(BHSCO) Proverbs 17 : 1 טוב פת חרבה ושלוה־בה מבית מלא זבחי־ריב׃
(BHSCO) Proverbs 17 : 2 עבד־משכיל ימשל בבן מביש ובתוך אחים יחלק נחלה׃
(BHSCO) Proverbs 17 : 3 מצרף לכסף וכור לזהב ובחן לבות יהוה׃
(BHSCO) Proverbs 17 : 4 מרע מקשיב על־שפת־און שקר מזין על־לשון הות׃
(BHSCO) Proverbs 17 : 5 לעג לרש חרף עשהו שמח לאיד לא ינקה׃
(BHSCO) Proverbs 17 : 6 עטרת זקנים בני בנים ותפארת בנים אבותם׃
(BHSCO) Proverbs 17 : 7 לא־נאוה לנבל שפת־יתר אף כי־לנדיב שפת־שקר׃
(BHSCO) Proverbs 17 : 8 אבן־חן השחד בעיני בעליו אל־כל־אשר יפנה ישכיל׃
(BHSCO) Proverbs 17 : 9 מכסה־פשע מבקש אהבה ושנה בדבר מפריד אלוף׃
(BHSCO) Proverbs 17 : 10 תחת גערה במבין מהכות כסיל מאה׃
(BHSCO) Proverbs 17 : 11 אך־מרי יבקש־רע ומלאך אכזרי ישלח־בו׃
(BHSCO) Proverbs 17 : 12 פגוש דב שכול באיש ואל־כסיל באולתו׃
(BHSCO) Proverbs 17 : 13 משיב רעה תחת טובה לא־[כ תמיש] [ק תמוש] רעה מביתו׃
(BHSCO) Proverbs 17 : 14 פוטר מים ראשית מדון ולפני התגלע הריב* נטוש׃
(BHSCO) Proverbs 17 : 15 מצדיק רשע ומרשיע צדיק תועבת יהוה גם־שניהם׃
(BHSCO) Proverbs 17 : 16 למה־זה מחיר ביד־כסיל לקנות חכמה ולב־אין׃
(BHSCO) Proverbs 17 : 17 בכל־עת אהב הרע ואח לצרה יולד׃
(BHSCO) Proverbs 17 : 18 אדם חסר־לב תוקע כף ערב ערבה לפני רעהו׃
(BHSCO) Proverbs 17 : 19 אהב פשע אהב מצה מגביה פתחו מבקש־שבר׃
(BHSCO) Proverbs 17 : 20 עקש־לב לא ימצא־טוב ונהפך בלשונו יפול ברעה׃
(BHSCO) Proverbs 17 : 21 ילד כסיל לתוגה לו ולא־ישמח אבי נבל׃
(BHSCO) Proverbs 17 : 22 לב שמח ייטב גהה ורוח נכאה תיבש־גרם׃
(BHSCO) Proverbs 17 : 23 שחד מחיק רשע יקח להטות ארחות משפט׃
(BHSCO) Proverbs 17 : 24 את־פני מבין חכמה ועיני כסיל בקצה־ארץ׃
(BHSCO) Proverbs 17 : 25 כעס לאביו בן כסיל וממר ליולדתו׃
(BHSCO) Proverbs 17 : 26 גם ענוש לצדיק לא־טוב להכות נדיבים על־ישר׃
(BHSCO) Proverbs 17 : 27 חושך אמריו יודע דעת [כ וקר] [ק יקר]־רוח איש תבונה׃
(BHSCO) Proverbs 17 : 28 גם אויל מחריש חכם יחשב אטם שפתיו נבון׃