(BHSCO) Isaiah 40 : 1 נחמו נחמו עמי יאמר אלהיכם׃
(BHSCO) Isaiah 40 : 2 דברו על־לב ירושלם וקראו אליה כי מלאה צבאה כי נרצה עונה כי לקחה מיד יהוה כפלים בכל־חטאתיה׃ ס
(BHSCO) Isaiah 40 : 3 קול קורא במדבר פנו דרך יהוה ישרו בערבה מסלה לאלהינו׃
(BHSCO) Isaiah 40 : 4 כל־גיא ינשא וכל־הר וגבעה ישפלו והיה העקב למישור והרכסים לבקעה׃
(BHSCO) Isaiah 40 : 5 ונגלה כבוד יהוה וראו כל־בשר יחדו כי פי יהוה דבר׃ ס
(BHSCO) Isaiah 40 : 6 קול אמר קרא ואמר מה אקרא כל־הבשר חציר וכל־חסדו כציץ השדה׃
(BHSCO) Isaiah 40 : 7 יבש חציר נבל ציץ כי רוח יהוה נשבה בו אכן חציר העם׃
(BHSCO) Isaiah 40 : 8 יבש חציר נבל ציץ ודבר־אלהינו יקום לעולם׃ ס
(BHSCO) Isaiah 40 : 9 על הר־גבה עלי־לך מבשרת ציון הרימי בכח קולך מבשרת ירושלם הרימי אל־תיראי אמרי לערי יהודה הנה אלהיכם׃
(BHSCO) Isaiah 40 : 10 הנה אדני יהוה בחזק יבוא וזרעו משלה לו הנה שכרו אתו ופעלתו לפניו׃
(BHSCO) Isaiah 40 : 11 כרעה עדרו ירעה בזרעו יקבץ טלאים ובחיקו ישא עלות ינהל׃ ס
(BHSCO) Isaiah 40 : 12 מי־מדד בשעלו מים ושמים בזרת תכן וכל בשלש עפר הארץ ושקל בפלס הרים וגבעות במאזנים׃
(BHSCO) Isaiah 40 : 13 מי־תכן את־רוח* יהוה ואיש עצתו יודיענו׃
(BHSCO) Isaiah 40 : 14 את־מי נועץ ויבינהו וילמדהו בארח משפט וילמדהו דעת ודרך תבונות יודיענו׃
(BHSCO) Isaiah 40 : 15 הן גוים כמר מדלי וכשחק מאזנים נחשבו הן איים כדק יטול׃
(BHSCO) Isaiah 40 : 16 ולבנון אין די בער וחיתו אין די עולה׃ ס
(BHSCO) Isaiah 40 : 17 כל־הגוים כאין נגדו מאפס ותהו נחשבו־לו׃
(BHSCO) Isaiah 40 : 18 ואל־מי תדמיון אל ומה־דמות תערכו לו׃
(BHSCO) Isaiah 40 : 19 הפסל נסך חרש וצרף בזהב ירקענו ורתקות כסף צורף׃
(BHSCO) Isaiah 40 : 20 המסכן תרומה עץ לא־ירקב יבחר חרש חכם יבקש־לו להכין פסל לא ימוט׃
(BHSCO) Isaiah 40 : 21 הלוא תדעו הלוא תשמעו הלוא הגד מראש לכם הלוא הבינתם מוסדות הארץ׃
(BHSCO) Isaiah 40 : 22 הישב על־חוג הארץ וישביה כחגבים הנוטה כדק שמים וימתחם כאהל לשבת׃
(BHSCO) Isaiah 40 : 23 הנותן רוזנים לאין שפטי ארץ כתהו עשה׃
(BHSCO) Isaiah 40 : 24 אף בל־נטעו אף בל־זרעו אף בל־שרש בארץ גזעם וגם־נשף בהם ויבשו וסערה כקש תשאם׃ ס
(BHSCO) Isaiah 40 : 25 ואל־מי תדמיוני ואשוה יאמר קדוש׃
(BHSCO) Isaiah 40 : 26 שאו־מרום עיניכם וראו מי־ברא אלה המוציא במספר צבאם לכלם בשם יקרא מרב אונים ואמיץ כח איש לא נעדר׃ ס
(BHSCO) Isaiah 40 : 27 למה תאמר יעקב ותדבר ישראל נסתרה דרכי מיהוה ומאלהי משפטי יעבור׃
(BHSCO) Isaiah 40 : 28 הלוא ידעת אם־לא שמעת אלהי עולם יהוה בורא קצות הארץ לא ייעף ולא ייגע אין חקר לתבונתו׃
(BHSCO) Isaiah 40 : 29 נתן ליעף כח ולאין אונים עצמה ירבה׃
(BHSCO) Isaiah 40 : 30 ויעפו נערים ויגעו ובחורים כשול יכשלו׃
(BHSCO) Isaiah 40 : 31 וקוי יהוה יחליפו כח יעלו אבר כנשרים ירוצו ולא ייגעו ילכו ולא ייעפו׃ ף