(BHSCO) Isaiah 50 : 1 כה אמר יהוה אי זה ספר כריתות אםכם אשר שלחתיה או מי מנושי אשר־מכרתי אתכם לו הן בעונתיכם נמכרתם ובפשעיכם שלחה אםכם׃
(BHSCO) Isaiah 50 : 2 מדוע באתי ואין איש קראתי* ואין עונה הקצור קצרה ידי מפדות ואם־אין־בי כח להציל הן בגערתי אחריב ים אשים נהרות מדבר תבאש דגתם מאין מים ותמת בצמא׃
(BHSCO) Isaiah 50 : 3 אלביש שמים קדרות ושק אשים כסותם׃ ס
(BHSCO) Isaiah 50 : 4 אדני יהוה נתן לי לשון למודים לדעת לעות את־יעף דבר יעיר בבקר בבקר יעיר לי אזן לשמע כלמודים׃
(BHSCO) Isaiah 50 : 5 אדני יהוה פתח־לי אזן ואנכי לא מריתי אחור לא נסוגתי׃
(BHSCO) Isaiah 50 : 6 גוי נתתי למכים ולחיי למרטים פני לא הסתרתי מכלמות ורק׃
(BHSCO) Isaiah 50 : 7 ואדני יהוה יעזר־לי על־כן לא נכלמתי על־כן שמתי פני כחלמיש ואדע כי־לא אבוש׃
(BHSCO) Isaiah 50 : 8 קרוב מצדיקי מי־יריב אתי נעמדה יחד מי־בעל משפטי יגש אלי׃
(BHSCO) Isaiah 50 : 9 הן אדני יהוה יעזר־לי מי־הוא ירשיעני הן כלם כבגד יבלו עש יאכלם׃
(BHSCO) Isaiah 50 : 10 מי בכם ירא יהוה שמע בקול עבדו אשר הלך חשכים ואין נגה לו יבטח בשם יהוה וישען באלהיו׃
(BHSCO) Isaiah 50 : 11 הן כלכם קדחי אש מאזרי זיקות לכו באור אשכם ובזיקות בערתם מידי היתה־זאת לכם למעצבה תשכבון׃ ף