(BHSCO) Exodus 17 : 1 ויסעו כל־עדת בני־ישראל ממדבר־סין למסעיהם על־פי יהוה ויחנו ברפידים ואין מים לשתת העם׃
(BHSCO) Exodus 17 : 2 וירב העם עם־משה ויאמרו תנו־לנו מים ונשתה ויאמר להם משה מה־תריבון עמדי מה־תנסון את־יהוה׃
(BHSCO) Exodus 17 : 3 ויצמא שם העם למים וילן העם על־משה ויאמר למה זה העליתנו ממצרים להמית אתי ואת־בני ואת־מקני בצמא׃
(BHSCO) Exodus 17 : 4 ויצעק משה אל־יהוה לאמר מה אעשה לעם הזה עוד מעט וסקלני׃
(BHSCO) Exodus 17 : 5 ויאמר יהוה אל־משה עבר לפני העם וקח אתך מזקני ישראל ומטך אשר הכית בו את־היאר קח בידך והלכת׃
(BHSCO) Exodus 17 : 6 הנני עמד לפניך שם על־הצור בחרב והכית בצור ויצאו ממנו מים ושתה העם ויעש כן משה לעיני זקני ישראל׃
(BHSCO) Exodus 17 : 7 ויקרא שם המקום מסה ומריבה על־ריב בני ישראל ועל נסתם את־יהוה לאמר היש יהוה בקרבנו אם־אין׃ ף
(BHSCO) Exodus 17 : 8 ויבא עמלק וילחם עם־ישראל ברפידם׃
(BHSCO) Exodus 17 : 9 ויאמר משה אל־יהושע בחר־לנו אנשים וצא הלחם בעמלק מחר אנכי נצב על־ראש הגבעה ומטה האלהים בידי׃
(BHSCO) Exodus 17 : 10 ויעש יהושע כאשר אמר־לו משה להלחם בעמלק ומשה אהרן וחור עלו ראש הגבעה׃
(BHSCO) Exodus 17 : 11 והיה כאשר ירים משה ידו וגבר ישראל וכאשר יניח ידו וגבר עמלק׃
(BHSCO) Exodus 17 : 12 וידי משה כבדים ויקחו־אבן וישימו תחתיו וישב עליה ואהרן וחור תמכו בידיו מזה אחד ומזה אחד ויהי ידיו אמונה עד־בא השמש׃
(BHSCO) Exodus 17 : 13 ויחלש יהושע את־עמלק ואת־עמו לפי־חרב׃ ף
(BHSCO) Exodus 17 : 14 ויאמר יהוה אל־משה כתב זאת זכרון בספר ושים באזני יהושע כי־מחה אמחה את־זכר עמלק מתחת השמים׃
(BHSCO) Exodus 17 : 15 ויבן משה מזבח ויקרא שמו יהוה נסי׃
(BHSCO) Exodus 17 : 16 ויאמר כי־יד על־כס יה מלחמה ליהוה בעמלק מדר דר׃ ף