(BHSCO) Leviticus 18 : 1 וידבר יהוה אל־משה לאמר׃
(BHSCO) Leviticus 18 : 2 דבר אל־בני ישראל ואמרת אלהם אני יהוה אלהיכם׃
(BHSCO) Leviticus 18 : 3 כמעשה ארץ־מצרים אשר ישבתם־בה לא תעשו וכמעשה ארץ־כנען אשר אני מביא אתכם שמה לא תעשו ובחקתיהם לא תלכו׃
(BHSCO) Leviticus 18 : 4 את־משפטי תעשו ואת־חקתי תשמרו ללכת בהם אני יהוה אלהיכם׃
(BHSCO) Leviticus 18 : 5 ושמרתם את־חקתי ואת־משפטי אשר יעשה אתם האדם וחי בהם אני יהוה׃ ס
(BHSCO) Leviticus 18 : 6 איש איש אל־כל־שאר בשרו לא תקרבו לגלות ערוה אני יהוה׃ ס
(BHSCO) Leviticus 18 : 7 ערות אביך וערות אמך לא תגלה אמך הוא לא תגלה ערותה׃ ס
(BHSCO) Leviticus 18 : 8 ערות אשת־אביך לא תגלה ערות אביך הוא׃ ס
(BHSCO) Leviticus 18 : 9 ערות אחותך בת־אביך או בת־אמך מולדת בית או מולדת חוץ לא תגלה ערותן׃ ס
(BHSCO) Leviticus 18 : 10 ערות בת־בנך או בת־בתך לא תגלה ערותן כי ערותך הנה׃ ס
(BHSCO) Leviticus 18 : 11 ערות בת־אשת אביך מולדת אביך אחותך הוא לא תגלה ערותה׃ ס
(BHSCO) Leviticus 18 : 12 ערות אחות־אביך לא תגלה שאר אביך הוא׃ ס
(BHSCO) Leviticus 18 : 13 ערות אחות־אמך לא תגלה כי־שאר אמך הוא׃ ס
(BHSCO) Leviticus 18 : 14 ערות אחי־אביך לא תגלה אל־אשתו לא תקרב דדתך הוא׃ ס
(BHSCO) Leviticus 18 : 15 ערות כלתך לא תגלה אשת בנך הוא לא תגלה ערותה׃ ס
(BHSCO) Leviticus 18 : 16 ערות אשת־אחיך לא תגלה ערות אחיך הוא׃ ס
(BHSCO) Leviticus 18 : 17 ערות אשה ובתה לא תגלה את־בת־בנה ואת־בת־בתה לא תקח לגלות ערותה שארה הנה זמה הוא׃
(BHSCO) Leviticus 18 : 18 ואשה אל־אחתה לא תקח לצרר לגלות ערותה עליה בחייה׃
(BHSCO) Leviticus 18 : 19 ואל־אשה בנדת טמאתה לא תקרב לגלות ערותה׃
(BHSCO) Leviticus 18 : 20 ואל־אשת עמיתך לא־תתן שכבתך לזרע לטמאה־בה׃
(BHSCO) Leviticus 18 : 21 ומזרעך לא־תתן להעביר למלך ולא תחלל את־שם אלהיך אני יהוה׃
(BHSCO) Leviticus 18 : 22 ואת־זכר לא תשכב משכבי אשה תועבה הוא׃
(BHSCO) Leviticus 18 : 23 ובכל־בהמה לא־תתן שכבתך לטמאה־בה ואשה לא־תעמד לפני בהמה לרבעה תבל הוא׃
(BHSCO) Leviticus 18 : 24 אל־תטמאו בכל־אלה כי בכל־אלה נטמאו הגוים אשר־אני משלח מפניכם׃
(BHSCO) Leviticus 18 : 25 ותטמא הארץ ואפקד עונה עליה ותקא הארץ את־ישביה׃
(BHSCO) Leviticus 18 : 26 ושמרתם אתם את־חקתי ואת־משפטי ולא תעשו מכל התועבת האלה האזרח והגר הגר בתוככם׃
(BHSCO) Leviticus 18 : 27 כי את־כל־התועבת האל עשו אנשי־הארץ אשר לפניכם ותטמא הארץ׃
(BHSCO) Leviticus 18 : 28 ולא־תקיא הארץ אתכם בטמאכם אתה כאשר קאה את־הגוי אשר לפניכם׃
(BHSCO) Leviticus 18 : 29 כי כל־אשר יעשה מכל התועבות האלה ונכרתו הנפשות העשת מקרב עםם׃
(BHSCO) Leviticus 18 : 30 ושמרתם את־משמרתי לבלתי עשות מחקות התועבת אשר נעשו לפניכם ולא תטמאו בהם אני יהוה אלהיכם׃ ף