(BHSCO) Genesis 11 : 1 ויהי כל־הארץ שפה אחת ודברים אחדים׃
(BHSCO) Genesis 11 : 2 ויהי בנסעם מקדם וימצאו בקעה בארץ שנער וישבו שם׃
(BHSCO) Genesis 11 : 3 ויאמרו איש אל־רעהו הבה נלבנה לבנים ונשרפה לשרפה ותהי להם הלבנה לאבן והחמר היה להם לחמר׃
(BHSCO) Genesis 11 : 4 ויאמרו הבה נבנה־לנו עיר ומגדל וראשו בשמים ונעשה־לנו שם פן־נפוץ על־פני כל־הארץ׃
(BHSCO) Genesis 11 : 5 וירד יהוה לראת את־העיר ואת־המגדל אשר בנו בני האדם׃
(BHSCO) Genesis 11 : 6 ויאמר יהוה הן עם אחד ושפה אחת לכלם וזה החלם לעשות ועתה לא־יבצר מהם כל אשר יזמו לעשות׃
(BHSCO) Genesis 11 : 7 הבה נרדה ונבלה שם שפתם אשר לא ישמעו איש שפת רעהו׃
(BHSCO) Genesis 11 : 8 ויפץ יהוה אתם משם על־פני כל־הארץ ויחדלו לבנת העיר׃
(BHSCO) Genesis 11 : 9 על־כן קרא שמה בבל כי־שם בלל יהוה שפת כל־הארץ ומשם הפיצם יהוה על־פני כל־הארץ׃ ף
(BHSCO) Genesis 11 : 10 אלה תולדת שם שם בן־מאת שנה ויולד את־ארפכשד שנתים אחר המבול׃
(BHSCO) Genesis 11 : 11 ויחי־שם אחרי הולידו את־ארפכשד חמש מאות שנה ויולד בנים ובנות׃ ס
(BHSCO) Genesis 11 : 12 וארפכשד חי חמש ושלשים שנה ויולד את־שלח׃
(BHSCO) Genesis 11 : 13 ויחי ארפכשד אחרי הולידו את־שלח שלש שנים וארבע מאות שנה ויולד בנים ובנות׃ ס
(BHSCO) Genesis 11 : 14 ושלח חי שלשים שנה ויולד את־עבר׃
(BHSCO) Genesis 11 : 15 ויחי־שלח אחרי הולידו את־עבר שלש שנים וארבע מאות שנה ויולד בנים ובנות׃ ס
(BHSCO) Genesis 11 : 16 ויחי־עבר ארבע ושלשים שנה ויולד את־פלג׃
(BHSCO) Genesis 11 : 17 ויחי־עבר אחרי הולידו את־פלג שלשים שנה וארבע מאות שנה ויולד בנים ובנות׃ ס
(BHSCO) Genesis 11 : 18 ויחי־פלג שלשים שנה ויולד את־רעו׃
(BHSCO) Genesis 11 : 19 ויחי־פלג אחרי הולידו את־רעו תשע שנים ומאתים שנה ויולד בנים ובנות׃ ס
(BHSCO) Genesis 11 : 20 ויחי רעו שתים ושלשים שנה ויולד את־שרוג׃
(BHSCO) Genesis 11 : 21 ויחי רעו אחרי הולידו את־שרוג שבע שנים ומאתים שנה ויולד בנים ובנות׃ ס
(BHSCO) Genesis 11 : 22 ויחי שרוג שלשים שנה ויולד את־נחור׃
(BHSCO) Genesis 11 : 23 ויחי שרוג אחרי הולידו את־נחור מאתים שנה ויולד בנים ובנות׃ ס
(BHSCO) Genesis 11 : 24 ויחי נחור תשע ועשרים שנה ויולד את־תרח׃
(BHSCO) Genesis 11 : 25 ויחי נחור אחרי הולידו את־תרח תשע־עשרה שנה ומאת שנה ויולד בנים ובנות׃ ס
(BHSCO) Genesis 11 : 26 ויחי־תרח שבעים שנה ויולד את־אברם את־נחור ואת־הרן׃
(BHSCO) Genesis 11 : 27 ואלה תולדת תרח תרח הוליד את־אברם את־נחור ואת־הרן והרן הוליד את־לוט׃
(BHSCO) Genesis 11 : 28 וימת הרן על־פני תרח אביו בארץ מולדתו באור כשדים׃
(BHSCO) Genesis 11 : 29 ויקח אברם ונחור להם נשים שם אשת־אברם שרי ושם אשת־נחור מלכה בת־הרן אבי־מלכה ואבי יסכה׃
(BHSCO) Genesis 11 : 30 ותהי שרי עקרה אין לה ולד׃
(BHSCO) Genesis 11 : 31 ויקח תרח את־אברם בנו ואת־לוט בן־הרן בן־בנו ואת שרי כלתו אשת אברם בנו ויצאו אתם מאור כשדים ללכת ארצה כנען ויבאו עד־חרן וישבו שם׃
(BHSCO) Genesis 11 : 32 ויהיו ימי־תרח חמש שנים ומאתים שנה וימת תרח בחרן׃ ס