(BHSCO) Genesis 46 : 1 ויסע ישראל וכל־אשר־לו ויבא בארה שבע ויזבח זבחים לאלהי אביו יצחק׃
(BHSCO) Genesis 46 : 2 ויאמר אלהים לישראל במראת הלילה ויאמר יעקב יעקב ויאמר הנני׃
(BHSCO) Genesis 46 : 3 ויאמר אנכי האל אלהי אביך אל־תירא מרדה מצרימה כי־לגוי גדול אשימך שם׃
(BHSCO) Genesis 46 : 4 אנכי ארד עמך מצרימה ואנכי אעלך גם־עלה ויוסף ישית ידו על־עיניך׃
(BHSCO) Genesis 46 : 5 ויקם יעקב מבאר שבע וישאו בני־ישראל את־יעקב אביהם ואת־טפם ואת־נשיהם בעגלות אשר־שלח פרעה לשאת אתו׃
(BHSCO) Genesis 46 : 6 ויקחו את־מקניהם ואת־רכושם אשר רכשו בארץ כנען ויבאו מצרימה יעקב וכל־זרעו אתו׃
(BHSCO) Genesis 46 : 7 בניו ובני בניו אתו בנתיו ובנות בניו וכל־זרעו הביא אתו מצרימה׃ ס
(BHSCO) Genesis 46 : 8 ואלה שמות בני־ישראל הבאים מצרימה יעקב ובניו בכר יעקב ראובן׃
(BHSCO) Genesis 46 : 9 ובני ראובן חנוך ופלוא וחצרון וכרמי׃
(BHSCO) Genesis 46 : 10 ובני שמעון ימואל וימין ואהד ויכין וצחר ושאול בן־הכנענית׃
(BHSCO) Genesis 46 : 11 ובני לוי גרשון קהת ומררי׃
(BHSCO) Genesis 46 : 12 ובני יהודה ער ואוןן ושלה ופרץ וזרח וימת ער ואוןן בארץ כנען ויהיו בני־פרץ חצרון וחמול׃
(BHSCO) Genesis 46 : 13 ובני יששכר תולע ופוה ויוב ושמרון׃
(BHSCO) Genesis 46 : 14 ובני זבולן סרד ואלון ויחלאל׃
(BHSCO) Genesis 46 : 15 אלה בני לאה אשר ילדה ליעקב בפדן ארם ואת דינה בתו כל־נפש בניו ובנותיו שלשים ושלש׃
(BHSCO) Genesis 46 : 16 ובני גד צפיון וחגי שוני ואצבן ערי וארודי ואראלי׃
(BHSCO) Genesis 46 : 17 ובני אשר ימנה וישוה וישוי ובריעה ושרח אחתם ובני בריעה חבר ומלכיאל׃
(BHSCO) Genesis 46 : 18 אלה בני זלפה אשר־נתן לבן ללאה בתו ותלד את־אלה ליעקב שש עשרה נפש׃
(BHSCO) Genesis 46 : 19 בני רחל אשת יעקב* יוסף ובנימן׃
(BHSCO) Genesis 46 : 20 ויולד ליוסף בארץ מצרים אשר ילדה־לו אסנת בת־פוטי פרע כהן אן את־מנשה ואת־אפרים׃
(BHSCO) Genesis 46 : 21 ובני בנימן בלע ובכר ואשבל גרא ונעמן אחי וראש מפים וחפים וארד׃
(BHSCO) Genesis 46 : 22 אלה בני רחל אשר ילד ליעקב כל־נפש ארבעה עשר׃
(BHSCO) Genesis 46 : 23 ובני־דן חשים׃
(BHSCO) Genesis 46 : 24 ובני נפתלי יחצאל וגוני ויצר ושלם׃
(BHSCO) Genesis 46 : 25 אלה בני בלהה אשר־נתן לבן לרחל בתו ותלד את־אלה ליעקב כל־נפש שבעה׃
(BHSCO) Genesis 46 : 26 כל־הנפש הבאה ליעקב מצרימה יצאי ירכו מלבד נשי בני־יעקב כל־נפש ששים ושש׃
(BHSCO) Genesis 46 : 27 ובני יוסף אשר־ילד־לו במצרים נפש שנים כל־הנפש לבית־יעקב הבאה מצרימה שבעים׃ ף
(BHSCO) Genesis 46 : 28 ואת־יהודה שלח לפניו אל־יוסף להורת לפניו גשנה ויבאו ארצה גשן׃
(BHSCO) Genesis 46 : 29 ויאסר יוסף מרכבתו ויעל לקראת־ישראל אביו גשנה וירא אליו ויפל על־צואריו ויבך על־צואריו עוד׃
(BHSCO) Genesis 46 : 30 ויאמר ישראל אל־יוסף אמותה הפעם אחרי ראותי את־פניך כי עודך חי׃
(BHSCO) Genesis 46 : 31 ויאמר יוסף אל־אחיו ואל־בית אביו אעלה ואגידה לפרעה ואמרה אליו אחי ובית־אבי אשר בארץ־כנען באו אלי׃
(BHSCO) Genesis 46 : 32 והאנשים רעי צאן כי־אנשי מקנה היו וצאנם ובקרם וכל־אשר להם הביאו׃
(BHSCO) Genesis 46 : 33 והיה כי־יקרא לכם פרעה ואמר מה־מעשיכם׃
(BHSCO) Genesis 46 : 34 ואמרתם אנשי מקנה היו עבדיך מנעורינו ועד־עתה גם־אנחנו גם־אבתינו בעבור תשבו בארץ גשן כי־תועבת מצרים כל־רעה צאן׃