(BHSCO) Exodus 39 : 1 ומן־התכלת והארגמן ותולעת השני עשו בגדי־שרד לשרת בקדש ויעשו את־בגדי הקדש אשר לאהרן כאשר צוה יהוה את־משה׃ ף
(BHSCO) Exodus 39 : 2 ויעש את־האפד זהב תכלת וארגמן ותולעת שני ושש משזר׃
(BHSCO) Exodus 39 : 3 וירקעו את־פחי הזהב וקץץ פתילם לעשות בתוך התכלת ובתוך הארגמן ובתוך תולעת השני ובתוך השש מעשה חשב׃
(BHSCO) Exodus 39 : 4 כתפת עשו־לו חברת על־שני [כ קצוותו] [ק קצותיו] חבר׃
(BHSCO) Exodus 39 : 5 וחשב אפדתו אשר עליו ממנו הוא כמעשהו זהב תכלת וארגמן ותולעת שני ושש משזר כאשר צוה יהוה את־משה׃
(BHSCO) Exodus 39 : 6 ויעשו את־אבני השהם מסבת משבצת זהב מפתחת פתוחי חותם על־שמות בני ישראל׃
(BHSCO) Exodus 39 : 7 וישם אתם על כתפת האפד אבני זכרון לבני ישראל כאשר צוה יהוה את־משה׃ ף
(BHSCO) Exodus 39 : 8 ויעש את־החשן מעשה חשב כמעשה אפד זהב תכלת וארגמן ותולעת שני ושש משזר׃
(BHSCO) Exodus 39 : 9 רבוע היה כפול עשו את־החשן זרת ארכו וזרת רחבו כפול׃
(BHSCO) Exodus 39 : 10 וימלאו־בו ארבעה טורי אבן טור אדם פטדה וברקת הטור האחד׃
(BHSCO) Exodus 39 : 11 והטור השני נפך ספיר ויהלם׃
(BHSCO) Exodus 39 : 12 והטור השלישי לשם שבו ואחלמה׃
(BHSCO) Exodus 39 : 13 והטור הרביעי תרשיש שהם וישפה מוסבת משבצות זהב במלאתם׃
(BHSCO) Exodus 39 : 14 והאבנים על־שמת בני־ישראל הנה שתים עשרה על־שמתם פתוחי חתם איש על־שמו לשנים עשר שבט׃
(BHSCO) Exodus 39 : 15 ויעשו על־החשן שרשרת גבלת מעשה עבת זהב טהור׃
(BHSCO) Exodus 39 : 16 ויעשו שתי משבצת זהב ושתי טבעת זהב ויתנו את־שתי הטבעת על־שני קצות החשן׃
(BHSCO) Exodus 39 : 17 ויתנו שתי העבתת הזהב על־שתי הטבעת על־קצות החשן׃
(BHSCO) Exodus 39 : 18 ואת שתי קצות שתי העבתת נתנו על־שתי המשבצת ויתנם על־כתפת האפד אל־מול פניו׃
(BHSCO) Exodus 39 : 19 ויעשו שתי טבעת זהב וישימו על־שני קצות החשן על־שפתו אשר אל־עבר האפד ביתה׃
(BHSCO) Exodus 39 : 20 ויעשו שתי טבעת זהב ויתנם על־שתי כתפת האפד מלמטה ממול פניו לעמת מחברתו ממעל לחשב האפד׃
(BHSCO) Exodus 39 : 21 וירכסו את־החשן מטבעתיו אל־טבעת האפד בפתיל תכלת להית על־חשב האפד ולא־יזח החשן מעל האפד כאשר צוה יהוה את־משה׃
(BHSCO) Exodus 39 : 22 ויעש את־מעיל האפד מעשה ארג כליל תכלת׃
(BHSCO) Exodus 39 : 23 ופי־המעיל בתוכו כפי תחרא שפה לפיו סביב לא יקרע׃
(BHSCO) Exodus 39 : 24 ויעשו על־שולי המעיל רמוני תכלת וארגמן ותולעת שני משזר׃
(BHSCO) Exodus 39 : 25 ויעשו פעמני זהב טהור ויתנו את־הפעמנים בתוך הרמנים על־שולי המעיל סביב בתוך הרמנים׃
(BHSCO) Exodus 39 : 26 פעמן ורמן פעמן ורמן על־שולי המעיל סביב לשרת כאשר צוה יהוה את־משה׃ ס
(BHSCO) Exodus 39 : 27 ויעשו את־הכתנת שש מעשה ארג לאהרן ולבניו׃
(BHSCO) Exodus 39 : 28 ואת המצנפת שש ואת־פארי המגבעת שש ואת־מכנסי הבד שש משזר׃
(BHSCO) Exodus 39 : 29 ואת־האבנט שש משזר ותכלת וארגמן ותולעת שני מעשה רקם כאשר צוה יהוה את־משה׃ ס
(BHSCO) Exodus 39 : 30 ויעשו את־ציץ נזר־הקדש זהב טהור ויכתבו עליו מכתב פתוחי חותם קדש ליהוה׃
(BHSCO) Exodus 39 : 31 ויתנו עליו פתיל תכלת לתת על־המצנפת מלמעלה כאשר צוה יהוה את־משה׃ ס
(BHSCO) Exodus 39 : 32 ותכל כל־עבדת משכן אהל מועד ויעשו בני ישראל ככל אשר צוה יהוה את־משה כן עשו׃ ף
(BHSCO) Exodus 39 : 33 ויביאו את־המשכן אל־משה את־האהל ואת־כל־כליו קרסיו קרשיו [כ בריחו] [ק בריחיו] ועמדיו ואדניו׃
(BHSCO) Exodus 39 : 34 ואת־מכסה עורת האילם המאדמים ואת־מכסה ערת התחשים ואת פרכת המסך׃
(BHSCO) Exodus 39 : 35 את־ארן העדת ואת־בדיו ואת הכפרת׃
(BHSCO) Exodus 39 : 36 את־השלחן את־כל־כליו ואת לחם הפנים׃
(BHSCO) Exodus 39 : 37 את־המנרה הטהרה את־נרתיה נרת המערכה ואת־כל־כליה ואת שמן המאור׃
(BHSCO) Exodus 39 : 38 ואת מזבח הזהב ואת שמן המשחה ואת קטרת הסמים ואת מסך פתח האהל׃
(BHSCO) Exodus 39 : 39 את מזבח הנחשת ואת־מכבר הנחשת אשר־לו את־בדיו ואת־כל־כליו את־הכיר ואת־כנו׃
(BHSCO) Exodus 39 : 40 את קלעי החצר את־עמדיה ואת־אדניה ואת־המסך לשער החצר את־מיתריו ויתדתיה ואת כל־כלי עבדת המשכן לאהל מועד׃
(BHSCO) Exodus 39 : 41 את־בגדי השרד לשרת בקדש את־בגדי הקדש לאהרן הכהן ואת־בגדי בניו לכהן׃
(BHSCO) Exodus 39 : 42 ככל אשר־צוה יהוה את־משה כן עשו בני ישראל את כל־העבדה׃
(BHSCO) Exodus 39 : 43 וירא משה את־כל־המלאכה והנה עשו אתה כאשר צוה יהוה כן עשו ויברך אתם משה׃ ף