(BHSCO) Isaiah 60 : 1 קומי אורי כי בא אורך וכבוד יהוה עליך זרח׃
(BHSCO) Isaiah 60 : 2 כי־הנה החשך יכסה־ארץ וערפל לאמים ועליך יזרח יהוה וכבודו עליך יראה׃
(BHSCO) Isaiah 60 : 3 והלכו גוים לאורך ומלכים לנגה זרחך׃
(BHSCO) Isaiah 60 : 4 שאי־סביב עיניך וראי כלם נקבצו באו־לך בניך מרחוק יבאו ובנתיך על־צד תאמנה׃
(BHSCO) Isaiah 60 : 5 אז תראי ונהרת ופחד ורחב לבבך כי־יהפך עליך המון ים חיל גוים יבאו לך׃
(BHSCO) Isaiah 60 : 6 שפעת גמלים תכסך בכרי מדין ועיפה כלם משבא יבאו זהב ולבונה ישאו ותהלת יהוה יבשרו׃
(BHSCO) Isaiah 60 : 7 כל־צאן קדר יקבצו לך אילי נביות ישרתונך יעלו על־רצון מזבחי ובית תפארתי אפאר׃
(BHSCO) Isaiah 60 : 8 מי־אלה כעב תעופינה וכיונים אל־ארבתיהם׃
(BHSCO) Isaiah 60 : 9 כי־לי איים יקוו ואניות תרשיש בראשנה להביא בניך מרחוק כספם וזהבם אתם לשם יהוה אלהיך ולקדוש ישראל כי פארך׃
(BHSCO) Isaiah 60 : 10 ובנו בני־נכר חמתיך ומלכיהם ישרתונך כי בקצפי הכיתיך וברצוני רחמתיך׃
(BHSCO) Isaiah 60 : 11 ופתחו שעריך תמיד יוםם ולילה לא יסגרו* להביא אליך חיל גוים ומלכיהם נהוגים׃
(BHSCO) Isaiah 60 : 12 כי־הגוי והממלכה אשר לא־יעבדוך יאבדו והגוים חרב יחרבו׃
(BHSCO) Isaiah 60 : 13 כבוד הלבנון אליך יבוא ברוש תדהר ותאשור יחדו לפאר מקום מקדשי ומקום רגלי אכבד׃
(BHSCO) Isaiah 60 : 14 והלכו אליך שחוח בני מעניך והשתחוו על־כפות רגליך כל־מנאציך וקראו לך עיר יהוה ציון קדוש ישראל׃
(BHSCO) Isaiah 60 : 15 תחת היותך עזובה ושנואה ואין עובר ושמתיך לגאון עולם משוש דור ודור׃
(BHSCO) Isaiah 60 : 16 וינקת חלב גוים ושד מלכים תינקי וידעת כי אני יהוה מושיעך וגאלך אביר יעקב׃
(BHSCO) Isaiah 60 : 17 תחת הנחשת אביא זהב ותחת הברזל אביא כסף ותחת העצים נחשת ותחת האבנים ברזל ושמתי פקדתך שלום ונגשיך צדקה׃
(BHSCO) Isaiah 60 : 18 לא־ישמע עוד חמס בארצך שד ושבר בגבוליך וקראת ישועה חומתיך ושעריך תהלה׃
(BHSCO) Isaiah 60 : 19 לא־יהיה־לך עוד השמש לאור יוםם ולנגה הירח לא־יאיר לך והיה־לך יהוה לאור עולם ואלהיך לתפארתך׃
(BHSCO) Isaiah 60 : 20 לא־יבוא עוד שמשך וירחך לא יאסף כי יהוה יהיה־לך לאור עולם ושלמו ימי אבלך׃
(BHSCO) Isaiah 60 : 21 ועמך כלם צדיקים לעולם יירשו ארץ נצר [כ מטעו] [ק מטעי] מעשה ידי להתפאר׃
(BHSCO) Isaiah 60 : 22 הקטן יהיה לאלף והצעיר לגוי עצום אני יהוה בעתה אחישנה׃ ס