(BHSCO) Isaiah 24 : 1 הנה יהוה בוקק הארץ ובולקה ועוה פניה והפיץ ישביה׃
(BHSCO) Isaiah 24 : 2 והיה כעם ככהן כעבד כאדניו כשפחה כגברתה כקונה כמוכר כמלוה כלוה כנשה כאשר נשא בו׃
(BHSCO) Isaiah 24 : 3 הבוק תבוק הארץ והבוז תבוז כי יהוה דבר את־הדבר הזה׃
(BHSCO) Isaiah 24 : 4 אבלה נבלה הארץ אמללה נבלה תבל אמללו מרום עם־הארץ׃
(BHSCO) Isaiah 24 : 5 והארץ חנפה תחת ישביה כי־עברו תורת חלפו חק הפרו ברית עולם׃
(BHSCO) Isaiah 24 : 6 על־כן אלה אכלה ארץ ויאשמו ישבי בה על־כן חרו ישבי ארץ ונשאר אנוש מזער׃
(BHSCO) Isaiah 24 : 7 אבל תירוש אמללה־גפן נאנחו כל־שמחי־לב׃
(BHSCO) Isaiah 24 : 8 שבת משוש תפים חדל שאון עליזים שבת משוש כנור׃
(BHSCO) Isaiah 24 : 9 בשיר לא ישתו־יין ימר שכר לשתיו׃
(BHSCO) Isaiah 24 : 10 נשברה קרית־תהו סגר כל־בית מבוא׃
(BHSCO) Isaiah 24 : 11 צוחה על־היין בחוצות ערבה כל־שמחה גלה משוש הארץ׃
(BHSCO) Isaiah 24 : 12 נשאר בעיר שמה ושאיה יכת־שער׃
(BHSCO) Isaiah 24 : 13 כי כה יהיה בקרב הארץ בתוך העמים כנקף זית כעוללת אם־כלה בציר׃
(BHSCO) Isaiah 24 : 14 המה ישאו קולם ירנו בגאון יהוה צהלו מים׃
(BHSCO) Isaiah 24 : 15 על־כן בארים כבדו יהוה באיי הים שם יהוה אלהי ישראל׃ ס
(BHSCO) Isaiah 24 : 16 מכנף הארץ זמרת שמענו צבי לצדיק ואמר רזי־לי רזי־לי אוי לי בגדים בגדו ובגד בוגדים בגדו׃
(BHSCO) Isaiah 24 : 17 פחד ופחת ופח עליך יושב הארץ׃
(BHSCO) Isaiah 24 : 18 והיה הנס מקול הפחד יפל אל־הפחת והעולה מתוך הפחת ילכד בפח כי־ארבות ממרום נפתחו וירעשו מוסדי ארץ׃
(BHSCO) Isaiah 24 : 19 רעה התרעעה הארץ פור התפוררה ארץ מוט התמוטטה ארץ׃
(BHSCO) Isaiah 24 : 20 נוע תנוע ארץ כשכור והתנודדה כמלונה וכבד עליה פשעה ונפלה ולא־תסיף קום׃ ס
(BHSCO) Isaiah 24 : 21 והיה ביום ההוא יפקד יהוה על־צבא המרום במרום ועל־מלכי האדמה על־האדמה׃
(BHSCO) Isaiah 24 : 22 ואספו אספה אסיר על־בור וסגרו על־מסגר ומרב ימים יפקדו׃
(BHSCO) Isaiah 24 : 23 וחפרה הלבנה ובושה החמה כי־מלך יהוה צבאות בהר ציון ובירושלם ונגד זקניו כבוד׃ ף