(BHSCO) Genesis 25 : 1 ויסף אברהם ויקח אשה ושמה קטורה׃
(BHSCO) Genesis 25 : 2 ותלד לו את־זמרן ואת־יקשן ואת־מדן ואת־מדין ואת־ישבק ואת־שוח׃
(BHSCO) Genesis 25 : 3 ויקשן ילד את־שבא ואת־דדן ובני דדן היו אשורם ולטושים ולאמים׃
(BHSCO) Genesis 25 : 4 ובני מדין עיפה ועפר וחנך ואבידע ואלדעה כל־אלה בני קטורה׃
(BHSCO) Genesis 25 : 5 ויתן אברהם את־כל־אשר־לו ליצחק׃
(BHSCO) Genesis 25 : 6 ולבני הפילגשים אשר לאברהם נתן אברהם מתנת וישלחם מעל יצחק בנו בעודנו חי קדמה אל־ארץ קדם׃
(BHSCO) Genesis 25 : 7 ואלה ימי שני־חיי אברהם אשר־חי מאת שנה ושבעים שנה וחמש שנים׃
(BHSCO) Genesis 25 : 8 ויגוע וימת אברהם בשיבה טובה זקן ושבע ויאסף אל־עמיו׃
(BHSCO) Genesis 25 : 9 ויקברו אתו יצחק וישמעאל בניו אל־מערת המכפלה אל־שדה עפרן בן־צחר החתי אשר על־פני ממרא׃
(BHSCO) Genesis 25 : 10 השדה אשר־קנה אברהם מאת בני־חת שמה קבר אברהם ושרה אשתו׃
(BHSCO) Genesis 25 : 11 ויהי אחרי מות אברהם ויברך אלהים את־יצחק בנו וישב יצחק עם־באר לחי ראי׃ ס
(BHSCO) Genesis 25 : 12 ואלה תלדת ישמעאל בן־אברהם אשר ילדה הגר המצרית שפחת שרה לאברהם׃
(BHSCO) Genesis 25 : 13 ואלה שמות בני ישמעאל בשמתם לתולדתם בכר ישמעאל נבית וקדר ואדבאל ומבשם׃
(BHSCO) Genesis 25 : 14 ומשמע ודומה ומשא׃
(BHSCO) Genesis 25 : 15 חדד ותימא יטור נפיש וקדמה׃
(BHSCO) Genesis 25 : 16 אלה הם בני ישמעאל ואלה שמתם בחצריהם ובטירתם שנים־עשר נשיאם לאמתם׃
(BHSCO) Genesis 25 : 17 ואלה שני חיי ישמעאל מאת שנה ושלשים שנה ושבע שנים ויגוע וימת ויאסף אל־עמיו׃
(BHSCO) Genesis 25 : 18 וישכנו מחוילה עד־שור אשר על־פני מצרים באכה אשורה על־פני כל־אחיו נפל׃ ף
(BHSCO) Genesis 25 : 19 ואלה תולדת יצחק בן־אברהם אברהם הוליד את־יצחק׃
(BHSCO) Genesis 25 : 20 ויהי יצחק בן־ארבעים שנה בקחתו את־רבקה בת־בתואל הארמי מפדן ארם אחות לבן הארמי לו לאשה׃
(BHSCO) Genesis 25 : 21 ויעתר יצחק ליהוה לנכח אשתו כי עקרה הוא ויעתר לו יהוה ותהר רבקה אשתו׃
(BHSCO) Genesis 25 : 22 ויתרצצו הבנים בקרבה ותאמר אם־כן למה זה אנכי ותלך לדרש את־יהוה׃
(BHSCO) Genesis 25 : 23 ויאמר יהוה לה שני [כ גיים] [ק גוים] בבטנך ושני לאמים ממעיך יפרדו ולאם מלאם יאמץ ורב יעבד צעיר׃
(BHSCO) Genesis 25 : 24 וימלאו ימיה ללדת והנה תוםם בבטנה׃
(BHSCO) Genesis 25 : 25 ויצא הראשון אדמוני כלו כאדרת שער ויקראו שמו עשו׃
(BHSCO) Genesis 25 : 26 ואחרי־כן יצא אחיו וידו אחזת בעקב עשו ויקרא שמו יעקב ויצחק בן־ששים שנה בלדת אתם׃
(BHSCO) Genesis 25 : 27 ויגדלו הנערים ויהי עשו איש ידע ציד איש שדה ויעקב איש תם ישב אהלים׃
(BHSCO) Genesis 25 : 28 ויאהב יצחק את־עשו כי־ציד בפיו ורבקה אהבת את־יעקב׃
(BHSCO) Genesis 25 : 29 ויזד יעקב נזיד ויבא עשו מן־השדה והוא עיף׃
(BHSCO) Genesis 25 : 30 ויאמר עשו אל־יעקב הלעיטני נא מן־האדם האדם הזה כי עיף אנכי על־כן קרא־שמו אדום׃
(BHSCO) Genesis 25 : 31 ויאמר יעקב מכרה כיום את־בכרתך לי׃
(BHSCO) Genesis 25 : 32 ויאמר עשו הנה אנכי הולך למות ולמה־זה לי בכרה׃
(BHSCO) Genesis 25 : 33 ויאמר יעקב השבעה לי כיומ* וישבע לו וימכר את־בכרתו ליעקב׃
(BHSCO) Genesis 25 : 34 ויעקב נתן לעשו לחם ונזיד עדשים ויאכל וישת ויקם וילך ויבז עשו את־הבכרה׃ ס