(BHSCO) Jeremiah 28 : 1 ויהי בשנה ההיא בראשית ממלכת צדקיה מלך־יהודה [כ בשנת] [ק בשנה] הרבעית בחדש החמישי אמר אלי חנניה בן־עזור הנביא אשר מגבעון בבית יהוה לעיני הכהנים וכל־העם לאמר׃
(BHSCO) Jeremiah 28 : 2 כה־אמר יהוה צבאות אלהי ישראל לאמר שברתי את־על מלך בבל׃
(BHSCO) Jeremiah 28 : 3 בעוד שנתים ימים אני משיב אל־המקום הזה את־כל־כלי בית יהוה אשר לקח נבוכדנאצר מלך־בבל מן־המקום הזה ויביאם בבל׃
(BHSCO) Jeremiah 28 : 4 ואת־יכניה בן־יהויקים מלך־יהודה ואת־כל־גלות יהודה הבאים בבלה אני משיב אל־המקום הזה נאם־יהוה כי אשבר את־על מלך בבל׃
(BHSCO) Jeremiah 28 : 5 ויאמר ירמיה הנביא אל־חנניה הנביא לעיני הכהנים ולעיני כל־העם העמדים בבית יהוה׃
(BHSCO) Jeremiah 28 : 6 ויאמר ירמיה הנביא אמן כן יעשה יהוה יקם יהוה את־דבריך אשר נבאת להשיב כלי בית־יהוה וכל־הגולה מבבל אל־המקום הזה׃
(BHSCO) Jeremiah 28 : 7 אך־שמע־נא הדבר הזה אשר אנכי דבר באזניך ובאזני כל־העם׃
(BHSCO) Jeremiah 28 : 8 הנביאים אשר היו לפני ולפניך מן־העולם וינבאו אל־ארצות רבות ועל־ממלכות גדלות למלחמה ולרעה ולדבר׃
(BHSCO) Jeremiah 28 : 9 הנביא אשר ינבא לשלום בבא דבר הנביא יודע הנביא אשר־שלחו יהוה באמת׃
(BHSCO) Jeremiah 28 : 10 ויקח חנניה הנביא את־המוטה מעל צואר ירמיה הנביא וישברהו׃
(BHSCO) Jeremiah 28 : 11 ויאמר חנניה לעיני כל־העם לאמר כה אמר יהוה ככה אשבר את־על נבכדנאצר מלך־בבל בעוד שנתים ימים מעל־צואר כל־הגוים וילך ירמיה הנביא לדרכו׃ ף
(BHSCO) Jeremiah 28 : 12 ויהי דבר־יהוה אל־ירמיה אחרי שבור חנניה הנביא את־המוטה מעל צואר ירמיה הנביא לאמר׃
(BHSCO) Jeremiah 28 : 13 הלוך ואמרת אל־חנניה לאמר כה אמר יהוה מוטת עץ שברת ועשית תחתיהן מטות ברזל׃
(BHSCO) Jeremiah 28 : 14 כי כה־אמר יהוה צבאות אלהי ישראל על ברזל נתתי על־צואר כל־הגוים האלה לעבד את־נבכדנאצר מלך־בבל ועבדהו וגם את־חית השדה נתתי לו׃
(BHSCO) Jeremiah 28 : 15 ויאמר ירמיה הנביא אל־חנניה הנביא שמע־נא חנניה לא־שלחך יהוה ואתה הבטחת את־העם הזה על־שקר׃
(BHSCO) Jeremiah 28 : 16 לכן כה אמר יהוה הנני משלחך מעל פני האדמה השנה אתה מת כי־סרה דברת אל־יהוה׃
(BHSCO) Jeremiah 28 : 17 וימת חנניה הנביא בשנה ההיא בחדש השביעי׃ ף