(BHSCO) Exodus 18 : 1 וישמע יתרו כהן מדין חתן משה את כל־אשר עשה אלהים למשה ולישראל עמו כי־הוציא יהוה את־ישראל ממצרים׃
(BHSCO) Exodus 18 : 2 ויקח יתרו חתן משה את־צפרה אשת משה אחר שלוחיה׃
(BHSCO) Exodus 18 : 3 ואת שני בניה אשר שם האחד גרשם כי אמר גר הייתי בארץ נכריה׃
(BHSCO) Exodus 18 : 4 ושם האחד אליעזר כי־אלהי אבי בעזרי ויצלני מחרב פרעה׃
(BHSCO) Exodus 18 : 5 ויבא יתרו חתן משה ובניו ואשתו אל־משה אל־המדבר אשר־הוא חנה שם הר האלהים׃
(BHSCO) Exodus 18 : 6 ויאמר אל־משה אני חתנך יתרו בא אליך ואשתך ושני בניה עמה׃
(BHSCO) Exodus 18 : 7 ויצא משה לקראת חתנו וישתחו וישק־לו וישאלו איש־לרעהו לשלום ויבאו האהלה׃
(BHSCO) Exodus 18 : 8 ויספר משה לחתנו את כל־אשר עשה יהוה לפרעה ולמצרים על אודת ישראל את כל־התלאה אשר מצאתם בדרך ויצלם יהוה׃
(BHSCO) Exodus 18 : 9 ויחד יתרו על כל־הטובה אשר־עשה יהוה לישראל אשר הצילו מיד מצרים׃
(BHSCO) Exodus 18 : 10 ויאמר יתרו ברוך יהוה אשר הציל אתכם מיד מצרים ומיד פרעה אשר הציל את־העם מתחת יד־מצרים׃
(BHSCO) Exodus 18 : 11 עתה ידעתי כי־גדול יהוה מכל־האלהים כי בדבר אשר זדו עליהם׃
(BHSCO) Exodus 18 : 12 ויקח יתרו חתן משה עלה וזבחים לאלהים ויבא אהרן וכל זקני ישראל לאכל־לחם עם־חתן משה לפני האלהים׃
(BHSCO) Exodus 18 : 13 ויהי ממחרת וישב משה לשפט את־העם ויעמד העם על־משה מן־הבקר עד־הערב׃
(BHSCO) Exodus 18 : 14 וירא חתן משה את כל־אשר־הוא עשה לעם ויאמר מה־הדבר הזה אשר אתה עשה לעם מדוע אתה יושב לבדך וכל־העם נצב עליך מן־בקר עד־ערב׃
(BHSCO) Exodus 18 : 15 ויאמר משה לחתנו כי־יבא אלי העם לדרש אלהים׃
(BHSCO) Exodus 18 : 16 כי־יהיה להם דבר בא אלי ושפטתי בין איש ובין רעהו והודעתי את־חקי האלהים ואת־תורתיו׃
(BHSCO) Exodus 18 : 17 ויאמר חתן משה אליו לא־טוב הדבר אשר אתה עשה׃
(BHSCO) Exodus 18 : 18 נבל תבל גם־אתה גם־העם הזה אשר עמך כי־כבד ממך הדבר לא־תוכל עשהו לבדך׃
(BHSCO) Exodus 18 : 19 עתה שמע בקלי איעצך ויהי אלהים עמך היה אתה לעם מול האלהים והבאת אתה את־הדברים אל־האלהים׃
(BHSCO) Exodus 18 : 20 והזהרתה אתהם את־החקים ואת־התורת והודעת להם את־הדרך ילכו בה ואת־המעשה אשר יעשון׃
(BHSCO) Exodus 18 : 21 ואתה תחזה מכל־העם אנשי־חיל יראי אלהים אנשי אמת שנאי בצע ושמת עלהם שרי אלפים שרי מאות שרי חמשים ושרי עשרת׃
(BHSCO) Exodus 18 : 22 ושפטו את־העם בכל־עת והיה כל־הדבר הגדל יביאו אליך וכל־הדבר הקטן ישפטו־הם והקל מעליך ונשאו אתך׃
(BHSCO) Exodus 18 : 23 אם את־הדבר הזה תעשה וצוך אלהים ויכלת עמד וגם כל־העם הזה על־מקמו יבא בשלום׃
(BHSCO) Exodus 18 : 24 וישמע משה לקול חתנו ויעש כל אשר אמר׃
(BHSCO) Exodus 18 : 25 ויבחר משה אנשי־חיל מכל־ישראל ויתן אתם ראשים על־העם שרי אלפים שרי מאות שרי חמשים ושרי עשרת׃
(BHSCO) Exodus 18 : 26 ושפטו את־העם בכל־עת את־הדבר הקשה יביאון אל־משה וכל־הדבר הקטן ישפוטו הם׃
(BHSCO) Exodus 18 : 27 וישלח משה את־חתנו וילך לו אל־ארצו׃ ף