(BHSCO) Job 21 : 1 ויען איוב ויאמר׃
(BHSCO) Job 21 : 2 שמעו שמוע מלתי ותהי־זאת תנחומתיכם׃
(BHSCO) Job 21 : 3 שאוני ואנכי אדבר ואחר דברי תלעיג׃
(BHSCO) Job 21 : 4 האנכי לאדם שיחי ואם־מדוע לא־תקצר רוחי׃
(BHSCO) Job 21 : 5 פנו־אלי והשמו ושימו יד על־פה׃
(BHSCO) Job 21 : 6 ואם־זכרתי ונבהלתי ואחז בשרי פלצות׃
(BHSCO) Job 21 : 7 מדוע רשעים יחיו עתקו גם־גברו חיל׃
(BHSCO) Job 21 : 8 זרעם נכון לפניהם עםם וצאצאיהם לעיניהם׃
(BHSCO) Job 21 : 9 בתיהם שלום מפחד ולא שבט אלוה עליהם׃
(BHSCO) Job 21 : 10 שורו עבר ולא יגעל תפלט פרתו ולא תשכל׃
(BHSCO) Job 21 : 11 ישלחו כצאן עויליהם וילדיהם ירקדון׃
(BHSCO) Job 21 : 12 ישאו כתף וכנור וישמחו לקול עוגב׃
(BHSCO) Job 21 : 13 [כ יבלו] [ק יכלו] בטוב ימיהם וברגע שאול יחתו׃
(BHSCO) Job 21 : 14 ויאמרו לאל סור ממנו ודעת דרכיך לא חפצנו׃
(BHSCO) Job 21 : 15 מה־שדי כי־נעבדנו ומה־נועיל כי נפגע־בו׃
(BHSCO) Job 21 : 16 הן לא בידם טובם עצת רשעים רחקה מני׃
(BHSCO) Job 21 : 17 כמה נר־רשעים ידעך ויבא עלימו אידם חבלים יחלק באפו׃
(BHSCO) Job 21 : 18 יהיו כתבן לפני־רוח וכמץ גנבתו סופה׃
(BHSCO) Job 21 : 19 אלוה יצפן־לבניו אונו ישלם אליו וידע׃
(BHSCO) Job 21 : 20 יראו [כ עינו] [ק עיניו] כידו ומחמת שדי ישתה׃
(BHSCO) Job 21 : 21 כי מה־חפצו בביתו אחריו ומספר חדשיו חצצו׃
(BHSCO) Job 21 : 22 הלאל ילמד־דעת והוא רמים ישפוט׃
(BHSCO) Job 21 : 23 זה ימות בעצם תמו כלו שלאןן ושליו׃
(BHSCO) Job 21 : 24 עטיניו מלאו חלב ומח עצמותיו ישקה׃
(BHSCO) Job 21 : 25 וזה ימות בנפש מרה ולא־אכל בטובה׃
(BHSCO) Job 21 : 26 יחד על־עפר ישכבו ורמה תכסה עליהם׃
(BHSCO) Job 21 : 27 הן ידעתי מחשבותיכם ומזמות עלי תחמסו׃
(BHSCO) Job 21 : 28 כי תאמרו איה בית־נדיב ואיה אהל משכנות רשעים׃
(BHSCO) Job 21 : 29 הלא שאלתם עוברי דרך ואתתם לא תנכרו׃
(BHSCO) Job 21 : 30 כי ליום איד יחשך רע ליום עברות יובלו׃
(BHSCO) Job 21 : 31 מי־יגיד על־פניו דרכו והוא־עשה מי ישלם־לו׃
(BHSCO) Job 21 : 32 והוא לקברות יובל ועל־גדיש ישקוד׃
(BHSCO) Job 21 : 33 מתקו־לו רגבי נחל ואחריו כל־אדם ימשוך ולפניו אין מספר׃
(BHSCO) Job 21 : 34 ואיך תנחמוני הבל ותשובתיכם נשאר־מעל׃ ס