(BHSCO) Genesis 40 : 1 ויהי אחר הדברים האלה חטאו* משקה מלך־מצרים והאפה לאדניהם למלך מצרים׃
(BHSCO) Genesis 40 : 2 ויקצף פרעה על שני סריסיו על שר המשקים ועל שר האופים׃
(BHSCO) Genesis 40 : 3 ויתן אתם במשמר בית שר הטבחים אל־בית הסהר מקום אשר יוסף אסור שם׃
(BHSCO) Genesis 40 : 4 ויפקד שר הטבחים את־יוסף אתם וישרת אתם ויהיו ימים במשמר׃
(BHSCO) Genesis 40 : 5 ויחלמו חלום שניהם איש חלמו בלילה אחד איש כפתרון חלמו המשקה והאפה אשר למלך מצרים אשר אסורים בבית הסהר׃
(BHSCO) Genesis 40 : 6 ויבא אליהם יוסף בבקר וירא אתם והנם זעפים׃
(BHSCO) Genesis 40 : 7 וישאל את־סריסי פרעה אשר אתו במשמר בית אדניו לאמר מדוע פניכם רעים היום׃
(BHSCO) Genesis 40 : 8 ויאמרו אליו חלום חלמנו ופתר אין אתו ויאמר אלהם יוסף הלוא לאלהים פתרנים ספרו־נא לי׃
(BHSCO) Genesis 40 : 9 ויספר שר־המשקים את־חלמו ליוסף ויאמר לו בחלומי והנה־גפן לפני׃
(BHSCO) Genesis 40 : 10 ובגפן שלשה שריגם והיא כפרחת עלתה נצה הבשילו אשכלתיה ענבים׃
(BHSCO) Genesis 40 : 11 וכוס פרעה בידי ואקח את־הענבים ואשחט אתם אל־כוס פרעה ואתן את־הכוס על־כף פרעה׃
(BHSCO) Genesis 40 : 12 ויאמר לו יוסף זה פתרנו שלשת השרגים שלשת ימים הם׃
(BHSCO) Genesis 40 : 13 בעוד שלשת ימים ישא פרעה את־ראשך והשיבך על־כנך ונתת כוס־פרעה בידו כמשפט הראשון אשר היית משקהו׃
(BHSCO) Genesis 40 : 14 כי אם־זכרתני אתך כאשר ייטב לך ועשית־נא עמדי חסד והזכרתני אל־פרעה והוצאתני מן־הבית הזה׃
(BHSCO) Genesis 40 : 15 כי־גנב גנבתי מארץ העברים וגם־פה לא־עשיתי מאומה כי־שמו אתי בבור׃
(BHSCO) Genesis 40 : 16 וירא שר־האפים כי טוב פתר ויאמר אל־יוסף אף־אני בחלומי והנה שלשה סלי חרי על־ראשי׃
(BHSCO) Genesis 40 : 17 ובסל העליון מכל מאכל פרעה מעשה אפה והעוף אכל אתם מן־הסל מעל ראשי׃
(BHSCO) Genesis 40 : 18 ויען יוסף ויאמר זה פתרנו שלשת הסלים שלשת ימים הם׃
(BHSCO) Genesis 40 : 19 בעוד שלשת ימים ישא פרעה את־ראשך מעליך ותלה אותך על־עץ ואכל העוף את־בשרך מעליך׃
(BHSCO) Genesis 40 : 20 ויהי ביום השלישי יומ* הלדת את־פרעה ויעש משתה לכל־עבדיו וישא את־ראש שר המשקים ואת־ראש שר האפים בתוך עבדיו׃
(BHSCO) Genesis 40 : 21 וישב את־שר המשקים על־משקהו ויתן הכוס על־כף פרעה׃
(BHSCO) Genesis 40 : 22 ואת שר האפים תלה כאשר פתר להם יוסף׃
(BHSCO) Genesis 40 : 23 ולא־זכר שר־המשקים את־יוסף וישכחהו׃ ף