(BHSCO) Job 4 : 1 ויען אליפז התימני ויאמר׃
(BHSCO) Job 4 : 2 הנסה דבר אליך תלאה ועצר במלין מי יוכל׃
(BHSCO) Job 4 : 3 הנה יסרת רבים וידים רפות תחזק׃
(BHSCO) Job 4 : 4 כושל יקימון מליך וברכים כרעות תאמץ׃
(BHSCO) Job 4 : 5 כי עתה תבוא אליך ותלא תגע עדיך ותבהל׃
(BHSCO) Job 4 : 6 הלא יראתך כסלתך תקותך ותם דרכיך׃
(BHSCO) Job 4 : 7 זכר־נא מי הוא נקי אבד ואיפה ישרים נכחדו׃
(BHSCO) Job 4 : 8 כאשר ראיתי חרשי און וזרעי עמל יקצרהו׃
(BHSCO) Job 4 : 9 מנשמת אלוה יאבדו ומרוח אפו יכלו׃
(BHSCO) Job 4 : 10 שאגת אריה וקול שחל ושני כפירים נתעו׃
(BHSCO) Job 4 : 11 ליש אבד מבלי־טרף ובני לביא יתפרדו׃
(BHSCO) Job 4 : 12 ואלי דבר יגנב ותקח אזני שמץ מנהו׃
(BHSCO) Job 4 : 13 בשעפים מחזינות לילה בנפל תרדמה על־אנשים׃
(BHSCO) Job 4 : 14 פחד קראני ורעדה ורב עצמותי הפחיד׃
(BHSCO) Job 4 : 15 ורוח על־פני יחלף תסמר שערת בשרי׃
(BHSCO) Job 4 : 16 יעמד ולא־אכיר מראהו תמונה לנגד עיני דממה וקול אשמע׃
(BHSCO) Job 4 : 17 האנוש מאלוה יצדק אמ* מעשהו יטהר־גבר׃
(BHSCO) Job 4 : 18 הן בעבדיו לא יאמין ובמלאכיו ישים תהלה׃
(BHSCO) Job 4 : 19 אף שכני בתי־חמר אשר־בעפר יסודם ידכאום לפני־עש׃
(BHSCO) Job 4 : 20 מבקר לערב יכתו מבלי משים לנצח יאבדו׃
(BHSCO) Job 4 : 21 הלא־נסע יתרם בם ימותו ולא בחכמה׃