(BHSCO) Leviticus 4 : 1 וידבר יהוה אל־משה לאמר׃
(BHSCO) Leviticus 4 : 2 דבר אל־בני ישראל לאמר נפש כי־תחטא בשגגה מכל מצות יהוה אשר לא תעשינה ועשה מאחת מהנה׃
(BHSCO) Leviticus 4 : 3 אם הכהן המשיח יחטא לאשמת העם והקריב על חטאתו אשר חטא פר בן־בקר תמים ליהוה לחטאת׃
(BHSCO) Leviticus 4 : 4 והביא את־הפר אל־פתח אהל מועד לפני יהוה וסמך את־ידו על־ראש הפר ושחט את־הפר לפני יהוה׃
(BHSCO) Leviticus 4 : 5 ולקח הכהן המשיח מדם הפר והביא אתו אל־אהל מועד׃
(BHSCO) Leviticus 4 : 6 וטבל הכהן את־אצבעו בדם והזה מן־הדם שבע פעמים לפני יהוה את־פני פרכת הקדש׃
(BHSCO) Leviticus 4 : 7 ונתן הכהן מן־הדם על־קרנות מזבח קטרת הסמים לפני יהוה אשר באהל מועד ואת כל־דם הפר ישפך אל־יסוד מזבח העלה אשר־פתח אהל מועד׃
(BHSCO) Leviticus 4 : 8 ואת־כל־חלב פר החטאת ירים ממנו את־החלב המכסה על־הקרב ואת כל־החלב אשר על־הקרב׃
(BHSCO) Leviticus 4 : 9 ואת שתי הכלית ואת־החלב אשר עליהן אשר על־הכסלים ואת־היתרת על־הכבד על־הכליות יסירנה׃
(BHSCO) Leviticus 4 : 10 כאשר יורם משור זבח השלמים והקטירם הכהן על מזבח העלה׃
(BHSCO) Leviticus 4 : 11 ואת־עור הפר ואת־כל־בשרו על־ראשו ועל־כרעיו וקרבו ופרשו׃
(BHSCO) Leviticus 4 : 12 והוציא את־כל־הפר אל־מחוץ למחנה אל־מקום טהור אל־שפך הדשן ושרף אתו על־עצים באש על־שפך הדשן ישרף׃ ף
(BHSCO) Leviticus 4 : 13 ואם כל־עדת ישראל ישגו ונעלם דבר מעיני הקהל ועשו אחת מכל־מצות יהוה אשר לא־תעשינה ואשמו׃
(BHSCO) Leviticus 4 : 14 ונודעה החטאת אשר חטאו עליה והקריבו הקהל פר בן־בקר לחטאת והביאו אתו לפני אהל מועד׃
(BHSCO) Leviticus 4 : 15 וסמכו זקני העדה את־ידיהם על־ראש הפר לפני יהוה ושחט את־הפר לפני יהוה׃
(BHSCO) Leviticus 4 : 16 והביא הכהן המשיח מדם הפר אל־אהל מועד׃
(BHSCO) Leviticus 4 : 17 וטבל הכהן אצבעו מן־הדם והזה שבע פעמים לפני יהוה את פני הפרכת׃
(BHSCO) Leviticus 4 : 18 ומן־הדם יתן על־קרנת המזבח אשר לפני יהוה אשר באהל מועד ואת כל־הדם ישפך אל־יסוד מזבח העלה אשר־פתח אהל מועד׃
(BHSCO) Leviticus 4 : 19 ואת כל־חלבו ירים ממנו והקטיר המזבחה׃
(BHSCO) Leviticus 4 : 20 ועשה לפר כאשר עשה לפר החטאת כן יעשה־לו וכפר עלהם הכהן ונסלח להם׃
(BHSCO) Leviticus 4 : 21 והוציא את־הפר אל־מחוץ למחנה ושרף אתו כאשר שרף את הפר הראשון חטאת הקהל הוא׃ ף
(BHSCO) Leviticus 4 : 22 אשר נשיא יחטא ועשה אחת מכל־מצות יהוה אלהיו אשר לא־תעשינה בשגגה ואשם׃
(BHSCO) Leviticus 4 : 23 או־הודע אליו חטאתו אשר חטא בה והביא את־קרבנו שעיר עזים זכר תמים׃
(BHSCO) Leviticus 4 : 24 וסמך ידו על־ראש השעיר ושחט אתו במקום אשר־ישחט את־העלה לפני יהוה חטאת הוא׃
(BHSCO) Leviticus 4 : 25 ולקח הכהן מדם החטאת באצבעו ונתן על־קרנת מזבח העלה ואת־דמו ישפך אל־יסוד מזבח העלה׃
(BHSCO) Leviticus 4 : 26 ואת־כל־חלבו יקטיר המזבחה כחלב זבח השלמים וכפר עליו הכהן מחטאתו ונסלח לו׃ ף
(BHSCO) Leviticus 4 : 27 ואם־נפש אחת תחטא בשגגה מעם הארץ בעשתה אחת ממצות יהוה אשר לא־תעשינה ואשם׃
(BHSCO) Leviticus 4 : 28 או הודע אליו חטאתו אשר חטא והביא קרבנו שעירת עזים תמימה נקבה על־חטאתו אשר חטא׃
(BHSCO) Leviticus 4 : 29 וסמך את־ידו על ראש החטאת ושחט את־החטאת במקום העלה׃
(BHSCO) Leviticus 4 : 30 ולקח הכהן מדמה באצבעו ונתן על־קרנת מזבח העלה ואת־כל־דמה ישפך אל־יסוד המזבח׃
(BHSCO) Leviticus 4 : 31 ואת־כל־חלבה יסיר כאשר הוסר חלב מעל זבח השלמים והקטיר הכהן המזבחה לריח ניחח ליהוה וכפר עליו הכהן ונסלח לו׃ ף
(BHSCO) Leviticus 4 : 32 ואם־כבש יביא קרבנו לחטאת נקבה תמימה יביאנה׃
(BHSCO) Leviticus 4 : 33 וסמך את־ידו על ראש החטאת ושחט אתה לחטאת במקום אשר ישחט את־העלה׃
(BHSCO) Leviticus 4 : 34 ולקח הכהן מדם החטאת באצבעו ונתן על־קרנת מזבח העלה ואת־כל־דמה ישפך אל־יסוד המזבח׃
(BHSCO) Leviticus 4 : 35 ואת־כל־חלבה יסיר כאשר יוסר חלב־הכשב מזבח השלמים והקטיר הכהן אתם המזבחה על אשי יהוה וכפר עליו הכהן על־חטאתו אשר־חטא ונסלח לו׃ ף