(BHSCO) Isaiah 29 : 1 הוי אריאל אריאל קרית חנה דוד ספו שנה על־שנה חגים ינקפו׃
(BHSCO) Isaiah 29 : 2 והציקותי לאריאל והיתה תאניה ואניה והיתה לי כאריאל׃
(BHSCO) Isaiah 29 : 3 וחניתי כדור עליך וצרתי עליך מצב והקימתי עליך מצרת׃
(BHSCO) Isaiah 29 : 4 ושפלת מארץ תדברי ומעפר תשח אמרתך והיה כאוב מארץ קולך ומעפר אמרתך תצפצף׃
(BHSCO) Isaiah 29 : 5 והיה כאבק דק המון זריך וכמץ עבר המון עריצים והיה לפתע פתאם׃
(BHSCO) Isaiah 29 : 6 מעם יהוה צבאות תפקד ברעם וברעש וקול גדול סופה וסערה ולהב אש אוכלה׃
(BHSCO) Isaiah 29 : 7 והיה כחלום חזון לילה המון כל־הגוים הצבאים על־אריאל וכל־צביה ומצדתה והמציקים לה׃
(BHSCO) Isaiah 29 : 8 והיה כאשר יחלם הרעב והנה אוכל והקיץ וריקה נפשו וכאשר יחלם הצמא והנה שתה והקיץ והנה עיף ונפשו שוקקה כן יהיה המון כל־הגוים הצבאים על־הר ציון׃ ס
(BHSCO) Isaiah 29 : 9 התמהמהו ותמהו השתעשעו ושעו שכרו ולא־יין נעו ולא שכר׃
(BHSCO) Isaiah 29 : 10 כי־נסך עליכם יהוה רוח תרדמה ויעצם את־עיניכם את־הנביאים ואת־ראשיכם החזים כסה׃
(BHSCO) Isaiah 29 : 11 ותהי לכם חזות הכל כדברי הספר החתום אשר־יתנו אתו אל־יודע [כ הספר] [ק ספר] לאמר קרא נא־זה ואמר לא אוכל כי חתום הוא׃
(BHSCO) Isaiah 29 : 12 ונתן הספר על אשר לא־ידע ספר לאמר קרא נא־זה ואמר לא ידעתי ספר׃ ס
(BHSCO) Isaiah 29 : 13 ויאמר אדני יען כי נגש העם הזה בפיו ובשפתיו כבדוני ולבו רחק ממני ותהי יראתם אתי מצות אנשים מלמדה׃
(BHSCO) Isaiah 29 : 14 לכן הנני יוסף להפליא את־העם־הזה הפלא ופלא ואבדה חכמת חכמיו ובינת נבניו תסתתר׃ ס
(BHSCO) Isaiah 29 : 15 הוי המעמיקים מיהוה לסתר עצה והיה במחשך מעשיהם ויאמרו מי ראנו ומי יודענו׃
(BHSCO) Isaiah 29 : 16 הפככם אם־כחמר היצר יחשב כי־יאמר מעשה לעשהו לא עשני ויצר אמר ליוצרו לא הבין׃
(BHSCO) Isaiah 29 : 17 הלוא־עוד מעט מזער ושב לבנון לכרמל והכרמל ליער יחשב׃
(BHSCO) Isaiah 29 : 18 ושמעו ביום־ההוא החרשים דברי־ספר ומאפל ומחשך עיני עורים תראינה׃
(BHSCO) Isaiah 29 : 19 ויספו ענוים ביהוה שמחה ואביוני אדם בקדוש ישראל יגילו׃
(BHSCO) Isaiah 29 : 20 כי־אפס עריץ וכלה לץ ונכרתו כל־שקדי און׃
(BHSCO) Isaiah 29 : 21 מחטיאי אדם בדבר ולמוכיח בשער יקשון ויטו בתהו צדיק׃ ס
(BHSCO) Isaiah 29 : 22 לכן כה־אמר יהוה אל־בית יעקב אשר פדה את־אברהם לא־עתה יבוש יעקב ולא עתה פניו יחורו׃
(BHSCO) Isaiah 29 : 23 כי בראתו ילדיו מעשה ידי בקרבו יקדישו שמי והקדישו את־קדוש יעקב ואת־אלהי ישראל יעריצו׃
(BHSCO) Isaiah 29 : 24 וידעו תעי־רוח בינה ורוגנים ילמדו־לקח׃