(BHSCO) Judges 10 : 1 ויקם אחרי אבימלך להושיע את־ישראל תולע בן־פואה בן־דודו איש יששכר והוא־ישב בשמיר בהר אפרים׃
(BHSCO) Judges 10 : 2 וישפט את־ישראל עשרים ושלש שנה וימת ויקבר בשמיר׃ ף
(BHSCO) Judges 10 : 3 ויקם אחריו יאיר הגלעדי וישפט את־ישראל עשרים ושתים שנה׃
(BHSCO) Judges 10 : 4 ויהי־לו שלשים בנים רכבים על־שלשים עירים ושלשים עירים להם להם יקראו חות יאיר עד היום הזה אשר בארץ הגלעד׃
(BHSCO) Judges 10 : 5 וימת יאיר ויקבר בקמון׃ ף
(BHSCO) Judges 10 : 6 ויספו בני ישראל לעשות הרע בעיני יהוה ויעבדו את־הבעלים ואת־העשתרות ואת־אלהי ארם ואת־אלהי צידון ואת אלהי מואב ואת אלהי בני־עמון ואת אלהי פלשתים ויעזבו את־יהוה ולא עבדוהו׃
(BHSCO) Judges 10 : 7 ויחר־אף יהוה בישראל וימכרם ביד־פלשתים וביד בני עמון׃
(BHSCO) Judges 10 : 8 וירעצו וירצצו את־בני ישראל בשנה ההיא שמנה עשרה שנה את־כל־בני ישראל אשר בעבר הירדן בארץ האמרי אשר בגלעד׃
(BHSCO) Judges 10 : 9 ויעברו בני־עמון את־הירדן להלחם גם־ביהודה ובבנימין ובבית אפרים ותצר לישראל מאד׃
(BHSCO) Judges 10 : 10 ויזעקו בני ישראל אל־יהוה לאמר חטאנו לך וכי עזבנו את־אלהינו ונעבד את־הבעלים׃ ף
(BHSCO) Judges 10 : 11 ויאמר יהוה אל־בני ישראל הלא ממצרים ומן־האמרי ומן־בני עמון ומן־פלשתים׃
(BHSCO) Judges 10 : 12 וצידונים ועמלק ומעון לחצו אתכם ותצעקו אלי ואושיעה אתכם מידם׃
(BHSCO) Judges 10 : 13 ואתם עזבתם אותי ותעבדו אלהים אחרים לכן לא־אוסיף להושיע אתכם׃
(BHSCO) Judges 10 : 14 לכו וזעקו אל־האלהים אשר בחרתם בם המה יושיעו לכם בעת צרתכם׃
(BHSCO) Judges 10 : 15 ויאמרו בני־ישראל אל־יהוה חטאנו עשה־אתה לנו ככל־הטוב בעיניך אך הצילנו נא היום הזה׃
(BHSCO) Judges 10 : 16 ויסירו את־אלהי הנכר מקרבם ויעבדו את־יהוה ותקצר נפשו בעמל ישראל׃ ף
(BHSCO) Judges 10 : 17 ויצעקו בני עמון ויחנו בגלעד ויאספו בני ישראל ויחנו במצפה׃
(BHSCO) Judges 10 : 18 ויאמרו העם שרי גלעד איש אל־רעהו מי האיש אשר יחל להלחם בבני עמון יהיה לראש לכל ישבי גלעד׃ ף