(BHSCO) Job 20 : 1 ויען צפר הנעמתי ויאמר׃
(BHSCO) Job 20 : 2 לכן שעפי ישיבוני ובעבור חושי בי׃
(BHSCO) Job 20 : 3 מוסר כלמתי אשמע ורוח מבינתי יענני׃
(BHSCO) Job 20 : 4 הזאת ידעת מני־עד מני שים אדם עלי־ארץ׃
(BHSCO) Job 20 : 5 כי רננת רשעים מקרוב ושמחת חנף עדי־רגע׃
(BHSCO) Job 20 : 6 אם־יעלה לשמים שיאו וראשו לעב יגיע׃
(BHSCO) Job 20 : 7 כגללו לנצח יאבד ראיו יאמרו איו׃
(BHSCO) Job 20 : 8 כחלום יעוף ולא ימצאוהו וידד כחזיון לילה׃
(BHSCO) Job 20 : 9 עין שזפתו ולא תוסיף ולא־עוד תשורנו מקומו׃
(BHSCO) Job 20 : 10 בניו ירצו דלים וידיו תשבנה אונו׃
(BHSCO) Job 20 : 11 עצמותיו מלאו [כ עלומו] [ק עלומיו] ועמו על־עפר תשכב׃
(BHSCO) Job 20 : 12 אם־תמתיק בפיו רעה יכחידנה תחת לשונו׃
(BHSCO) Job 20 : 13 יחמל עליה ולא יעזבנה וימנענה בתוך חכו׃
(BHSCO) Job 20 : 14 לחמו במעיו נהפך מרורת פתנים בקרבו׃
(BHSCO) Job 20 : 15 חיל בלע ויקאנו מבטנו יורשנו* אל׃
(BHSCO) Job 20 : 16 ראש־פתנים יינק תהרגהו לשון אפעה׃
(BHSCO) Job 20 : 17 אל־ירא בפלגות נהרי נחלי דבש וחמאה׃
(BHSCO) Job 20 : 18 משיב יגע ולא יבלע כחיל תמורתו ולא יעלס׃
(BHSCO) Job 20 : 19 כי־רץץ עזב דלים בית גזל ולא יבנהו׃
(BHSCO) Job 20 : 20 כי לא־ידע שלו בבטנו בחמודו לא ימלט׃
(BHSCO) Job 20 : 21 אין־שריד לאכלו על־כן לא־יחיל טובו׃
(BHSCO) Job 20 : 22 במלאות שפקו יצר לו כל־יד עמל תבואנו׃
(BHSCO) Job 20 : 23 יהי למלא בטנו ישלח־בו חרון אפו וימטר עלימו בלחומו׃
(BHSCO) Job 20 : 24 יברח מנשק ברזל תחלפהו קשת נחושה׃
(BHSCO) Job 20 : 25 שלף ויצא מגוה וברק ממררתו יהלך עליו אמים׃
(BHSCO) Job 20 : 26 כל־חשך טמון לצפוניו* תאכלהו אש לא־נפח ירע שריד באהלו׃
(BHSCO) Job 20 : 27 יגלו שמים עונו וארץ מתקוממה לו׃
(BHSCO) Job 20 : 28 יגל יבול ביתו נגרות ביום אפו׃
(BHSCO) Job 20 : 29 זה חלק־אדם רשע מאלהים ונחלת אמרו מאל׃ ף