(BHSCO) Ezekiel 48 : 1 ואלה שמות השבטים מקצה צפונה אל־יד דרך־חתלן לבוא־חמת חצר עיןן גבול דמשק צפונה אל־יד חמת והיו־לו פאת־קדים הים דן אחד׃
(BHSCO) Ezekiel 48 : 2 ועל גבול דן מפאת קדים עד־פאת־ימה אשר אחד׃
(BHSCO) Ezekiel 48 : 3 ועל גבול אשר מפאת קדימה ועד־פאת־ימה נפתלי אחד׃
(BHSCO) Ezekiel 48 : 4 ועל גבול נפתלי מפאת קדמה עד־פאת־ימה מנשה אחד׃
(BHSCO) Ezekiel 48 : 5 ועל גבול מנשה מפאת קדמה עד־פאת־ימה אפרים אחד׃
(BHSCO) Ezekiel 48 : 6 ועל גבול אפרים מפאת קדים ועד־פאת־ימה ראובן אחד׃
(BHSCO) Ezekiel 48 : 7 ועל גבול ראובן מפאת קדים עד־פאת־ימה יהודה אחד׃
(BHSCO) Ezekiel 48 : 8 ועל גבול יהודה מפאת קדים עד־פאת־ימה תהיה התרומה אשר־תרימו חמשה ועשרים אלף רחב וארך כאחד החלקים מפאת קדימה עד־פאת־ימה והיה המקדש בתוכו׃
(BHSCO) Ezekiel 48 : 9 התרומה אשר תרימו ליהוה ארך חמשה ועשרים אלף ורחב עשרת אלפים׃
(BHSCO) Ezekiel 48 : 10 ולאלה תהיה תרומת־הקדש לכהנים צפונה חמשה ועשרים אלף וימה רחב עשרת אלפים וקדימה רחב עשרת אלפים ונגבה ארך חמשה ועשרים אלף והיה מקדש־יהוה בתוכו׃
(BHSCO) Ezekiel 48 : 11 לכהנים המקדש מבני צדוק אשר שמרו משמרתי אשר לא־תעו בתעות בני ישראל כאשר תעו הלוים׃ ס
(BHSCO) Ezekiel 48 : 12 והיתה להם תרומיה מתרומת הארץ קדש קדשים אל־גבול הלוים׃
(BHSCO) Ezekiel 48 : 13 והלוים לעמת גבול הכהנים חמשה ועשרים אלף ארך ורחב עשרת אלפים כל־ארך חמשה ועשרים אלף ורחב עשרת אלפים׃
(BHSCO) Ezekiel 48 : 14 ולא־ימכרו ממנו ולא ימר ולא [כ יעבור] [ק יעביר] ראשית הארץ כי־קדש ליהוה׃
(BHSCO) Ezekiel 48 : 15 וחמשת אלפים הנותר ברחב על־פני חמשה ועשרים אלף חל־הוא לעיר למושב ולמגרש והיתה העיר [כ בתוכה] [ק בתוכו]׃
(BHSCO) Ezekiel 48 : 16 ואלה מדותיה פאת צפון חמש מאות וארבעת אלפים ופאת־נגב חמש [כ חמש] [ק זז] מאות וארבעת אלפים ומפאת קדים חמש מאות וארבעת אלפים ופאת־ימה חמש מאות וארבעת אלפים׃
(BHSCO) Ezekiel 48 : 17 והיה מגרש לעיר צפונה חמשים ומאתים ונגבה חמשים ומאתים וקדימה חמשים ומאתים וימה חמשים ומאתים׃
(BHSCO) Ezekiel 48 : 18 והנותר בארך לעמת תרומת הקדש עשרת אלפים קדימה ועשרת אלפים ימה והיה לעמת תרומת הקדש והיתה [כ תבואתה] [ק תבואתו] ללחם לעבדי העיר׃
(BHSCO) Ezekiel 48 : 19 והעבד העיר יעבדוהו מכל שבטי ישראל׃
(BHSCO) Ezekiel 48 : 20 כל־התרומה חמשה ועשרים אלף בחמשה ועשרים אלף רביעית תרימו את־תרומת הקדש אל־אחזת העיר׃
(BHSCO) Ezekiel 48 : 21 והנותר לנשיא מזה ומזה לתרומת־הקדש ולאחזת העיר אל־פני חמשה ועשרים אלף תרומה עד־גבול קדימה וימה על־פני חמשה ועשרים אלף על־גבול ימה לעמת חלקים לנשיא והיתה תרומת הקדש ומקדש הבית [כ בתוכה] [ק בתוכו]׃
(BHSCO) Ezekiel 48 : 22 ומאחזת הלוים ומאחזת העיר בתוך אשר לנשיא יהיה בין גבול יהודה ובין גבול בנימן לנשיא יהיה׃
(BHSCO) Ezekiel 48 : 23 ויתר השבטים מפאת קדימה עד־פאת־ימה בנימן אחד׃
(BHSCO) Ezekiel 48 : 24 ועל גבול בנימן מפאת קדימה עד־פאת־ימה שמעון אחד׃
(BHSCO) Ezekiel 48 : 25 ועל גבול שמעון מפאת קדימה עד־פאת־ימה יששכר אחד׃
(BHSCO) Ezekiel 48 : 26 ועל גבול יששכר מפאת קדימה עד־פאת־ימה זבולן אחד׃
(BHSCO) Ezekiel 48 : 27 ועל גבול זבולן מפאת קדמה עד־פאת־ימה גד אחד׃
(BHSCO) Ezekiel 48 : 28 ועל גבול גד אל־פאת נגב תימנה והיה גבול מתמר מי מריבת קדש נחלה על־הים הגדול׃
(BHSCO) Ezekiel 48 : 29 זאת הארץ אשר־תפילו מנחלה לשבטי ישראל ואלה מחלקותם נאם אדני יהוה׃ ף
(BHSCO) Ezekiel 48 : 30 ואלה תוצאת העיר מפאת צפון חמש מאות וארבעת אלפים מדה׃
(BHSCO) Ezekiel 48 : 31 ושערי העיר על־שמות שבטי ישראל שערים שלושה צפונה שער ראובן אחד שער יהודה אחד שער לוי אחד׃
(BHSCO) Ezekiel 48 : 32 ואל־פאת קדימה חמש מאות וארבעת אלפים ושערים שלשה ושער יוסף אחד שער בנימן אחד שער דן אחד׃
(BHSCO) Ezekiel 48 : 33 ופאת־נגבה חמש מאות וארבעת אלפים מדה ושערים שלשה שער שמעון אחד שער יששכר אחד שער זבולן אחד׃
(BHSCO) Ezekiel 48 : 34 פאת־ימה חמש מאות וארבעת אלפים שעריהם שלשה שער גד אחד שער אשר אחד שער נפתלי אחד׃
(BHSCO) Ezekiel 48 : 35 סביב שמנה עשר אלף ושם־העיר מיום יהוה שמה׃