(BHSCO) Jeremiah 5 : 1 שוטטו בחוצות ירושלם וראו־נא ודעו ובקשו ברחובותיה אם־תמצאו איש אם־יש עשה משפט מבקש אמונה ואסלח לה׃
(BHSCO) Jeremiah 5 : 2 ואם חי־יהוה יאמרו לכן לשקר ישבעו׃
(BHSCO) Jeremiah 5 : 3 יהוה עיניך הלוא לאמונה הכיתה אתם ולא־חלו כליתם מאנו קחת מוסר חזקו פניהם מסלע מאנו לשוב׃
(BHSCO) Jeremiah 5 : 4 ואני אמרתי אך־דלים הם נואלו כי לא ידעו דרך יהוה משפט אלהיהם׃
(BHSCO) Jeremiah 5 : 5 אלכה־לי אל־הגדלים ואדברה אותם כי המה ידעו דרך יהוה משפט אלהיהם אך המה יחדו שברו על נתקו מוסרות׃
(BHSCO) Jeremiah 5 : 6 על־כן הכם אריה מיער זאב ערבות ישדדם נמר שקד על־עריהם כל־היוצא מהנה יטרף כי רבו פשעיהם עצמו [כ משבותיהם]׃ [ק משובותיהם]׃*
(BHSCO) Jeremiah 5 : 7 אי לזאת [כ אסלוח] [ק אסלח]־לך בניך עזבוני וישבעו בלא אלהים ואשבע אותם וינאפו ובית זונה יתגדדו׃
(BHSCO) Jeremiah 5 : 8 סוסים מיזנים משכים היו איש אל־אשת רעהו יצהלו׃
(BHSCO) Jeremiah 5 : 9 העל־אלה לוא־אפקד נאם־יהוה ואם בגוי אשר־כזה לא תתנקם נפשי׃ ס
(BHSCO) Jeremiah 5 : 10 עלו בשרותיה ושחתו וכלה אל־תעשו הסירו נטישותיה כי לוא ליהוה המה׃
(BHSCO) Jeremiah 5 : 11 כי בגוד בגדו בי בית ישראל ובית יהודה נאם־יהוה׃
(BHSCO) Jeremiah 5 : 12 כחשו ביהוה ויאמרו לא־הוא ולא־תבוא עלינו רעה וחרב ורעב לוא נראה׃
(BHSCO) Jeremiah 5 : 13 והנביאים יהיו לרוח והדבר אין בהם כה יעשה להם׃ ס
(BHSCO) Jeremiah 5 : 14 לכן כה־אמר יהוה אלהי צבאות יען דברכם את־הדבר הזה הנני נתן דברי בפיך לאש והעם הזה עצים ואכלתם׃
(BHSCO) Jeremiah 5 : 15 הנני מביא עליכם גוי ממרחק בית ישראל נאם־יהוה גוי איתן הוא גוי מעולם הוא גוי לא־תדע לשנו ולא תשמע מה־ידבר׃
(BHSCO) Jeremiah 5 : 16 אשפתו כקבר פתוח כלם גבורים׃
(BHSCO) Jeremiah 5 : 17 ואכל קצירך ולחמך יאכלו בניך ובנותיך יאכל צאנך ובקרך יאכל גפנך ותאנתך ירשש ערי מבצריך אשר אתה בוטח בהנה בחרב׃
(BHSCO) Jeremiah 5 : 18 וגם בימים ההמה נאם־יהוה לא־אעשה אתכם כלה׃
(BHSCO) Jeremiah 5 : 19 והיה כי תאמרו תחת מה עשה יהוה אלהינו לנו את־כל־אלה ואמרת אליהם כאשר עזבתם אותי ותעבדו אלהי נכר בארצכם כן תעבדו זרים בארץ לא לכם׃ ס
(BHSCO) Jeremiah 5 : 20 הגידו זאת בבית יעקב והשמיעוה ביהודה לאמר׃
(BHSCO) Jeremiah 5 : 21 שמעו־נא זאת עם סכל ואין לב עינים להם ולא יראו אזנים להם ולא ישמעו׃
(BHSCO) Jeremiah 5 : 22 האותי לא־תיראו נאם־יהוה אם מפני לא תחילו אשר־שמתי חול גבול לים חק־עולם ולא יעברנהו ויתגעשו ולא יוכלו והמו גליו ולא יעברנהו׃
(BHSCO) Jeremiah 5 : 23 ולעם הזה היה לב סורר ומורה סרו וילכו׃
(BHSCO) Jeremiah 5 : 24 ולא־אמרו בלבבם נירא נא את־יהוה אלהינו הנתן גשם [כ וירה] [ק יורה] ומלקוש בעתו שבעות חקות קציר ישמר־לנו׃
(BHSCO) Jeremiah 5 : 25 עונותיכם הטו־אלה וחטאותיכם מנעו הטוב םכם׃
(BHSCO) Jeremiah 5 : 26 כי־נמצאו בעמי רשעים ישור כשך יקושים הציבו משחית אנשים ילכדו׃
(BHSCO) Jeremiah 5 : 27 ככלוב מלא עוף כן בתיהם מלאים מרמה על־כן גדלו ויעשירו׃
(BHSCO) Jeremiah 5 : 28 שמנו עשתו גם עברו דברי־רע דין לא־דנו דין יתום ויצליחו ומשפט אביונים לא שפטו׃
(BHSCO) Jeremiah 5 : 29 העל־אלה לא־אפקד נאם־יהוה אם בגוי אשר־כזה לא תתנקם נפשי׃ ס
(BHSCO) Jeremiah 5 : 30 שמה ושערורה נהיתה בארץ׃
(BHSCO) Jeremiah 5 : 31 הנביאים נבאו־בשקר והכהנים ירדו על־ידיהם ועמי אהבו כן ומה־תעשו לאחריתה׃