(BHSCO) Ezekiel 4 : 1 ואתה בן־אדם קח־לך לבנה ונתתה אותה לפניך וחקות עליה עיר את־ירושלם׃
(BHSCO) Ezekiel 4 : 2 ונתתה עליה מצור ובנית עליה דיק ושפכת עליה סללה ונתתה עליה מחנות ושים־עליה כרים סביב׃
(BHSCO) Ezekiel 4 : 3 ואתה קח־לך מחבת ברזל ונתתה אותה קיר ברזל בינך ובין העיר והכינתה את־פניך אליה והיתה במצור וצרת עליה אות היא לבית ישראל׃ ס
(BHSCO) Ezekiel 4 : 4 ואתה שכב על־צדך השמאלי ושמת את־עון בית־ישראל עליו מספר הימים אשר תשכב עליו תשא את־עונם׃
(BHSCO) Ezekiel 4 : 5 ואני נתתי לך את־שני עונם למספר ימים שלש־מאות ותשעים יום ונשאת עון בית־ישראל׃
(BHSCO) Ezekiel 4 : 6 וכלית את־אלה ושכבת על־צדך [כ הימוני] [ק הימני] שנית ונשאת את־עון בית־יהודה ארבעים יום יום לשנה יום לשנה נתתיו לך׃
(BHSCO) Ezekiel 4 : 7 ואל־מצור ירושלם תכין פניך וזרעך חשופה ונבאת עליה׃
(BHSCO) Ezekiel 4 : 8 והנה נתתי עליך עבותים ולא־תהפך מצדך אל־צדך עד־כלותך ימי מצורך׃
(BHSCO) Ezekiel 4 : 9 ואתה קח־לך חטין ושערים ופול ועדשים ודחן וכסמים ונתתה אותם בכלי אחד ועשית אותם לך ללחם מספר הימים אשר־אתה שוכב על־צדך שלש־מאות ותשעים יום תאכלנו׃
(BHSCO) Ezekiel 4 : 10 ומאכלך אשר תאכלנו במשקול עשרים שקל ליום מעת עד־עת תאכלנו׃
(BHSCO) Ezekiel 4 : 11 ומים במשורה תשתה ששית ההין מעת עד־עת תשתה׃
(BHSCO) Ezekiel 4 : 12 ועגת שערים תאכלנה והיא בגללי צאת האדם תעגנה לעיניהם׃ ס
(BHSCO) Ezekiel 4 : 13 ויאמר יהוה ככה יאכלו בני־ישראל את־לחםם טמא בגוים אשר אדיחם שם׃
(BHSCO) Ezekiel 4 : 14 ואמר אהה אדני יהוה הנה נפשי לא מטמאה ונבלה וטרפה לא־אכלתי מנעורי ועד־עתה ולא־בא בפי בשר פגול׃ ס
(BHSCO) Ezekiel 4 : 15 ויאמר אלי ראה נתתי לך את־[כ צפועי] [ק צפיעי] הבקר תחת גללי האדם ועשית את־לחמך עליהם׃ ס
(BHSCO) Ezekiel 4 : 16 ויאמר אלי בן־אדם הנני שבר מטה־לחם בירושלם ואכלו־לחם במשקל ובדאגה ומים במשורה ובשממון ישתו׃
(BHSCO) Ezekiel 4 : 17 למען יחסרו לחם ומים ונשמו איש ואחיו ונמקו בעונם׃ ף