(BHSCO) Ezekiel 2 : 1 ויאמר אלי בן־אדם עמד על־רגליך ואדבר אתך׃
(BHSCO) Ezekiel 2 : 2 ותבא בי רוח כאשר דבר אלי ותעמדני על־רגלי ואשמע את מדבר אלי׃ ף
(BHSCO) Ezekiel 2 : 3 ויאמר אלי בן־אדם שולח אני אותך אל־בני ישראל אל־גוים המורדים אשר מרדו־בי המה ואבותם פשעו בי עד־עצם היום הזה׃
(BHSCO) Ezekiel 2 : 4 והבנים קשי פנים וחזקי־לב אני שולח אותך אליהם ואמרת אליהם כה אמר אדני יהוה׃
(BHSCO) Ezekiel 2 : 5 והמה אם־ישמעו ואם־יחדלו כי בית מרי המה וידעו כי נביא היה בתוכם׃ ף
(BHSCO) Ezekiel 2 : 6 ואתה בן־אדם אל־תירא מהם ומדבריהם אל־תירא כי סרבים וסלונים אותך ואל־עקרבים אתה יושב מדבריהם אל־תירא ומפניהם אל־תחת כי בית מרי המה׃
(BHSCO) Ezekiel 2 : 7 ודברת את־דברי אליהם אם־ישמעו ואם־יחדלו כי מרי המה׃ ף
(BHSCO) Ezekiel 2 : 8 ואתה בן־אדם שמע את אשר־אני מדבר אליך אל־תהי־מרי כבית המרי פצה פיך ואכל את אשר־אני נתן אליך׃
(BHSCO) Ezekiel 2 : 9 ואראה והנה־יד שלוחה אלי והנה־בו מגלת־ספר׃
(BHSCO) Ezekiel 2 : 10 ויפרש אותה לפני והיא כתובה פנים ואחור וכתוב אליה קנים והגה והי׃ ס