(BHSCO) Deuteronomy 5 : 1 ויקרא משה אל־כל־ישראל ויאמר אלהם שמע ישראל את־החקים ואת־המשפטים אשר אנכי דבר באזניכם היום ולמדתם אתם ושמרתם לעשתם׃
(BHSCO) Deuteronomy 5 : 2 יהוה אלהינו כרת עמנו ברית בחרב׃
(BHSCO) Deuteronomy 5 : 3 לא את־אבתינו כרת יהוה את־הברית הזאת כי אתנו אנחנו אלה פה היום כלנו חיים׃
(BHSCO) Deuteronomy 5 : 4 פנים בפנים דבר יהוה עםכם בהר מתוך האש׃
(BHSCO) Deuteronomy 5 : 5 אנכי עמד בין־יהוה וביניכם בעת ההוא להגיד לכם את־דבר יהוה כי יראתם מפני האש ולא־עליתם בהר לאמר׃ ס
(BHSCO) Deuteronomy 5 : 6 אנכי יהוה אלהיך אשר הוצאתיך מארץ מצרים מבית עבדים׃
(BHSCO) Deuteronomy 5 : 7 לא יהיה־לך אלהים אחרים על־פני׃
(BHSCO) Deuteronomy 5 : 8 לא־תעשה־לך פסל כל־תמונה אשר בשמים ממעל ואשר בארץ מתחת ואשר במים מתחת לארץ׃
(BHSCO) Deuteronomy 5 : 9 לא־תשתחוה להם ולא תעבדם כי אנכי יהוה אלהיך אל קנא פקד עון אבות על־בנים ועל־שלשים ועל־רבעים לשנאי׃
(BHSCO) Deuteronomy 5 : 10 ועשה חסד לאלפים לאהבי ולשמרי [כ מצותו] [ק מצותי]׃ ס
(BHSCO) Deuteronomy 5 : 11 לא תשא את־שם־יהוה אלהיך לשוא כי לא ינקה יהוה את אשר־ישא את־שמו לשוא׃ ס
(BHSCO) Deuteronomy 5 : 12 שמור את־יום השבת לקדשו כאשר צוך יהוה אלהיך׃
(BHSCO) Deuteronomy 5 : 13 ששת ימים תעבד ועשית כל־מלאכתך׃
(BHSCO) Deuteronomy 5 : 14 ויום השביעי שבת ליהוה אלהיך לא תעשה כל־מלאכה אתה ובנך־ובתך ועבדך־ואמתך ושורך וחמרך וכל־בהמתך וגרך אשר בשעריך למען ינוח עבדך ואמתך כמוך׃
(BHSCO) Deuteronomy 5 : 15 וזכרת כי־עבד היית בארץ מצרים ויצאך יהוה אלהיך משם ביד חזקה ובזרע נטויה על־כן צוך יהוה אלהיך לעשות את־יום השבת׃ ס
(BHSCO) Deuteronomy 5 : 16 כבד את־אביך ואת־אמך כאשר צוך יהוה אלהיך למען יאריכן ימיך ולמען ייטב לך על האדמה אשר־יהוה אלהיך נתן לך׃ ס
(BHSCO) Deuteronomy 5 : 17 לא תרצח׃ ס
(BHSCO) Deuteronomy 5 : 18 ולא תנאף׃ ס
(BHSCO) Deuteronomy 5 : 19 ולא תגנב׃ ס
(BHSCO) Deuteronomy 5 : 20 ולא־תענה ברעך עד שוא׃ ס
(BHSCO) Deuteronomy 5 : 21 ולא תחמד אשת רעך ס ולא תתאוה בית רעך שדהו ועבדו ואמתו שורו וחמרו וכל אשר לרעך׃ ס
(BHSCO) Deuteronomy 5 : 22 את־הדברים האלה דבר יהוה אל־כל־קהלכם בהר מתוך האש העןן והערפל קול גדול ולא יסף ויכתבם על־שני לחת אבנים ויתנם אלי׃
(BHSCO) Deuteronomy 5 : 23 ויהי כשמעכם את־הקול מתוך החשך וההר בער באש ותקרבון אלי כל־ראשי שבטיכם וזקניכם׃
(BHSCO) Deuteronomy 5 : 24 ותאמרו הן הראנו יהוה אלהינו את־כבדו ואת־גדלו ואת־קלו שמענו מתוך האש היום הזה ראינו כי־ידבר אלהים את־האדם וחי׃
(BHSCO) Deuteronomy 5 : 25 ועתה למה נמות כי תאכלנו האש הגדלה הזאת אם־יספים אנחנו לשמע את־קול יהוה אלהינו עוד ומתנו׃
(BHSCO) Deuteronomy 5 : 26 כי מי כל־בשר אשר שמע קול אלהים חיים מדבר מתוך־האש כמנו ויחי׃
(BHSCO) Deuteronomy 5 : 27 קרב אתה ושמע את כל־אשר יאמר יהוה אלהינו ואת תדבר אלינו את כל־אשר ידבר יהוה אלהינו אליך ושמענו ועשינו׃
(BHSCO) Deuteronomy 5 : 28 וישמע יהוה את־קול דבריכם בדברכם אלי ויאמר יהוה אלי שמעתי את־קול דברי העם הזה אשר דברו אליך היטיבו כל־אשר דברו׃
(BHSCO) Deuteronomy 5 : 29 מי־יתן והיה לבבם זה להם ליראה אתי ולשמר את־כל־מצותי כל־הימים למען ייטב להם ולבניהם לעלם׃
(BHSCO) Deuteronomy 5 : 30 לך אמר להם שובו לכם לאהליכם׃
(BHSCO) Deuteronomy 5 : 31 ואתה פה עמד עמדי ואדברה אליך את כל־המצוה והחקים והמשפטים אשר תלמדם ועשו בארץ אשר אנכי נתן להם לרשתה׃
(BHSCO) Deuteronomy 5 : 32 ושמרתם לעשות כאשר צוה יהוה אלהיכם אתכם לא תסרו ימין ושמאל׃
(BHSCO) Deuteronomy 5 : 33 בכל־הדרך אשר צוה יהוה אלהיכם אתכם תלכו למען תחיון וטוב לכם והארכתם ימים בארץ אשר תירשון׃