(BHSCO) Isaiah 21 : 1 משא מדבר־ים כסופות בנגב לחלף ממדבר בא מארץ נוראה׃
(BHSCO) Isaiah 21 : 2 חזות קשה הגד־לי הבוגד בוגד והשודד שודד עלי עילם צורי מדי כל־אנחתה השבתי׃
(BHSCO) Isaiah 21 : 3 על־כן מלאו מתני חלחלה צירים אחזוני כצירי יולדה נעויתי משמע נבהלתי מראות׃
(BHSCO) Isaiah 21 : 4 תעה לבבי פלצות בעתתני את נשף חשקי שם לי לחרדה׃
(BHSCO) Isaiah 21 : 5 ערך השלחן צפה הצפית אכול שתה קומו השרים משחו מגן׃ ף
(BHSCO) Isaiah 21 : 6 כי כה אמר אלי אדני לך העמד המצפה אשר יראה יגיד׃
(BHSCO) Isaiah 21 : 7 וראה רכב צמד פרשים רכב חמור רכב גמל והקשיב קשב רב־קשב׃
(BHSCO) Isaiah 21 : 8 ויקרא אריה על־מצפה אדני אנכי עמד תמיד יוםם ועל־משמרתי אנכי נצב כל־הלילות׃
(BHSCO) Isaiah 21 : 9 והנה־זה בא רכב איש צמד פרשים ויען ויאמר נפלה נפלה בבל וכל־פסילי אלהיה שבר לארץ׃
(BHSCO) Isaiah 21 : 10 מדשתי ובן־גרני אשר שמעתי מאת יהוה צבאות אלהי ישראל הגדתי לכם׃ ס
(BHSCO) Isaiah 21 : 11 משא דומה אלי קרא משעיר שמר מה־מלילה שמר מה־מליל׃
(BHSCO) Isaiah 21 : 12 אמר שמר אתה בקר וגם־לילה אם־תבעיון בעיו שבו אתיו׃ ס
(BHSCO) Isaiah 21 : 13 משא בערב ביער בערב תלינו ארחות דדנים׃
(BHSCO) Isaiah 21 : 14 לקראת צמא התיו מים ישבי ארץ תימא בלחמו קדמו נדד׃
(BHSCO) Isaiah 21 : 15 כי־מפני חרבות נדדו מפני חרב נטושה ומפני קשת דרוכה ומפני כבד מלחמה׃ ס
(BHSCO) Isaiah 21 : 16 כי־כה אמר אדני אלי בעוד שנה כשני שכיר וכלה כל־כבוד קדר׃
(BHSCO) Isaiah 21 : 17 ושאר מספר־קשת גבורי בני־קדר ימעטו כי יהוה אלהי־ישראל דבר׃ ס