(BHSCO) Isaiah 36 : 1 ויהי בארבע עשרה שנה למלך חזקיהו עלה סנחריב מלך־אשור על כל־ערי יהודה הבצרות ויתפשם׃
(BHSCO) Isaiah 36 : 2 וישלח מלך־אשור את־רב־שקה מלכיש ירושלמה אל־המלך חזקיהו בחיל כבד ויעמד בתעלת הברכה העליונה במסלת שדה כובס׃
(BHSCO) Isaiah 36 : 3 ויצא אליו אליקים בן־חלקיהו אשר על־הבית ושבנא הספר ויואח בן־אסף המזכיר׃
(BHSCO) Isaiah 36 : 4 ויאמר אליהם רב־שקה אמרו־נא אל־חזקיהו כה־אמר המלך הגדול מלך אשור מה הבטחון הזה אשר בטחת׃
(BHSCO) Isaiah 36 : 5 אמרתי אך־דבר־שפתים עצה וגבורה למלחמה עתה על־מי בטחת כי מרדת בי׃
(BHSCO) Isaiah 36 : 6 הנה בטחת על־משענת הקנה הרצוץ הזה על־מצרים אשר יסמך איש עליו ובא בכפו ונקבה כן פרעה מלך־מצרים לכל־הבטחים עליו׃
(BHSCO) Isaiah 36 : 7 וכי־תאמר אלי אל־יהוה אלהינו בטחנו הלוא־הוא אשר הסיר חזקיהו את־במתיו ואת־מזבחתיו ויאמר ליהודה ולירושלם לפני המזבח הזה תשתחוו׃
(BHSCO) Isaiah 36 : 8 ועתה התערב נא את־אדני המלך אשור ואתנה לך אלפים סוסים אם־תוכל לתת לך רכבים עליהם׃
(BHSCO) Isaiah 36 : 9 ואיך תשיב את פני פחת אחד עבדי אדני הקטנים ותבטח לך על־מצרים לרכב ולפרשים׃
(BHSCO) Isaiah 36 : 10 ועתה המבלעדי יהוה עליתי על־הארץ הזאת להשחיתה יהוה אמר אלי עלה אל־הארץ הזאת והשחיתה׃
(BHSCO) Isaiah 36 : 11 ויאמר אליקים ושבנא ויואח אל־רב־שקה דבר־נא אל־עבדיך ארמית כי שמעים אנחנו ואל־תדבר אלינו יהודית באזני העם אשר על־החומה׃
(BHSCO) Isaiah 36 : 12 ויאמר רב־שקה האל אדניך ואליך שלחני אדני לדבר את־הדברים האלה הלא על־האנשים הישבים על־החומה לאכל את־[כ חראיהם] [ק צואתם] ולשתות את־[כ שיניהם] [ק מימי] [ק רגליהם] עםכם׃
(BHSCO) Isaiah 36 : 13 ויעמד רב־שקה ויקרא בקול־גדול יהודית ויאמר שמעו את־דברי המלך הגדול מלך אשור׃
(BHSCO) Isaiah 36 : 14 כה אמר המלך אל־ישא לכם חזקיהו כי לא־יוכל להציל אתכם׃
(BHSCO) Isaiah 36 : 15 ואל־יבטח אתכם חזקיהו אל־יהוה לאמר הצל יצילנו יהוה לא תנתן העיר הזאת ביד מלך אשור׃
(BHSCO) Isaiah 36 : 16 אל־תשמעו אל־חזקיהו ס כי כה אמר המלך אשור עשו־אתי ברכה וצאו אלי ואכלו איש־גפנו ואיש תאנתו ושתו איש מי־בורו׃
(BHSCO) Isaiah 36 : 17 עד־באי ולקחתי אתכם אל־ארץ כארצכם ארץ דגן ותירוש ארץ לחם וכרמים׃
(BHSCO) Isaiah 36 : 18 פן־יסית אתכם חזקיהו לאמר יהוה יצילנו ההצילו אלהי הגוים איש את־ארצו מיד מלך אשור׃
(BHSCO) Isaiah 36 : 19 איה אלהי חמת וארפד איה אלהי ספרוים וכי־הצילו את־שמרון מידי׃
(BHSCO) Isaiah 36 : 20 מי בכל־אלהי הארצות האלה אשר־הצילו את־ארצם מידי כי־יציל יהוה את־ירושלם מידי׃
(BHSCO) Isaiah 36 : 21 ויחרישו ולא־ענו אתו דבר כי־מצות המלך היא לאמר לא תענהו׃
(BHSCO) Isaiah 36 : 22 ויבא אליקים בן־חלקיהו אשר־על־הבית ושבנא הסופר ויואח בן־אסף המזכיר אל־חזקיהו קרועי בגדים ויגידו לו את דברי רב־שקה׃ ס