(BHSCO) Job 27 : 1 ויסף איוב שאת משלו ויאמר׃
(BHSCO) Job 27 : 2 חי־אל הסיר משפטי ושדי המר נפשי׃
(BHSCO) Job 27 : 3 כי־כל־עוד נשמתי בי ורוח אלוה באפי׃
(BHSCO) Job 27 : 4 אם־תדברנה שפתי עולה ולשוני אם־יהגה רמיה׃
(BHSCO) Job 27 : 5 חלילה לי אם־אצדיק אתכם עד־אגוע לא־אסיר תמתי ממני׃
(BHSCO) Job 27 : 6 בצדקתי החזקתי ולא ארפה לא־יחרף לבבי מימי׃
(BHSCO) Job 27 : 7 יהי כרשע איבי ומתקוממי כעול׃
(BHSCO) Job 27 : 8 כי מה־תקות חנף כי יבצע כי ישל אלוה נפשו׃
(BHSCO) Job 27 : 9 הצעקתו ישמע אל כי־תבוא עליו צרה׃
(BHSCO) Job 27 : 10 אם־על־שדי יתענג יקרא אלוה בכל־עת׃
(BHSCO) Job 27 : 11 אורה אתכם ביד־אל אשר עם־שדי לא אכחד׃
(BHSCO) Job 27 : 12 הן־אתם כלכם חזיתם ולמה־זה הבל תהבלו׃
(BHSCO) Job 27 : 13 זה חלק־אדם רשע עם־אל ונחלת עריצים משדי יקחו׃
(BHSCO) Job 27 : 14 אם־ירבו בניו למו־חרב וצאצאיו לא ישבעו־לחם׃
(BHSCO) Job 27 : 15 [כ שרידו] [ק שרידיו] במות יקברו ואלמנתיו לא תבכינה׃
(BHSCO) Job 27 : 16 אם־יצבר כעפר כסף וכחמר יכין מלבוש׃
(BHSCO) Job 27 : 17 יכין וצדיק ילבש וכסף נקי יחלק׃
(BHSCO) Job 27 : 18 בנה כעש ביתו וכסכה עשה נצר׃
(BHSCO) Job 27 : 19 עשיר ישכב ולא יאסף עיניו פקח ואיננו׃
(BHSCO) Job 27 : 20 תשיגהו* כמים בלהות לילה גנבתו סופה׃
(BHSCO) Job 27 : 21 ישאהו קדים וילך וישערהו ממקמו׃
(BHSCO) Job 27 : 22 וישלך עליו ולא יחמל מידו ברוח יברח׃
(BHSCO) Job 27 : 23 ישפק עלימו כפימו וישרק עליו ממקמו׃