(BHSCO) Ezekiel 10 : 1 ואראה והנה אל־הרקיע אשר על־ראש הכרבים כאבן ספיר כמראה דמות כסא נראה עליהם׃
(BHSCO) Ezekiel 10 : 2 ויאמר אל־האיש לבש הבדים ויאמר בא אל־בינות לגלגל אל־תחת לכרוב ומלא חפניך גחלי־אש מבינות לכרבים וזרק על־העיר ויבא לעיני׃
(BHSCO) Ezekiel 10 : 3 והכרבים עמדים מימין לבית בבאו האיש והעןן מלא את־החצר הפנימית׃
(BHSCO) Ezekiel 10 : 4 וירם כבוד־יהוה מעל הכרוב על מפתן הבית וימלא הבית את־העןן והחצר מלאה את־נגה כבוד יהוה׃
(BHSCO) Ezekiel 10 : 5 וקול כנפי הכרובים נשמע עד־החצר החיצנה כקול אל־שדי בדברו׃
(BHSCO) Ezekiel 10 : 6 ויהי בצותו את־האיש לבש־הבדים לאמר קח אש מבינות לגלגל מבינות לכרובים ויבא ויעמד אצל האופן׃
(BHSCO) Ezekiel 10 : 7 וישלח הכרוב את־ידו מבינות לכרובים אל־האש אשר בינות הכרבים וישא ויתן אל־חפני לבש הבדים ויקח ויצא׃
(BHSCO) Ezekiel 10 : 8 וירא לכרבים תבנית יד־אדם תחת כנפיהם׃
(BHSCO) Ezekiel 10 : 9 ואראה והנה ארבעה אופנים אצל הכרובים אופן אחד אצל הכרוב אחד ואופן אחד אצל הכרוב אחד ומראה האופנים כעין אבן תרשיש׃
(BHSCO) Ezekiel 10 : 10 ומראיהם דמות אחד לארבעתם כאשר יהיה האופן בתוך האופן׃
(BHSCO) Ezekiel 10 : 11 בלכתם אל־ארבעת רבעיהם ילכו לא יסבו בלכתם כי המקום אשר־יפנה הראש אחריו ילכו לא יסבו בלכתם׃
(BHSCO) Ezekiel 10 : 12 וכל־בשרם וגבהם וידיהם וכנפיהם והאופנים מלאים עינים סביב לארבעתם אופניהם׃
(BHSCO) Ezekiel 10 : 13 לאופנים להם קורא הגלגל באזני׃
(BHSCO) Ezekiel 10 : 14 וארבעה פנים לאחד פני האחד פני הכרוב ופני השני פני אדם והשלישי פני אריה והרביעי פני־נשר׃
(BHSCO) Ezekiel 10 : 15 וירמו הכרובים היא החיה אשר ראיתי בנהר־כבר׃
(BHSCO) Ezekiel 10 : 16 ובלכת הכרובים ילכו האופנים אצלם ובשאת הכרובים את־כנפיהם לרום מעל הארץ לא־יסבו האופנים גם־הם מאצלם׃
(BHSCO) Ezekiel 10 : 17 בעמדם יעמדו וברוםם ירומו אותם כי רוח החיה בהם׃
(BHSCO) Ezekiel 10 : 18 ויצא כבוד יהוה מעל מפתן הבית ויעמד על־הכרובים׃
(BHSCO) Ezekiel 10 : 19 וישאו הכרובים את־כנפיהם וירומו מן־הארץ לעיני בצאתם והאופנים לעמתם ויעמד פתח שער בית־יהוה הקדמוני וכבוד אלהי־ישראל עליהם מלמעלה׃
(BHSCO) Ezekiel 10 : 20 היא החיה אשר ראיתי תחת אלהי־ישראל בנהר־כבר ואדע כי כרובים המה׃
(BHSCO) Ezekiel 10 : 21 ארבעה ארבעה פנים לאחד וארבע כנפים לאחד ודמות ידי אדם תחת כנפיהם׃
(BHSCO) Ezekiel 10 : 22 ודמות פניהם המה הפנים אשר ראיתי על־נהר־כבר מראיהם ואותם איש אל־עבר פניו ילכו׃