(BHSCO) Genesis 21 : 1 ויהוה פקד את־שרה כאשר אמר ויעש יהוה לשרה כאשר דבר׃
(BHSCO) Genesis 21 : 2 ותהר ותלד שרה לאברהם בן לזקניו למועד אשר־דבר אתו אלהים׃
(BHSCO) Genesis 21 : 3 ויקרא אברהם את־שם־בנו הנולד־לו אשר־ילדה־לו שרה יצחק׃
(BHSCO) Genesis 21 : 4 וימל אברהם את־יצחק בנו בן־שמנת ימים כאשר צוה אתו אלהים׃
(BHSCO) Genesis 21 : 5 ואברהם בן־מאת שנה בהולד לו את יצחק בנו׃
(BHSCO) Genesis 21 : 6 ותאמר שרה צחק עשה לי אלהים כל־השמע יצחק־לי׃
(BHSCO) Genesis 21 : 7 ותאמר מי מלל לאברהם היניקה בנים שרה כי־ילדתי בן לזקניו׃
(BHSCO) Genesis 21 : 8 ויגדל הילד ויגמל ויעש אברהם משתה גדול ביום הגמל את־יצחק׃
(BHSCO) Genesis 21 : 9 ותרא שרה את־בן־הגר המצרית אשר־ילדה לאברהם מצחק׃
(BHSCO) Genesis 21 : 10 ותאמר לאברהם גרש האמה הזאת ואת־בנה כי לא יירש בן־האמה הזאת עם־בני עם־יצחק׃
(BHSCO) Genesis 21 : 11 וירע הדבר מאד בעיני אברהם על אודת בנו׃
(BHSCO) Genesis 21 : 12 ויאמר אלהים אל־אברהם אל־ירע בעיניך על־הנער ועל־אמתך כל אשר תאמר אליך שרה שמע בקלה כי ביצחק יקרא לך זרע׃
(BHSCO) Genesis 21 : 13 וגם את־בן־האמה לגוי אשימנו כי זרעך הוא׃
(BHSCO) Genesis 21 : 14 וישכם אברהם בבקר ויקח־לחם וחמת מים ויתן אל־הגר שם על־שכמה ואת־הילד וישלחה ותלך ותתע במדבר באר שבע׃
(BHSCO) Genesis 21 : 15 ויכלו המים מן־החמת ותשלך את־הילד תחת אחד השיחם׃
(BHSCO) Genesis 21 : 16 ותלך ותשב לה מנגד הרחק כמטחוי קשת כי אמרה אל־אראה במות הילד ותשב מנגד ותשא את־קלה ותבך׃
(BHSCO) Genesis 21 : 17 וישמע אלהים את־קול הנער ויקרא מלאך אלהים אל־הגר מן־השמים ויאמר לה מה־לך הגר אל־תיראי כי־שמע אלהים אל־קול הנער באשר הוא־שם׃
(BHSCO) Genesis 21 : 18 קומי שאי את־הנער והחזיקי את־ידך בו כי־לגוי גדול אשימנו׃
(BHSCO) Genesis 21 : 19 ויפקח אלהים את־עיניה ותרא באר מים ותלך ותמלא את־החמת מים ותשק את־הנער׃
(BHSCO) Genesis 21 : 20 ויהי אלהים את־הנער ויגדל וישב במדבר ויהי רבה קשת׃
(BHSCO) Genesis 21 : 21 וישב במדבר פארן ותקח־לו אמו אשה מארץ מצרים׃ ף
(BHSCO) Genesis 21 : 22 ויהי בעת ההוא ויאמר אבימלך ופיכל שר־צבאו אל־אברהם לאמר אלהים עמך בכל אשר־אתה עשה׃
(BHSCO) Genesis 21 : 23 ועתה השבעה לי באלהים הנה אם־תשקר לי ולניני ולנכדי כחסד אשר־עשיתי עמך תעשה עמדי ועם־הארץ אשר־גרתה בה׃
(BHSCO) Genesis 21 : 24 ויאמר אברהם אנכי אשבע׃
(BHSCO) Genesis 21 : 25 והוכח אברהם את־אבימלך על־אדות באר המים אשר גזלו עבדי אבימלך׃
(BHSCO) Genesis 21 : 26 ויאמר אבימלך לא ידעתי מי עשה את־הדבר הזה וגם־אתה לא־הגדת לי וגם אנכי לא שמעתי בלתי היום׃
(BHSCO) Genesis 21 : 27 ויקח אברהם צאן ובקר ויתן לאבימלך ויכרתו שניהם ברית׃
(BHSCO) Genesis 21 : 28 ויצב אברהם את־שבע כבשת הצאן לבדהן׃
(BHSCO) Genesis 21 : 29 ויאמר אבימלך אל־אברהם מה הנה שבע כבשת האלה אשר הצבת לבדנה׃
(BHSCO) Genesis 21 : 30 ויאמר כי את־שבע כבשת תקח מידי בעבור תהיה־לי לעדה כי חפרתי את־הבאר הזאת׃
(BHSCO) Genesis 21 : 31 על־כן קרא למקום ההוא באר שבע כי שם נשבעו שניהם׃
(BHSCO) Genesis 21 : 32 ויכרתו ברית בבאר שבע ויקם אבימלך ופיכל שר־צבאו וישבו אל־ארץ פלשתים׃
(BHSCO) Genesis 21 : 33 ויטע אשל בבאר שבע ויקרא־שם בשם יהוה אל עולם׃
(BHSCO) Genesis 21 : 34 ויגר אברהם בארץ פלשתים ימים רבים׃ ף