(BHSCO) Deuteronomy 3 : 1 ונפן ונעל דרך הבשן ויצא עוג מלך־הבשן לקראתנו הוא וכל־עמו למלחמה אדרעי׃
(BHSCO) Deuteronomy 3 : 2 ויאמר יהוה אלי אל־תירא אתו כי בידך נתתי אתו ואת־כל־עמו ואת־ארצו ועשית לו כאשר עשית לסיחן מלך האמרי אשר יושב בחשבון׃
(BHSCO) Deuteronomy 3 : 3 ויתן יהוה אלהינו בידנו גם את־עוג מלך־הבשן ואת־כל־עמו ונכהו עד־בלתי השאיר־לו שריד׃
(BHSCO) Deuteronomy 3 : 4 ונלכד את־כל־עריו בעת ההוא לא היתה קריה אשר לא־לקחנו מאתם ששים עיר כל־חבל ארגב ממלכת עוג בבשן׃
(BHSCO) Deuteronomy 3 : 5 כל־אלה ערים בצרות חומה גבהה דלתים ובריח לבד מערי הפרזי הרבה מאד׃
(BHSCO) Deuteronomy 3 : 6 ונחרם אותם כאשר עשינו לסיחן מלך חשבון החרם כל־עיר מתם הנשים והטף׃
(BHSCO) Deuteronomy 3 : 7 וכל־הבהמה ושלל הערים בזונו לנו׃
(BHSCO) Deuteronomy 3 : 8 ונקח בעת ההוא את־הארץ מיד שני מלכי האמרי אשר בעבר הירדן מנחל ארןן עד־הר חרמון׃
(BHSCO) Deuteronomy 3 : 9 צידנים יקראו לחרמון שרין והאמרי יקראו־לו שניר׃
(BHSCO) Deuteronomy 3 : 10 כל ערי המישר וכל־הגלעד וכל־הבשן עד־סלכה ואדרעי ערי ממלכת עוג בבשן׃
(BHSCO) Deuteronomy 3 : 11 כי רק־עוג מלך הבשן נשאר מיתר הרפאים הנה ערשו ערש ברזל הלה הוא ברבת בני עמון תשע אמות ארכה וארבע אמות רחבה באמת־איש׃
(BHSCO) Deuteronomy 3 : 12 ואת־הארץ הזאת ירשנו בעת ההוא מערער אשר־על־נחל ארןן וחצי הר־הגלעד ועריו נתתי לראובני ולגדי׃
(BHSCO) Deuteronomy 3 : 13 ויתר הגלעד וכל־הבשן ממלכת עוג נתתי לחצי שבט המנשה כל חבל הארגב לכל־הבשן ההוא יקרא ארץ רפאים׃
(BHSCO) Deuteronomy 3 : 14 יאיר בן־מנשה לקח את־כל־חבל ארגב עד־גבול הגשורי והמעכתי ויקרא אתם על־שמו את־הבשן חות יאיר עד היום הזה׃
(BHSCO) Deuteronomy 3 : 15 ולמכיר נתתי את־הגלעד׃
(BHSCO) Deuteronomy 3 : 16 ולראובני ולגדי נתתי מן־הגלעד ועד־נחל ארןן תוך הנחל וגבל ועד יבק הנחל גבול בני עמון׃
(BHSCO) Deuteronomy 3 : 17 והערבה והירדן וגבל מכנרת ועד ים הערבה ים המלח תחת אשדת הפסגה מזרחה׃
(BHSCO) Deuteronomy 3 : 18 ואצו אתכם בעת ההוא לאמר יהוה אלהיכם נתן לכם את־הארץ הזאת לרשתה חלוצים תעברו לפני אחיכם בני־ישראל כל־בני־חיל׃
(BHSCO) Deuteronomy 3 : 19 רק נשיכם וטפכם ומקנכם ידעתי כי־מקנה רב לכם ישבו בעריכם אשר נתתי לכם׃
(BHSCO) Deuteronomy 3 : 20 עד אשר־יניח יהוה לאחיכם ככם וירשו גם־הם את־הארץ אשר יהוה אלהיכם נתן להם בעבר הירדן ושבתם איש לירשתו אשר נתתי לכם׃
(BHSCO) Deuteronomy 3 : 21 ואת־יהושוע צויתי בעת ההוא לאמר עיניך הראת את כל־אשר עשה יהוה אלהיכם לשני המלכים האלה כן־יעשה יהוה לכל־הממלכות אשר אתה עבר שמה׃
(BHSCO) Deuteronomy 3 : 22 לא תיראום כי יהוה אלהיכם הוא הנלחם לכם׃ ס
(BHSCO) Deuteronomy 3 : 23 ואתחןן אל־יהוה בעת ההוא לאמר׃
(BHSCO) Deuteronomy 3 : 24 אדני יהוה אתה החלות להראות את־עבדך את־גדלך ואת־ידך החזקה אשר מי־אל בשמים ובארץ אשר־יעשה כמעשיך וכגבורתך׃
(BHSCO) Deuteronomy 3 : 25 אעברה־נא ואראה את־הארץ הטובה אשר בעבר הירדן ההר הטוב הזה והלבנון׃
(BHSCO) Deuteronomy 3 : 26 ויתעבר יהוה בי למענכם ולא שמע אלי ויאמר יהוה אלי רב־לך אל־תוסף דבר אלי עוד בדבר הזה׃
(BHSCO) Deuteronomy 3 : 27 עלה ראש הפסגה ושא עיניך ימה וצפנה ותימנה ומזרחה וראה בעיניך כי־לא תעבר את־הירדן הזה׃
(BHSCO) Deuteronomy 3 : 28 וצו את־יהושע וחזקהו ואמצהו כי־הוא יעבר לפני העם הזה והוא ינחיל אותם את־הארץ אשר תראה׃
(BHSCO) Deuteronomy 3 : 29 ונשב בגיא מול בית פעור׃ ף