(BHSCO) Ezekiel 7 : 1 ויהי דבר־יהוה אלי לאמר׃
(BHSCO) Ezekiel 7 : 2 ואתה בן־אדם כה־אמר אדני יהוה לאדמת ישראל קץ בא הקץ על־[כ ארבעת] [ק ארבע] כנפות הארץ׃
(BHSCO) Ezekiel 7 : 3 עתה הקץ עליך ושלחתי אפי בך ושפטתיך כדרכיך ונתתי עליך את כל־תועבתיך׃
(BHSCO) Ezekiel 7 : 4 ולא־תחוס עיני עליך ולא אחמול כי דרכיך עליך אתן ותועבותיך בתוךך תהיין וידעתם כי־אני יהוה׃ ף
(BHSCO) Ezekiel 7 : 5 כה אמר אדני יהוה רעה אחת רעה הנה באה׃
(BHSCO) Ezekiel 7 : 6 קץ בא בא הקץ הקיץ אליך הנה באה׃
(BHSCO) Ezekiel 7 : 7 באה הצפירה אליך יושב הארץ בא העת קרוב היום מהומה ולא־הד הרים׃
(BHSCO) Ezekiel 7 : 8 עתה מקרוב אשפוך חמתי עליך וכליתי אפי בך ושפטתיך כדרכיך ונתתי עליך את כל־תועבותיך׃
(BHSCO) Ezekiel 7 : 9 ולא־תחוס עיני ולא אחמול כדרכיך עליך אתן ותועבותיך בתוךך תהיין וידעתם כי אני יהוה מכה׃
(BHSCO) Ezekiel 7 : 10 הנה היום הנה באה יצאה הצפרה ץץ המטה פרח הזדון׃
(BHSCO) Ezekiel 7 : 11 החמס קם למטה־רשע לא־מהם ולא מהמונם ולא מהמהם ולא־נה בהם׃
(BHSCO) Ezekiel 7 : 12 בא העת הגיע היום הקונה אל־ישמח והמוכר אל־יתאבל כי חרון אל־כל־המונה׃
(BHSCO) Ezekiel 7 : 13 כי המוכר אל־הממכר לא ישוב ועוד בחיים חיתם כי־חזון אל־כל־המונה לא ישוב ואיש בעונו חיתו לא יתחזקו׃
(BHSCO) Ezekiel 7 : 14 תקעו בתקוע והכין הכל ואין הלך למלחמה כי חרוני אל־כל־המונה׃
(BHSCO) Ezekiel 7 : 15 החרב בחוץ והדבר והרעב מבית אשר בשדה בחרב ימות ואשר בעיר רעב ודבר יאכלנו׃
(BHSCO) Ezekiel 7 : 16 ופלטו פליטיהם והיו אל־ההרים כיוני הגאיות כלם המות איש בעונו׃
(BHSCO) Ezekiel 7 : 17 כל־הידים תרפינה וכל־ברכים תלכנה מים׃
(BHSCO) Ezekiel 7 : 18 וחגרו שקים וכסתה אותם פלצות ואל כל־פנים בושה ובכל־ראשיהם קרחה׃
(BHSCO) Ezekiel 7 : 19 כספם בחוצות ישליכו וזהבם לנדה יהיה כספם וזהבם לא־יוכל להצילם ביום עברת יהוה נפשם לא ישבעו ומעיהם לא ימלאו כי־מכשול עונם היה׃
(BHSCO) Ezekiel 7 : 20 וצבי עדיו לגאון שמהו וצלמי תועבתם שקוציהם עשו בו על־כן נתתיו להם לנדה׃
(BHSCO) Ezekiel 7 : 21 ונתתיו ביד־הזרים לבז ולרשעי הארץ לשלל [כ וחללה] [ק וחללוהו]׃
(BHSCO) Ezekiel 7 : 22 והסבותי פני מהם וחללו את־צפוני ובאו־בה פריצים וחללוה׃ ף
(BHSCO) Ezekiel 7 : 23 עשה הרתוק כי הארץ מלאה משפט דמים והעיר מלאה חמס׃
(BHSCO) Ezekiel 7 : 24 והבאתי רעי גוים וירשו את־בתיהם והשבתי גאון עזים ונחלו מקדשיהם׃
(BHSCO) Ezekiel 7 : 25 קפדה־בא ובקשו שלום ואין׃
(BHSCO) Ezekiel 7 : 26 הוה על־הוה תבוא ושמעה אל־שמועה תהיה ובקשו חזון מנביא ותורה תאבד מכהן ועצה מזקנים׃
(BHSCO) Ezekiel 7 : 27 המלך יתאבל ונשיא ילבש שממה וידי עם־הארץ תבהלנה מדרכם אעשה אותם ובמשפטיהם אשפטם וידעו כי־אני יהוה׃ ף