(BHSCO) Isaiah 27 : 1 ביום ההוא יפקד יהוה בחרבו הקשה והגדולה והחזקה על לויתן נחש ברח ועל לויתן נחש עקלתון והרג את־התנין אשר בים׃ ס
(BHSCO) Isaiah 27 : 2 ביום ההוא כרם חמד ענו־לה׃
(BHSCO) Isaiah 27 : 3 אני יהוה נצרה לרגעים אשקנה פן יפקד עליה לילה ויום אצרנה׃
(BHSCO) Isaiah 27 : 4 חמה אין לי מי־יתנני שמיר שית במלחמה אפשעה בה אציתנה יחד׃
(BHSCO) Isaiah 27 : 5 או יחזק במעוזי יעשה שלום לי שלום יעשה־לי׃
(BHSCO) Isaiah 27 : 6 הבאים ישרש יעקב יציץ ופרח ישראל ומלאו פני־תבל תנובה׃ ס
(BHSCO) Isaiah 27 : 7 הכמכת מכהו הכהו אם־כהרג הרגיו הרג׃
(BHSCO) Isaiah 27 : 8 בסאסאה בשלחה תריבנה הגה ברוחו הקשה ביום קדים׃
(BHSCO) Isaiah 27 : 9 לכן בזאת יכפר עון־יעקב וזה כל־פרי הסר חטאתו בשומו כל־אבני מזבח כאבני־גר מנפצות לא־יקמו אשרים וחמנים׃
(BHSCO) Isaiah 27 : 10 כי עיר בצורה בדד נוה משלח ונעזב כמדבר שם ירעה עגל ושם ירבץ וכלה סעפיה׃
(BHSCO) Isaiah 27 : 11 ביבש קצירה תשברנה נשים באות מאירות אותה כי לא עם־בינות הוא על־כן לא־ירחמנו עשהו ויצרו לא יחננו׃ ס
(BHSCO) Isaiah 27 : 12 והיה ביום ההוא יחבט יהוה משבלת הנהר עד־נחל מצרים ואתם תלקטו לאחד אחד בני ישראל׃ ס
(BHSCO) Isaiah 27 : 13 והיה ביום ההוא יתקע בשופר גדול ובאו האבדים בארץ אשור והנדחים בארץ מצרים והשתחוו ליהוה בהר הקדש בירושלם׃