עני הוא ואליו הוא נשא את־נפשו ולא־יקרא עליך אל־יהוה והיה בך חטא׃ ס
(BHSCO) Deuteronomy 24 : 16 לא־יומתו אבות על־בנים ובנים לא־יומתו על־אבות איש בחטאו יומתו׃ ס
(BHSCO) Deuteronomy 24 : 17 לא תטה משפט גר יתום ולא תחבל בגד אלמנה׃
(BHSCO) Deuteronomy 24 : 18 וזכרת כי עבד היית במצרים ויפדך יהוה אלהיך משם על־כן אנכי מצוך לעשות את־הדבר הזה׃ ס
(BHSCO) Deuteronomy 24 : 19 כי תקצר קצירך בשדך ושכחת עמר בשדה לא תשוב לקחתו לגר ליתום ולאלמנה יהיה למען יברךך יהוה אלהיך בכל מעשה ידיך׃
(BHSCO) Deuteronomy 24 : 20 כי תחבט זיתך לא תפאר אחריך לגר ליתום ולאלמנה יהיה׃ ס
(BHSCO) Deuteronomy 24 : 21 כי תבצר כרמך לא תעולל אחריך לגר ליתום ולאלמנה יהיה׃
(BHSCO) Deuteronomy 24 : 22 וזכרת כי־עבד היית בארץ מצרים על־כן אנכי מצוך לעשות את־הדבר הזה׃ ס