(BHSCO) Exodus 6 : 1 ויאמר יהוה אל־משה עתה תראה אשר אעשה לפרעה כי ביד חזקה ישלחם וביד חזקה יגרשם מארצו׃ ס
(BHSCO) Exodus 6 : 2 וידבר אלהים אל־משה ויאמר אליו אני יהוה׃
(BHSCO) Exodus 6 : 3 וארא אל־אברהם אל־יצחק ואל־יעקב באל שדי ושמי יהוה לא נודעתי להם׃
(BHSCO) Exodus 6 : 4 וגם הקמתי את־בריתי אתם לתת להם את־ארץ כנען את ארץ מגריהם אשר־גרו בה׃
(BHSCO) Exodus 6 : 5 וגם אני שמעתי את־נאקת בני ישראל אשר מצרים מעבדים אתם ואזכר את־בריתי׃
(BHSCO) Exodus 6 : 6 לכן אמר לבני־ישראל אני יהוה והוצאתי אתכם מתחת סבלת מצרים והצלתי אתכם מעבדתם וגאלתי אתכם בזרוע נטויה ובשפטים גדלים׃
(BHSCO) Exodus 6 : 7 ולקחתי אתכם לי לעם והייתי לכם לאלהים וידעתם כי אני יהוה אלהיכם המוציא אתכם מתחת סבלות מצרים׃
(BHSCO) Exodus 6 : 8 והבאתי אתכם אל־הארץ אשר נשאתי את־ידי לתת אתה לאברהם ליצחק וליעקב ונתתי אתה לכם מורשה אני יהוה׃
(BHSCO) Exodus 6 : 9 וידבר משה כן אל־בני ישראל ולא שמעו אל־משה מקצר רוח ומעבדה קשה׃ ף
(BHSCO) Exodus 6 : 10 וידבר יהוה אל־משה לאמר׃
(BHSCO) Exodus 6 : 11 בא דבר אל־פרעה מלך מצרים וישלח את־בני־ישראל מארצו׃
(BHSCO) Exodus 6 : 12 וידבר משה לפני יהוה לאמר הן בני־ישראל לא־שמעו אלי ואיך ישמעני פרעה ואני ערל שפתים׃ ף
(BHSCO) Exodus 6 : 13 וידבר יהוה אל־משה ואל־אהרן ויצום אל־בני ישראל ואל־פרעה מלך מצרים להוציא את־בני־ישראל מארץ מצרים׃ ס
(BHSCO) Exodus 6 : 14 אלה ראשי בית־אבתם בני ראובן בכר ישראל חנוך ופלוא חצרון וכרמי אלה משפחת ראובן׃
(BHSCO) Exodus 6 : 15 ובני שמעון ימואל וימין ואהד ויכין וצחר ושאול בן־הכנענית אלה משפחת שמעון׃
(BHSCO) Exodus 6 : 16 ואלה שמות בני־לוי לתלדתם גרשון וקהת ומררי ושני חיי לוי שבע ושלשים ומאת שנה׃
(BHSCO) Exodus 6 : 17 בני גרשון לבני ושמעי למשפחתם׃
(BHSCO) Exodus 6 : 18 ובני קהת עמרם ויצהר וחברון ועזיאל ושני חיי קהת שלש ושלשים ומאת שנה׃
(BHSCO) Exodus 6 : 19 ובני מררי מחלי ומושי אלה משפחת הלוי לתלדתם׃
(BHSCO) Exodus 6 : 20 ויקח עמרם את־יוכבד דדתו לו לאשה ותלד לו את־אהרן ואת־משה ושני חיי עמרם שבע ושלשים ומאת שנה׃
(BHSCO) Exodus 6 : 21 ובני יצהר קרח ונפג וזכרי׃
(BHSCO) Exodus 6 : 22 ובני עזיאל מישאל ואלצפן וסתרי׃
(BHSCO) Exodus 6 : 23 ויקח* אהרן את־אלישבע בת־עמינדב אחות נחשון לו לאשה ותלד לו את־נדב ואת־אביהוא את־אלעזר ואת־איתמר׃
(BHSCO) Exodus 6 : 24 ובני קרח אסיר ואלקנה ואביאסף אלה משפחת הקרחי׃
(BHSCO) Exodus 6 : 25 ואלעזר בן־אהרן לקח־לו מבנות פוטיאל לו לאשה ותלד לו את־פינחס אלה ראשי אבות הלוים למשפחתם׃
(BHSCO) Exodus 6 : 26 הוא אהרן ומשה אשר אמר יהוה להם הוציאו את־בני ישראל מארץ מצרים על־צבאתם׃
(BHSCO) Exodus 6 : 27 הם המדברים אל־פרעה מלך־מצרים להוציא את־בני־ישראל ממצרים הוא משה ואהרן׃
(BHSCO) Exodus 6 : 28 ויהי ביום דבר יהוה אל־משה בארץ מצרים׃ ף
(BHSCO) Exodus 6 : 29 וידבר יהוה אל־משה לאמר אני יהוה דבר אל־פרעה מלך מצרים את כל־אשר אני דבר אליך׃
(BHSCO) Exodus 6 : 30 ויאמר משה לפני יהוה הן אני ערל שפתים ואיך ישמע אלי פרעה׃ ף