(BHSCO) Genesis 23 : 1 ויהיו חיי שרה מאה שנה ועשרים שנה ושבע שנים שני חיי שרה׃
(BHSCO) Genesis 23 : 2 ותמת שרה בקרית ארבע הוא חברון בארץ כנען ויבא אברהם לספד לשרה ולבכתה׃
(BHSCO) Genesis 23 : 3 ויקם אברהם מעל פני מתו וידבר אל־בני־חת לאמר׃
(BHSCO) Genesis 23 : 4 גר־ותושב אנכי עםכם תנו לי אחזת־קבר עםכם ואקברה מתי מלפני׃
(BHSCO) Genesis 23 : 5 ויענו בני־חת את־אברהם לאמר לו׃
(BHSCO) Genesis 23 : 6 שמענו אדני נשיא אלהים אתה בתוכנו במבחר קברינו קבר את־מתך איש ממנו את־קברו לא־יכלה ממך מקבר מתך׃
(BHSCO) Genesis 23 : 7 ויקם אברהם וישתחו לעם־הארץ לבני־חת׃
(BHSCO) Genesis 23 : 8 וידבר אתם לאמר אם־יש את־נפשכם לקבר את־מתי מלפני שמעוני ופגעו־לי בעפרון בן־צחר׃
(BHSCO) Genesis 23 : 9 ויתן־לי את־מערת המכפלה אשר־לו אשר בקצה שדהו בכסף מלא יתננה לי בתוככם לאחזת־קבר׃
(BHSCO) Genesis 23 : 10 ועפרון ישב בתוך בני־חת ויען עפרון החתי את־אברהם באזני בני־חת לכל באי שער־עירו לאמר׃
(BHSCO) Genesis 23 : 11 לא־אדני שמעני השדה נתתי לך והמערה אשר־בו לך נתתיה לעיני בני־עמי נתתיה לך קבר מתך׃
(BHSCO) Genesis 23 : 12 וישתחו אברהם לפני עם הארץ׃
(BHSCO) Genesis 23 : 13 וידבר אל־עפרון באזני עם־הארץ לאמר אך אם־אתה לו שמעני נתתי כסף השדה קח ממני ואקברה את־מתי שמה׃
(BHSCO) Genesis 23 : 14 ויען עפרון את־אברהם לאמר לו׃
(BHSCO) Genesis 23 : 15 אדני שמעני ארץ ארבע מאת שקל־כסף ביני ובינך מה־הוא ואת־מתך קבר׃
(BHSCO) Genesis 23 : 16 וישמע אברהם אל־עפרון וישקל אברהם לעפרן את־הכסף אשר דבר באזני בני־חת ארבע מאות שקל כסף עבר לסחר׃
(BHSCO) Genesis 23 : 17 ויקם שדה עפרון אשר במכפלה אשר לפני ממרא השדה והמערה אשר־בו וכל־העץ אשר בשדה אשר בכל־גבלו סביב׃
(BHSCO) Genesis 23 : 18 לאברהם למקנה לעיני בני־חת בכל באי שער־עירו׃
(BHSCO) Genesis 23 : 19 ואחרי־כן קבר אברהם את־שרה אשתו אל־מערת שדה המכפלה על־פני ממרא הוא חברון בארץ כנען׃
(BHSCO) Genesis 23 : 20 ויקם השדה והמערה אשר־בו לאברהם לאחזת־קבר מאת בני־חת׃ ס