(BHSCO) Isaiah 37 : 1 ויהי כשמע המלך חזקיהו ויקרע את־בגדיו ויתכס בשק ויבא בית יהוה׃
(BHSCO) Isaiah 37 : 2 וישלח את־אליקים אשר־על־הבית ואת שבנא הסופר ואת זקני הכהנים מתכסים בשקים אל־ישעיהו בן־אמוץ הנביא׃
(BHSCO) Isaiah 37 : 3 ויאמרו אליו כה אמר חזקיהו יום־צרה ותוכחה ונאצה היום הזה כי באו בנים עד־משבר וכח אין ללדה׃
(BHSCO) Isaiah 37 : 4 אולי ישמע יהוה אלהיך את דברי רב־שקה אשר שלחו מלך־אשור אדניו לחרף אלהים חי והוכיח בדברים אשר שמע יהוה אלהיך ונשאת תפלה בעד השארית הנמצאה׃
(BHSCO) Isaiah 37 : 5 ויבאו עבדי המלך חזקיהו אל־ישעיהו׃
(BHSCO) Isaiah 37 : 6 ויאמר אליהם ישעיהו כה תאמרון אל־אדניכם כה אמר יהוה אל־תירא מפני הדברים אשר שמעת אשר גדפו נערי מלך־אשור אותי׃
(BHSCO) Isaiah 37 : 7 הנני נותן בו רוח ושמע שמועה ושב אל־ארצו והפלתיו בחרב בארצו׃
(BHSCO) Isaiah 37 : 8 וישב רב־שקה וימצא את־מלך אשור נלחם על־לבנה כי שמע כי נסע מלכיש׃
(BHSCO) Isaiah 37 : 9 וישמע על־תרהקה מלך־כוש לאמר יצא להלחם אתך וישמע וישלח מלאכים אל־חזקיהו לאמר׃
(BHSCO) Isaiah 37 : 10 כה תאמרון אל־חזקיהו מלך־יהודה לאמר אל־ישאכ* אלהיך אשר אתה בוטח בו לאמר לא תנתן ירושלם ביד מלך אשור׃
(BHSCO) Isaiah 37 : 11 הנה אתה שמעת אשר עשו מלכי אשור לכל־הארצות להחריםם ואתה תנצל׃
(BHSCO) Isaiah 37 : 12 ההצילו אותם אלהי הגוים אשר השחיתו אבותי את־גוזן ואת־חרן ורצף ובני־עדן אשר בתלשר׃
(BHSCO) Isaiah 37 : 13 איה מלך־חמת ומלך ארפד ומלך לעיר ספרוים הנע ועוה׃
(BHSCO) Isaiah 37 : 14 ויקח חזקיהו את־הספרים מיד המלאכים ויקראהו ויעל בית יהוה ויפרשהו חזקיהו לפני יהוה׃
(BHSCO) Isaiah 37 : 15 ויתפלל חזקיהו אל־יהוה לאמר׃
(BHSCO) Isaiah 37 : 16 יהוה צבאות אלהי ישראל ישב הכרבים אתה־הוא האלהים לבדך לכל ממלכות הארץ אתה עשית את־השמים ואת־הארץ׃
(BHSCO) Isaiah 37 : 17 הטה יהוה אזנך ושמע פקח יהוה עינך וראה ושמע את כל־דברי סנחריב אשר שלח לחרף אלהים חי׃
(BHSCO) Isaiah 37 : 18 אמנם יהוה החריבו מלכי אשור את־כל־הארצות ואת־ארצם׃
(BHSCO) Isaiah 37 : 19 ונתן את־אלהיהם באש כי לא אלהים המה כי אם־מעשה ידי־אדם עץ ואבן ויאבדום׃
(BHSCO) Isaiah 37 : 20 ועתה יהוה אלהינו הושיענו מידו וידעו כל־ממלכות הארץ כי־אתה יהוה לבדך׃
(BHSCO) Isaiah 37 : 21 וישלח ישעיהו בן־אמוץ אל־חזקיהו לאמר כה־אמר יהוה אלהי ישראל אשר התפללת אלי אל־סנחריב מלך אשור׃
(BHSCO) Isaiah 37 : 22 זה הדבר אשר־דבר יהוה עליו בזה לך לעגה לך בתולת בת־ציון אחריך ראש הניעה בת ירושלם׃
(BHSCO) Isaiah 37 : 23 את־מי חרפת וגדפת ועל־מי הרימותה קול ותשא מרום עיניך אל־קדוש ישראל׃
(BHSCO) Isaiah 37 : 24 ביד עבדיך חרפת אדני ותאמר ברב רכבי אני עליתי מרום הרים ירכתי לבנון ואכרת קומת ארזיו מבחר ברשיו ואבוא מרום קצו יער כרמלו׃
(BHSCO) Isaiah 37 : 25 אני קרתי ושתיתי מים ואחרב בכף־פעמי כל יארי מצור׃
(BHSCO) Isaiah 37 : 26 הלוא־שמעת למרחוק אותה עשיתי מימי קדם ויצרתיה עתה הבאתיה ותהי להשאות גלים נצים ערים בצרות׃
(BHSCO) Isaiah 37 : 27 וישביהן קצרי־יד חתו ובשו היו עשב שדה וירק דשא חציר גגות ושדמה לפני קמה׃
(BHSCO) Isaiah 37 : 28 ושבתך וצאתך ובואך ידעתי ואת התרגזך אלי׃
(BHSCO) Isaiah 37 : 29 יען התרגזך אלי ושאננך עלה באזני ושמתי חחי באפך ומתגי בשפתיך והשיבתיך בדרך אשר־באת בה׃
(BHSCO) Isaiah 37 : 30 וזה־לך האות אכול השנה ספיח ובשנה השנית שחיס ובשנה השלישית זרעו וקצרו ונטעו כרמים [כ ואכול] [ק ואכלו] פרים׃
(BHSCO) Isaiah 37 : 31 ויספה פליטת בית־יהודה הנשארה שרש למטה ועשה פרי למעלה׃
(BHSCO) Isaiah 37 : 32 כי מירושלם תצא שארית ופליטה מהר ציון קנאת יהוה צבאות תעשה־זאת׃ ס
(BHSCO) Isaiah 37 : 33 לכן כה־אמר יהוה אל־מלך אשור לא יבוא אל־העיר הזאת ולא־יורה שם חץ ולא־יקדמנה מגן ולא־ישפך עליה סללה׃
(BHSCO) Isaiah 37 : 34 בדרך אשר־בא בה ישוב ואל־העיר הזאת לא יבוא נאם־יהוה׃
(BHSCO) Isaiah 37 : 35 וגנותי על־העיר הזאת להושיעה למעני ולמען דוד עבדי׃ ס
(BHSCO) Isaiah 37 : 36 ויצא מלאך יהוה ויכה במחנה אשור מאה ושמנים וחמשה אלף וישכימו בבקר והנה כלם פגרים מתים׃
(BHSCO) Isaiah 37 : 37 ויסע וילך וישב סנחריב מלך־אשור וישב בנינוה׃
(BHSCO) Isaiah 37 : 38 ויהי הוא* משתחוה בית נסרך אלהיו ואדרמלך ושראצר בניו הכהו בחרב והמה נמלטו ארץ אררט וימלך אסר־חדן בנו תחתיו׃ ס